ગુજરાત / ખોટી રીતે કે દાબ-દબાણથી જમીન પચાવી પાડનારાઓ હવે જશે જેલમાં, ગૃહમાં આ બિલ થયું પાસ

• ગુજરાતમાં જમીન પચાવી પાડવા પર પ્રતિબંધ વિધેયક પાસ
• જમીન પચાવી પાડનારા વ્યાજખોરો સામે કડક કાર્યવાહી થશે
• કોંગ્રેસના સમર્થન સાથે બિલ પાસ થયું

24 સપ્ટેમ્બર 2020ના રોજ ગુજરાત વિધાનસભાના ચોથા દિવસે ગૃહમાં 4 સરકારી વિધેયક રજૂ કરવામાં આવ્યા હતા. ગુજરાત જમીન પચાવી પાડવા પ્રતિબંધ વિધેયક, સ્મોલ કોજ કોર્ટ કાયદા ગુજરાત સુધારા વિધેયક, ગુજરાત યુનિવર્સિટીઓ કાયદા સુધારા વિધેયક અને રજિસ્ટ્રેશન ગુજરાત સુધારા વિધેયક પર ચર્ચા કરવામાં આવી. જેમાં આજ રોજ પ્રથમ વિધેયક જમીન પચાવી પાડવા પર પ્રતિબંધ બિલ પાસ થયું છે. 

મહત્વનું છે કે, આ બિલથી ગેરકાયદે કબજો કરનાર, ખેડૂતોની જમીનો હડપનાર અને જમીન પચાવી પાડનારા વ્યાજખોરો સામે કડક કાર્યવાહી થશે. આ કાયદા હેઠળ વિશેષ કોર્ટની રચના કરી શકાશે. ગુજરાત હાઈકોર્ટના જજ આ કોર્ટના જજની નિમણૂંક કરશે. જમીન પોતાની માલિકીની હોવાનો દાવો સાબિત કરવો પડશે. જો ગુનો સાબિત થાય છે તો 10થી 15 વર્ષની સજાની જોગવાઇ કરવામાં આવી છે. ખોટી વિગતો આપનાર, પાવર ઓફ એટર્નીનો દુરૂપયોગ કરનાર, દાબ-દબાણ અને છેતરપીંડીથી દસ્તાવેજ કરનારને સજા અને દંડની કડક સજા થશે.

ગૌચરની જમીન આસપાસના માપ મોટા થઈ જાય છેઃ બળદેવજી ઠાકોર

કોંગ્રેસના ધારાસભ્ય બળદેવજી ઠાકોરે વિધાનસભા ગૃહમાં નિવેદન આપ્યું હતું કે ગૌચરની જમીન આસપાસના માપ મોટા થઈ જાય છે. ખોટું અર્થઘટન કરી અધિકારીઓ જમીન પચાવી જાય છે. જૂના નકશા અમલમાં મૂકો, નિર્દોષ લોકો ફસાઈ છે.

તો પૂંજા વંશ દ્વારા આક્ષેપ કરાયો હતો કે પોલીસ આ કાયદાનો દુરૂપયોગ કરી શકે છે. પરંતુ તમામ ચર્ચાના અંતે આ વિધેયકને મંજૂરી મળી ચૂકી છે.