ચેતજો.! / શ્વાન પાળનારા માટે લાલબત્તી સમાન કિસ્સો, મહેસાણામાં યુવકને પેટમાં ગાંઠ થઈ ગઈ, ગંભીર હાલતમાં 3 કલાક ચાલ્યું ઓપરેશન, જુઓ શું બન્યું

• શ્વાન પાળતા લોકો માટે આંખ ઉઘાડતો કિસ્સો સામે આવ્યો 
• મહેસાણાના કમાણા ગામે યુવાનને શ્વાન પાળવું ભારે પડ્યુ
• કૂતરાની લાળના કારણે યુવકના પેટમાં ગાંઠ થઈ

મહેસાણાના કમાણા ગામે વિચિત્ર કિસ્સો સામે આવ્યો છે. જેમાં 25 વર્ષીય યુવાનને શ્વાન પાળવાનો શોખ હતો પરંતુ આ શોખ તેને ખૂબ મોંઘો પાડ્યો છે. જેમાં શ્વાનની લાળને કારણે યુવાનને લીવરમાં ગાંઠ થઇ ગઈ હતી. જેને લઈને તેને તાત્કાલિક હોસ્પિટલમાં ખસેડવામાં આવ્યો હતો. આ દરમિયાન વિસનગરની નૂતન જનરલ હોસ્પિટલના તબીબો પણ ચોંકી ઉઠ્યા હતા.

ત્રણ કલાકની જહેમત બાદ તબીબ ટીમને સફળતા
કમાણા ગામના ચાવડા અશોકભાઈએ પાલતુ શ્વાન પાળ્યો હતો. તેઓ શ્વાનને ખોરાક ખવડાવતા, દૂધ પીવડાવતા અને માવજત કરતા હતા આ દરમિયાન અશોકભાઈની એકાએક તબિયત બગડતા તેને તાત્કાલિક સારવાર અર્થે ખસેડવામા આવ્યો હતો. પેટમાં સતત દુખાવો, ઉલ્ટી, ઉબકાની ફરિયાદ સાથે વિસનગરની નૂતન જનરલ હોસ્પિટલમાં દાખલ કરાયા હતા. જ્યા ડૉ.કે.જી.પટેલ, સર્જન ડૉ.કે.કે.પટેલ, ડૉ.પંકજ પટેલ, ડૉ.હર્ષદ પરમાર, ડૉ.મિત ત્રિવેદી સહિતની તબીબોની ટીમના માર્ગદર્શન મુજબ રિપોર્ટ અને સીટી સ્કેન કરાવ્યું હતું. જેમાં બહાર આવ્યું કે શ્વાનની લાળ લારવાને લીધે હાઈટેડિટ સિસ્ટની ગંભીર બીમારી થઈ છે. શ્વાનની લારવા પેટથી લિવર સુધી પહોંચી ગઈ ગયા બાદ આ સમસ્યાનું નિર્માણ થયું હોવાનું સામે આવ્યું હતું.

તબીબોએ જણાવ્યું કે...
બાદમાં સમસ્યાની ગંભીરતાને ધ્યાને લઈને તબીબ ટીમે ઓપરેશન હાથ ધર્યુ હતું. જેમાં ત્રણ કલાકની ભારે જહેમત બાદ સફળ ઓપરેશન કરી ગાંઠ દૂર કરવામાં આવી હતી. આ મામલે તબીબોનું માનવું છે કે ઘરમાં કોઈપણ પશુ હોય તો તેના સંપર્કમાં આવ્યા બાદ સાબુથી હાથ ધોઈ નાખવા જોય ઉપરાંત અન્ય ચોકસાઈ પણ રાખવી જોઈએ.