ધરપકડ / અમદાવાદના 2 બેકાર હીરાઘસુઓએ પૈસા કમાવાનો એવો શોર્ટકટ અપનાવ્યો કે હવે જેલની હવા ખાવાનો વારો આવ્યો

• લોકડાઉનમાં હીરાના કારખાનાઓ બંધ થતાં તેઓ બેકાર બન્યા હતા
• દમણ-દીવનાં સાંસદ લાલુભાઈ પટેલના નામે દમણની કેટલીક કંપનીઓ પાસે ફાળો ઉઘરાવ્યો
• કેટલીક કંપનીઓએ સાંસદના નામે હજારો રૂપિયા પણ ટ્રાન્સફર કરી દીધા હતા

દમણ-દીવનાં સાંસદ લાલુભાઇ પટેલે દમણના કોસ્ટલ પોલીસ સ્ટેશનમાં આ મામલે ફરિયાદ નોંધાવતા પોલીસે ગણતરીના સમયમાં જ અમદાવાદથી બે  ભેજાબાજની ધરપકડ કરી લીધી છે. પોલીસની તપાસ આ મામલામાં અનેક ચોંકાવનારા ખુલાસા થયા છે. જાણો કોણ છે આ બે ગઠિયા અને કેવી રીતે કરતા હતા સાંસદ નામે ઠગાઈ ?

બે ગઠિયા જેમણે શોર્ટકટથી પૈસા કમાવવા માટે એક અનોખો જ કીમિયો અજમાવ્યો હતો. આ બંને વ્યક્તિઓ અમદાવાદના નિકોલ વિસ્તારમાં રહેતા રિતેશ જોશી અને રાકેશ શર્મા છે. જેમણે એવું પરાક્રમ કર્યું છે કે તેમને દમણ પોલીસની હવાલાતની હવા ખાવાનો વખત આવ્યો છે. બંને આરોપીઓ હીરા ઘસતા હતા. 

લોકડાઉનમાં હીરાના કારખાનાઓ બંધ થતાં તેઓ બેકાર બન્યા હતા

જોકે કોરોનાના કારણે લોકડાઉનમાં હીરાના કારખાનાઓ બંધ થતાં તેઓ બેકાર બન્યા હતા. બેકાર બનતા જ તેઓએ શોર્ટકટમાં પૈસા કમાવવા નોંધ એક અલગ જ કીમિયો અપનાવ્યો. આપણને સપનામાં પણ ખ્યાલ ન આવે તેવી રીતે કોઈ જાણીતી વ્યક્તિના નામે રૂપિયા ખંખેરવાનો પ્લાન બનાવ્યો. જેમાં તેઓએ દમણ-દીવનાં સાંસદ લાલુભાઈ પટેલના નામે દમણની કેટલીક કંપનીઓના માલિકો અને સંચાલકોને ફોન કરી અને મંદિરના નિર્માણ અને ભંડારા માટે ફાળો ઊઘરાવવાની શરૂઆત કરી હતી. 

કેટલીક કંપનીઓએ સાંસદના નામે હજારો રૂપિયા પણ ટ્રાન્સફર કરી દીધા હતા

નવાઈની વાત તો એ છે કે અનેક કંપની સંચાલકોએ દમણ સાંસદના નામ પર મંદિરના નિર્માણ કે ભંડારા માટે 21 હજારથી લઇને 51 હજાર રૂપિયા ગઠિયાઓના ખાતામાં ઓનલાઇન ટ્રાન્સફર પણ કરી આપ્યા હતા. જોકે કેટલાક કંપની સંચાલકોએ બાદમાં સાંસદ સાથે રૂબરૂ મળતા આખો મામલો બહાર આવ્યો હતો.

કંપની સંચાલકોના નંબર લઇ અને તેમને ફોન કરતા હતા

આ બંને ભેજાબાજો ઈન્ટરનેટના માધ્યમથી કંપની સંચાલકોના અને મેનેજરના નામ અને નંબર લઇ અને તેમને ફોન કરતા હતા. દમણ-દીવના સાંસદ લાલુભાઈ પટેલના નામે તેઓ કંપનીઓ પાસેથી ફંડફાળો ઉઘરાણું કરતા હતા. અત્યાર સુધી તેઓએ 10થી વધુ કંપનીઓમાં આવી રીતે સાંસદ લાલુભાઈ પટેલના નામે ફાળો પણ ઉઘરાવી લીધો હોવાનું પોલીસની પ્રાથમિક તપાસમાં બહાર આવ્યું છે. આથી પોલીસે બંને રિતેશ અને રાકેશની ધરપકડ કરી સળિયા પાછળ ધકેલી દીધા છે.