જામનગર / જામસાહેબ શત્રુશૈલ્યસિંહજીએ ઘર આંગણે જ પોસ્ટલ બેલેટથી કર્યું મતદાન, લોકોને કરી આ ખાસ અપીલ

• જામનગરના જામસાહેબ શત્રુશૈલ્યસિંહજીએ પોસ્ટલ બેલેટથી કર્યું મતદાન 
• પોસ્ટલ બેલેટથી ઘર આંગણે જ મતાધિકારનો કર્યો ઉપયોગ 
• મતદાર કરી જામસાહેબે દરેક નાગરિકને મતદાન કરવા કરી અપીલ

જામનગરમાં જામસાહેબ શત્રુશૈલ્યસિંહજીએ પોસ્ટલ બેલેટથી મતદાન કરી તમામ લોકોને અચૂક  મતદાન કરવા અપીલ કરી હતી. શત્રુશૈલ્યસિંહજીએ પોસ્ટલ બેલેટથી ઘર આંગણે જ મતાધિકારનો ઉપયોગ કર્યો હતો. જામ સાહેબ શત્રુશૈલ્યજીસિંહજીએ ટપાલ મતપત્ર મારફત પોતાના નિવાસસ્થાનેથી વિધાનસભા 2022 ચૂંટણી માટે પોતાના મતાધિકારનો ઉપયોગ કર્યો હતો. આ અવસરે તેઑએ કહ્યું હતું કે આપણા દેશને લોકશાહી મળતાની સાથે જ દેશના નાગરીકોને મતદાન કરવાનો હક મળ્યો છે. જેનો તમામ લોકોએ ખાસ ઉપયોગ કરવો જોઈએ. 

પ્રાંત અધિકારી સહીતના રહ્યા હાજર 
વધુમાં જામ સાહેબ શત્રુશૈલ્યજીસિંહજીએ જણાવ્યું હતું કે આંખ બંધ કરી સગા-સંબંધી કે નાત-જાત જોઈને મતદાન કરવાને બદલે પ્રજાની સેવા કરવા લાયક હોય તેવા ઉમેદવારને જ મત આપવો જોઈએ. મહત્વનું છે કે,  ચૂંટણી અધિકારી-78 તથા પ્રાંત અધિકારી ડી.ડી. શાહ સહિતના અધિકારીઓની ઉપસ્થિતિમાં જિલ્લા ચૂંટણી તંત્ર દ્વારા ઉપલબ્ધ કરાવાયેલ આ સુવિધા મારફત જામ સાહેબએ મતદાન કર્યું હતું.

જિલ્લા ચુંટણી તંત્ર ઊભી કરાઇ સુવિધા
ઉલ્લેખનીય છે કે વિધાનસભા 2022 ની ચૂંટણીમાં એક પણ મતદાર ન છૂટે અને 100 ટકા મતદાન થાય તે હેતુથી જિલ્લા ચુંટણી તંત્ર દ્વારા 80 વર્ષથી વધુ વય ધરાવતા નિર્દિષ્ટ મતદાર, દિવ્યાંગો તથા કોવિડગ્રસ્ત લોકો માટે આ ચૂંટણીમાં ઘર આંગણે જ ટપાલ મતપત્રથી મતદાન કરવાની વિશેષ સુવિધા ઉભી કરાઈ છે.