રાજ્યમાં વરસાદી માહોલ વચ્ચે આજે જૂનાગઢ જિલ્લામાં સચરાચર મેઘમહેર થઈ હતી. જેને લઇને ખેડૂતોના હૈયા હરખાયા હતા.
જૂનાગઢ પંથકમાં મેઘાએ મન મૂકીને હેત વરસાવ્યું
ડુંગર પરથી વહેતા ઝરણાનો આહ્લાદક નજારો જોવા મળ્યો
જૂનાગઢના પવિત્ર દામોદર કુંડમાં ઘોડાપૂર ઉમટ્યા હતા
રાજ્યમાં વરસાદી વાતાવરણ વચ્ચે આજે સવારથી જૂનાગઢ પંથકમાં મેઘાએ મન મૂકીને હેત વરસાવ્યું હતું. જેને પગલે નદી, નાળાઓમાં ઘોડાપૂર આવ્યા હતા તો મોટા ડેમોમાં નવા નીર આવતા ડેમના જળ વૈભવમાં વધારો થયો છે. રોડ રસ્તાઓ પર પાણી ભરાતા લોકોની મુશ્કેલીમાં પણ વધારો થયો હતો. ઉપરાંત પહાડી વિસ્તારમાં ભારે વરસાદ થતા પહાડ ઉપરથી પાણીના ઝરણા વહેતા થયા હતા જેને લઇને મનમોહક અને નયનરમ્ય નજારો જોવા મળ્યો હતો.
જૂનાગઢમાં ચોતરફ પાણી.. પાણી...ના દ્રશ્યો સર્જાયા
જૂનાગઢમાં મેઘરાજાએ તોફાની બેટિંગ કરી હતી. ભારે વરસાદથી ચોતરફ પાણી.. પાણી...ના દ્રશ્યો સર્જાયા હતા. જળબંબાકાર જેવી સ્થિતિ વચ્ચે રસ્તાઓ પર પાણી ભરાયા હતા. આથી વાહનચાલકોને હાલાકીનો સામનો કરવાનો વારો આવ્યો હતો. અને જૂનાગઢ શહેરમાંથી પસાર થતા કાળવાના હોકળામાં ઘોડાપૂર આવ્યું હતું. તથા શહેરના અનેક વિસ્તારોમાં પાણીમાં ગરક થયા હતા. બજારોમાં પાણી ભરાતા જનજીવન પ્રભાવિત થયું હતું.
દાતારના ડુંગર પરથી વહેતા ઝરણાનો આહ્લાદક નજારો જોવા મળ્યો
રાજ્યના અનેક શહેરોની સાથે આજે જૂનાગઢ જિલ્લામાં પણ વરસાદી માહોલ જામ્યો હતો. ઉપલા દાતારમાં વહેલી સવારથી જ ધોધમાર વરસાદ શરૂ થયો હતો. ભારે વરસાદ થતા પહાડ ઉપરથી પાણીના ઝરણા વહેવા લાગ્યા હતા. વહેતા ઝરણાનો ડુંગર પરથી આહ્લાદક નજારો જોવા મળ્યો હતો. વરસાદ બાદ જંગલ વિસ્તારમાં પ્રકૃતિ સોળે કળાએ ખીલી ઉઠી છે. દાતારના ડુંગર પરથી વહેતા ઝરણાનો અદ્ભૂત નજારો લોકોએ નિહાળ્યો હતો.
વિસાવદરનો આંબાજળ ડેમ ઓવરફલો
જૂનાગઢમાં સચરાચર મેઘમહેર વચ્ચે વિસાવદરમાં પણ 4થી 6 ઇંચ જેટલો વરસાદ નોંધાયો હતો. અવકાશી વીજળીના કડાકા-ભડાકા અને મેઘાડંબર વચ્ચે મેઘરાજાએ અવિરત બેટિંગ કરી હતી. આથી પ્રથમ વરસાદમાં જ વિસાવદરના આંબાજળ ડેમમાં પાણીની આવક થતા ડેમ ઓવરફલો થયો હતો. એટલું જ નહી મેઘરાજાની સટાસટીને લઇને અનેક ગામોના નિચાણવાળા વિસ્તારોમાં પાણી ભરાયા હતા. તો બીજી તરફ લોકોએ રોડ પર નીકળી પડી પ્રથમ વરસાદની મોજ માણી હતી.
ઓજત વિયર ડેમ ભયજનક સપાટીએ આવતા નીચાણવાળા વિસ્તારના લોકોને કરાયા અલર્ટ
વધુમાં જૂનાગઢમાં ખાબકેલા વરસાદને પગલે આણંદપુર ગામના ઓજત વિયર ડેમમાં પાણીની આવક થતાં ડેમ 100 ટકા સપાટીએ ભરાયો હતો. જિલ્લામાં ધોધમાર વરસાદથી ઓજત વિયર ડેમમાં પાણીની આવક થઇ હતી અને ડેમ ભયજનક સપાટીએ આવ્યો હતો. આથી તંત્ર દ્વારા સલામતીના ભાગ રૂપે નીચાણવાળા વિસ્તારના લોકોને એલર્ટ કરવામાં આવ્યા હતા અને ડેમના પટમાં અવરજવર ન કરવા સૂચના આપવામાં આવી હતી. વંથલી તાલુકાના રાયપુર, સુખપુર અને મેંદરડાના નાગલપુર સહીતના ગામના લોકોને અલર્ટ કરવામાં આવ્યા હતા.
જૂનાગઢના પવિત્ર દામોદર કુંડમાં આવ્યુ ઘોડાપૂર
ઉપરાંતના જૂનાગઢના માંગરોળ અને માળીયા હાટીના પંથકમાં પણ મેઘસવારી આવી પહોંચી હતી. માંગરોળ પંથકમાં વરસાદી માહોલ જામ્યો હતો અને વીજળીના કડાકા ભડાકા અને વાદળોની હડિયાપટ્ટી વચ્ચે ધીમીધારે વરસાદનું આગમન થયું હતું. ભારે વરસાદને પગલે ખેતરોમાં વરસાદી પાણી ભરાયા હતા. તો બીજી બાજુ ચોરવાડ અને માંગરોળના દરીયામાં કરંટ જોવા મળ્યો હતો અને દરિયામાં ઉંચા ઉંચા મોજા ઉછળ્યા હતા. વરસાદને કારણે ગિરનારમાંથી નીકળતી સોનરખ નદીમાં પણ પૂર આવ્યું હતું. અને જૂનાગઢના પવિત્ર દામોદર કુંડમાં ઘોડાપૂર ઉમટ્યા હતા. અનરાધાર મેઘમહેરને લઇને કુંડમાં પાણીનો ધસમસતો પ્રવાહ જોવા મળ્યો હતો. વંથલીના કોયલી ગામમાં ધોધમાર વરસાદ વરસ્યો હતો. કોયલી ગામમાં એક જ કલાકમાં 4 ઈંચ જેટલું પાણી વરસ્યું હતું. આથી હોકળાના પાણી ગામમાં ઘુસ્યા હતા અને વરસાદના નવા નીરથી તળાવ ભરાયું હતું.
10થી 15 જુલાઈ વચ્ચે વરસાદી સિસ્ટમ સક્રિય થશે :અંબાલાલ પટેલે
રાજ્યમાં વરસાદને લઇ હવામાન નિષ્ણાત અંબાલાલ પટેલે આગાહી કરી છે. રાજ્યમાં 10થી 15 જુલાઈ વચ્ચે વરસાદી સિસ્ટમ સક્રિય થશે. જેથી ભારે વરસાદ પડી શકે છે. આગામી 5 જુલાઈ આસપાસ ઉત્તર ગુજરાતમાં વરસાદની શક્યતા સેવાઇ રહી છે. મધ્ય અને ઉત્તર ગુજરાતના કેટલાક ભાગોમાં ભારે વરસાદની આગાહી કરવામાં આવી છે. તો દક્ષિણ ગુજરાત, સૌરાષ્ટ્રમાં પણ ભારે વરસાદ પડી શકે છે તથા કચ્છના કેટલાક વિસ્તારમાં પણ ભારે વરસાદની આગાહી કરી છે. વરસાદને લીધે નર્મદા અને તાપી નદીના જળસ્તરમાં વધારો થશે તેવી હવામાન નિષ્ણાત અંબાલાલ પટેલે આગાહી કરી છે. હવામાન નિષ્ણાત અંબાલાલ પટેલના જણાવ્યા અનુસાર અમદાવાદ, મહેસાણાના કેટલાક ભાગોમાં હળવા વરસાદની શક્યતા સેવાઇ રહી છે. વધુમાં 10થી 15 જુલાઈ વચ્ચે મજબૂત વરસાદી સિસ્ટમ સક્રિય થશે જેને કારણે ભારેથી અતિભારે વરસાદ પડી શકે છે.