નિર્દેશ / ભાજપની રેલીઓમાં કોરોના નિયમોનાં ધજાગરા, ભાજપનાં જ મુખ્યમંત્રીએ જુઓ શું કડક સંકેત આપ્યા

• દક્ષિણનાં રાજ્યોમાં કોરોના વાયરસની કહેર 
• ભાજપની જનઆશીર્વાદ યાત્રા આવી વિવાદમાં 
• કર્ણાટકમાં મુખ્યમંત્રીએ કડકાઇ કરવાના આપ્યા આદેશ 

કર્ણાટકમાં કોરોના વાયરસની કોહરામ 
ભારતમાં કોરોના વાયરસને લઈને દિવસેને દિવસે ફરીથી ચિંતામાં વધારો થઈ રહ્યો છે. દક્ષિણનાં રાજ્યોમાં કોરોના વાયરસનાં કેસની સંખ્યામાં ઘટાડો આવી નથી રહ્યો ત્યારે કર્ણાટકનાં મુખ્યમંત્રી બોમ્મઇએ રાજ્યમાં કડકાઇ વધારવાના આદેશ આપ્યા છે. મુખ્યમંત્રીએ શનિવારે રાજ્યભરમાં કોરોના વાયરસની પરિસ્થિતિને જોતાં મોટા પાયે થઈ રહેલા કાર્યક્રમો અને રેલીઓને તાત્કાલિક રોકી દેવાના આદેશ આપ્યા. 

મુખ્યમંત્રીએ મોટા પાયે થઈ રહેલ રેલીઓ પર આપ્યો જવાબ 
કર્ણાટકમાં રાજકીય પાર્ટીઓ દ્વારા થઈ રહેલા મોટા મોટા આયોજનને લઈને મુખ્યમંત્રીએ કહ્યું કે અમે દરેક વસ્તુને પ્રાથમિકતા આપી રહ્યા છે. ફરી એક વાર આવા કાર્યક્રમોને લઈને દિશા નિર્દેશ જાહેર કરવામાં આવશે અને તેને ગંભીરતાથી લેવામાં આવશે. 

ભાજપ જ કરી રહી છે મોટી મોટી યાત્રાઓ 
નોંધનીય છે કે ભાજપ દ્વારા આખા દેશમાં મોટા પાયે જન આશીર્વાદ યાત્રાનું આયોજન કરવામાં આવ્યું છે. થોડા દિવસ પહેલા ગુજરાતનાં પણ કેટલાક જિલ્લાઓમાં આ યાત્રા કરવામાં આવી હતી. ભાજપની રેલીઓમાં કર્ણાટકમાં કોરોના વાયરસનાં નિયમોનાં ખૂલેઆમ ધજાગરા ઉડાવવામાં આવી રહ્યા છે જે બાદ વિપક્ષ દ્વારા તેની ખૂબ ટીકા કરવામાં આવી રહી છે. બીજી તરફ સરકાર શાળાઓને લઈને મોટી જાહેરાત કરી રહી છે. મુખ્યમંત્રીએ કહ્યું છે કે ધોરણ એકથી પાંચથી શાળાઓને ફરીથી ખોલવા માટે અત્યારે કોઈ જ વિચાર ચાલી રહ્યો નથી.

ભારતમાં વધી રહ્યા છે કોરોના વાયરસનાં કેસ 
નોંધનીય છે કે ભારતમાં આજે કોરોના વાયરસનાં નવા 42,618 કેસ સામે આવ્યા છે જ્યારે 330 દર્દીઓએ એક જ દિવસમાં પોતાનો જીવ ગુમાવ્યો છે. ભારતમાં કોરોના વાયરસનાં નવા કેસની સંખ્યામાં વધારો થવાના કારણે ફરીથી રિકવરી રેટમાં ઘટાડો સામે આવી રહ્યો છે.