- લાલુ પ્રસાદ યાદવ સામે મોટી કાર્યવાહી
- જમીન-નોકરી કૌભાંડ કેસમાં ચાર્જશીટ દાખલ
- રેલ્વેમાં નોકરી આપવાના સામે જમીન લેતા
લાલુ પ્રસાદ યાદવ અને તેમના પરિવાર સાથે જોડાયેલા મોટા સમાચાર સામે આવી રહ્યા છે. સીબીઆઈએ લાલુ યાદવ, બિહારના પૂર્વ સીએમ રાબડી દેવી અને તેમની પુત્રી મીસા ભારતી અને અન્ય 16 લોકો સામે જમીન-નોકરી કૌભાંડ કેસમાં ચાર્જશીટ દાખલ કરી છે. સીબીઆઈના સૂત્રોના જણાવ્યા અનુસાર, સમગ્ર મામલામાં તપાસ દરમિયાન લાલુ પ્રસાદ યાદવ અને તેમના પરિવારને જમીન લઈને નોકરી આપવાની જાણકારી મળી છે.
જોબ સામે જમીન લેવામાં આવતી
આરોપ અનુસાર લાલુ યાદવ જ્યારે કેન્દ્રીય રેલવે મંત્રી હતા ત્યારે નોકરી આપવાના બદલામાં જમીન અને પ્લોટ લેવામાં આવતા હતા. 18 મેના રોજ સીબીઆઈએ લાલુ યાદવ, રાબડી દેવી, મીસા ભારતી અને હેમા યાદવ સહિત અન્ય લોકો વિરુદ્ધ એફઆઈઆર નોંધી હતી. આ વર્ષે મે મહિનામાં એક સાથે 17 સ્થળો પર દરોડા પાડવામાં આવ્યા હતા. આરોપ એ છે કે રેલવેમાં ગ્રુપ ડીની નોકરીના બદલામાં પટનામાં મુખ્ય સંપત્તિ લાલુના પરિવારના સભ્યોને વેચવામાં આવી હતી અથવા ભેટ આપવામાં આવી હતી.
ભોલા યાદવની પુછપરછ કરવામાં આવી
થોડા દિવસ પહેલા સીબીઆઇએ ભોલા યાદવને જમીન-નોકરીના કેસમાં દિલ્હીમાં પૂછપરછ માટે બોલાવ્યા હતા. પૂછપરછ બાદ ભોલા યાદવની સીબીઆઇએ ધરપકડ કરી હતી. લગભગ એક મહિના બાદ ભોલા યાદવને દિલ્હીથી જામીન મળી ગયા છે. ઉલ્લેખનીય છે કે ભોલા યાદવની સાથે સાથે રેલવેમાં કામ કરતા હૃદય નારાયણ ચૌધરીની પણ આ કેસમાં ધરપકડ કરવામાં આવી હતી. 2004 થી 2009 ની વચ્ચે લાલુ પ્રસાદ યાદવ કેન્દ્રમાં રેલ્વે પ્રધાન હતા ત્યારે ભોલા યાદવ લાલુના ઓએસડી હતા. આ જ કારણ છે કે સીબીઆઇએ જ્યારે નોકરીના બદલામાં જમીન લેવાના મામલાની તપાસ શરૂ કરી તો ભોલા યાદવની પણ પૂછપરછ કરવામાં આવી.
નોકરીના બદલામાં જમીન કૌભાંડ શું હતું?
લાલુ પ્રસાદ યાદવ પર રેલવેમાં નોકરીના બદલામાં ઘણા લોકો પાસેથી જમીન લઇ લેવાનો આરોપ હતો. સીબીઆઈએ આ કૌભાંડ મામલે 18 મે, 2022ના રોજ તત્કાલીન રેલવે મંત્રી લાલુ યાદવ અને તેમની પત્ની, બે પુત્રીઓ અને અજ્ઞાત સરકારી કર્મચારીઓ અને ખાનગી વ્યક્તિઓ સહિત 15 અન્ય લોકો વિરુદ્ધ કેસ નોંધ્યો હતો. તત્કાલીન રેલવે પ્રધાન તરીકેના તેમના કાર્યકાળ દરમિયાન, તેમણે રેલવેના વિવિધ વિભાગોના પદો પર ગ્રુપ "ડી" ની નિમણૂકના બદલામાં પરિવારના સભ્યોના નામે જમીનની સંપત્તિ સ્થાનાંતરિત કરી હતી.
