પોલ ઑફ પોલ્સ / ભાજપ માટે ચિંતાજનક સમાચાર: એકેય સર્વે બહુમત મળવાના એંધાણ નહીં, કોંગ્રેસને જુઓ કેટલી બેઠકોનું અનુમાન

• કર્ણાટકમાં 10 મેના રોજ મતદાન, 14 મેના રોજ પરિણામ 
• ચૂંટણી પહેલા કર્ણાટકને લઈને ઘણા ઓપિનિયન પોલ બહાર પાડ્યા
• ઓપિનિયન પોલમાં ભાજપને ઝટકો, કોંગ્રેસની સરકાર 

દક્ષિણ ભારતના કર્ણાટક રાજ્યમાં એક મહિના પછી વિધાનસભાની ચૂંટણી યોજાશે. અહીં 10 મેના રોજ એક જ તબક્કામાં મતદાન થશે, ત્યારબાદ 14 મેના રોજ ચૂંટણી પરિણામ આવશે. ચૂંટણી પહેલા કર્ણાટકને લઈને ઘણા ઓપિનિયન પોલ બહાર પાડવામાં આવ્યા છે. જેમાં 4 પોલ અહીની ચૂંટણીમાં પાર્ટીઓના સંભવિત પ્રદર્શનને લઈને આવ્યા છે.કર્ણાટકમાં હજુ પણ ભાજપ સત્તા પર છે, પરંતુ ચારેય પોલ પર નજર કરીએ તો કોઈપણ સર્વે મુજબ ભાજપની સરકાર દેખાતી નથી. 

કર્ણાટક વિધાનસભા ચૂંટણીની તારીખોની જાહેરાત મુખ્ય ચૂંટણી કમિશનર રાજીવ કુમાર દ્વારા બુધવારે કરવામાં આવી હતી. હવે 10 મેના રોજ રાજ્યની 224 બેઠકો પર મતદાન થશે અને તેનું પરિણામ 13 મેના રોજ જાહેર કરવામાં આવશે. ABP-CVoter એ રાજ્યમાં સરકાર કોણ બનાવશે તેની આગાહી કરવા માટે ઓપિનિયન પોલ હાથ ધર્યો હતો. જેમાં સ્પષ્ટપણે કોંગ્રેસની સરકાર રચાતી જોવા મળી રહી છે અને ભાજપ સત્તાથી બહાર જણાઈ રહ્યું છે. આ બધાની વચ્ચે ચૂંટણીના પરિણામો પણ સામે આવ્યા છે. આવી સ્થિતિમાં રાજ્યના મુખ્ય પક્ષો ભાજપ, કોંગ્રેસ અને જેડીએસની આમાં શું સ્થિતિ છે તે જાણવું જરૂરી બની જાય છે. અહીં આપણે કોંગ્રેસની સીટો વિશે જાણીશું, કયા ઓપિનિયન પોલમાં પાર્ટી આગળ છે અને કઈ પાર્ટી પાછળ છે. 

ABP-CVoterના ઓપિનિયન પોલમાં કોંગ્રેસની બલ્લે બલ્લે

સૌથી પહેલા વાત કરીએ ABP-CVoter ના ઓપિનિયન પોલની. આમાં કોંગ્રેસ સરકાર બનાવતી જોવા મળી રહી છે. આ સર્વેમાં કોંગ્રેસને 115થી 127 બેઠકો મળવાનું અનુમાન લગાવવામાં આવ્યું છે. સાથે જ ભાજપને મોટો ફટકો પડી શકે છે, કારણ કે આ વખતે સત્તા તેના હાથમાંથી જતી દેખાઈ રહી છે. સર્વે મુજબ ભાજપ 68 થી 80 સીટો સુધી સીમિત રહી શકે છે.

Matrize ના ઓપિનિયન પોલમાં ભાજપની સરકાર

બીજા ઓપિનિયન પોલ મુજબ કોંગ્રેસને 88 થી 98 સીટો અને ભાજપને 96 થી 106 સીટો મળવાની ધારણા છે. આ સર્વેમાં ભાજપ મજબૂત સ્થિતિમાં જોવા મળી રહ્યું છે.

લોક પોલમાં કોંગ્રેસની સરકાર

જો ત્રીજા લોકપોલના અભિપ્રાય પર વિશ્વાસ કરવામાં આવે તો તેમાં પણ કોંગ્રેસ સરકાર બનાવતી દેખાઈ રહી છે, કારણ કે આ સર્વેમાં કોંગ્રેસને 116થી 123 બેઠકો મળવાનો અંદાજ છે. બીજી તરફ ભાજપને 77થી 83 બેઠકો મળતી જોવા મળી રહી છે.

પોપ્યુલર પોલ્સમાં ભાજપ કોંગ્રેસ 50-50

હવે વાત કરીએ ચોથા ઓપિનિયન પોલ પોપ્યુલર પોલની. આ ઓપિનિયન પોલમાં કેસ 50-50 દર્શાવવામાં આવ્યો છે. મતલબ કોંગ્રેસને 82 થી 87 સીટો અને બીજેપીને પણ 82 થી 87 સીટો મળતી દર્શાવવામાં આવી છે. હવે, પોલ ઓફ પોલના એકંદર પરિણામ દર્શાવે છે કે બે ઓપિનિયન પોલમાં કોંગ્રેસ સરકાર બનાવતી દેખાઈ રહી છે, જ્યારે બે ઓપિનિયન પોલમાં કોંગ્રેસ જંગ લડતી જોવા મળી છે.