ગુજરાત ગેસ કંપની દ્વારા નેચરલ ગેસના ભાવમાં જે પાંચ રૂપિયાનો વધારો કરવામાં આવેલ છે તેને પાછો ખેંચવામાં આવે તેવી માંગ
મોરબીના સિરામિક એસોસિએશન 'રસ્તા પર'
ગેસનો ભાવ વધારાથી ઉદ્યોગો બંધ કરવા પડે તેવી સ્થિતિ
ગુજરાત ગેસે 5 રૂપિયાનો ભાવ વધાર્યો કરતાં કફોડી સ્થિતિ
મોરબીમાં સીરામીક પ્રોડક્ટના ઉત્પાદન માટે ગુજરાત ગેસ કંપનીનો નેચરલ ગેસ ઉપયોગમાં લેવામાં આવે છે આ ગેસના ભાવમાં આજથી ગુજરાત ગેસ કંપની દ્વારા પ્રતિ કયુબિક મીટર ગેસના ભાવમાં રૂપિયા પાંચનો ભાવ વધારો કરવામાં આવ્યો છે જેથી મોરબીના સિરામિક ઉદ્યોગ દૈનિક ત્રણ કરોડથી વધુની ભારણ વધી જશે આટલું જ નહીં પરંતુ ઇન્ટર નેશનલ અને નેશનલ માર્કેટમાં હાલમાં મંદીનો માહોલ છે ત્યારે ઉદ્યોગકારોને સિરામિક ઉદ્યોગને ટકાવી રાખવો પણ મુશ્કેલ બની ગયો છે.
ત્રણ કરોડથી વધુનું દૈનિક ભારણ પડશે
મોરબી સીરામીક ઉદ્યોગમાં વપરાતા નેચરલ ગેસનો વપરાશ અગાઉ દૈનિક ૭૦ લાખ ક્યુબીક મીટરથી વધી ગયો હતો જો કે, ગત ઓક્ટોમ્બર માહિનામાં ગુજરાત ગેસ કંપની દ્વારા ગેસના ભાવમાં બે વખત વધારો કરવામાં આવ્યો હતો તેના લીધે કેટલાક કારખાના બંધ થયા હતા અને કેટલાક કારખાનેદારો તેના ઉત્પાદનમાં કાપ મૂક્યો હતો જેથી કરીને ગેસની માંગ ઘટીને લગભગ ૪૫ લાખ કયુબિક મીટર ગેસ સુધીની થઈ ગયેલ હતી પરંતુ છેલ્લા દિવસોમાં કેટલાક નવા કારખાન કાર્યરત થવાથી તેમજ બંધ કરવામાં આવેલ યુનિટોને ચાલુ કરવામાં આવતા ફરી પછી નેચરલ ગેસની માંગ મોરબીમાં વધી છે ત્યારે આજે તા.૧ થી ગુજરાત ગેસ કંપની દ્વારા નેચરલ ગેસના ભાવમાં પાંચ રૂપિયાનો વધારો કરવામાં આવેલ છે જેથી કરીને મોરબીના સિરામિક ઉદ્યોગ ઉપર ત્રણ કરોડથી વધુનું દૈનિક ભારણ વધી જશે અને સિરામિક પ્રોડક્ટની પડતર કિંમત વધી જશે જેથી કરીને ઇન્ટર નેશનલ અને નેશનલ માર્કેટમાં ટકી રહેવું પણ મુશ્કેલ બની જશે.
અનેક રજૂઆતો છતાંય કોઈ નિવેડો નહીં
મોરબીના સિરામિક એસો. દ્વારા અગાઉ એક નહીં પરંતુ અનેક વખત ગુજરાત ગેસ કંપનીમાં ગેસના ભાવ વધારાની ૧૫ થી ૨૦ દિવસ પહેલા જાણ કરવા માટે રજૂઆતો કરવામાં આવી છે જો કે, ગુજરાત ગેસ કંપની દ્વારા તેને ધ્યાને લેવામાં આવતી નથી અને રાતોરાત ભાવ વધારો ઈમેલ મોકલાવીને કરી આપવામાં આવે છે તેવી જ રીતે હાલમાં ભાવ વધારો કરવામાં આવેલ છે જેથી મોરબીમાં તા ૩૦ સુધી ગુજરાત ગેસ કંપની દ્વારા ૫૮ રૂપિયાના ભાવથી ગેસ આપવામાં આવતો હતો જે તા ૧ થી સીધો જ પાંચ રૂપિયાનો વધારો કરીને ૬૩ રૂપિયાના ભાવથી આપવામાં આવશે અને તેના ઉપર ૬ ટકા ટેક્સ લાગશે એટલે ઉદ્યોગકારોને પ્રતિ કયુબિક મીટર ગેસ ૬૬.૭૦ ના ભાવથી મળશે આ પરિસ્થિતિમાં કારખાના ચલાવવા મુશ્કેલ બની ગયા છે ત્યારે ઉદ્યોગકારોના વર્તુળમાંથી મળતી માહિતી મુજબ કેટલાક કારખાના આગામી દિવસોમાં હજુ પણ બંધ કરવામાં આવે તેવી શક્યતા છે.
ઉદ્યોગકારોને ડોમેસ્ટીક અને ઇન્ટર નેશનલ માર્કેટમાં ટકવું મુશ્કેલ
અગાઉ ગેસ કંપની દ્વારા ગેસના ભાવમાં વધારો કરવામાં આવ્યો છે તે ઉદ્યોગકારોને નેશનલ અને ઇન્ટરનેશનલ માર્કેટ પાસ ઓન કરવામાં પરસેવો છૂટી ગયો છે ત્યાં ગેસ કંપની દ્વારા પહેલી મે એટલે કે આજે રવિવારથી ગેસના ભાવમાં પાંચ રૂપિયાનો તોતીંગ વઘારો કરવામા આવ્યો છે જેથી અહીના ઉદ્યોગકારોને ડોમેસ્ટીક અને ઇન્ટર નેશનલ માર્કેટમાં ટકવું મુશ્કેલ બની રહેશે આટલું જ નહીં પરંતુ મોટાભાગના ઓર્ડર એડ્વાન્સમાં લીધેલા હોય છે જેથી કરીને તેમાં માલની કિંમત પહેલા જ નક્કી કરવામાં આવી હોય છે જેથી કરીને આવા ઓર્ડર ઉદ્યોગકારોને ખોટ ખાઈને પૂરા કરવા પડતાં હોય છે.