IPL સટ્ટાકાંડમાં અરબાઝ ખાનને બ્લેકમેઇલ કરવા મુદ્દે તપાસ પહોંચી રાજકોટ

રાજકોટઃ IPL સટ્ટાકાંડમા અરબાઝ ખાનને બ્લેકમેઈલ કરવાના મામલે રાજકોટમાં તપાસ શરૂ કરવામાં આવી છે. અનેક બુકીઓ સોનુ જલાલના પાર્ટનર હોવાના કારણે રાજકોટમાં તપાસ કરવામાં આવી રહી છે.

સોનુ જલાલનુ નામ સામે આવતા રાજકોટના બુકીઓ ભૂગર્ભમાં છે. રાજકોટના બુકીઓની તપાસ કરવામાં આવે તો નવા ખુલાસાઓ થાય તેવી શક્યતા છે.

મહત્વનું છે કે IPL સટ્ટાબાજી મામલે બોલિવુડ અભિનેતા અરબાઝ ખાન થાણે પોલીસ સ્ટેશનમાં હાજર થયો હતો. ત્યારબાદ અરબાઝ ખાને પોલીસ સમક્ષ સટ્ટાબાજીની વાત સ્વીકારી હતી.

અરબાઝ ખાને પોલીસને જણાવ્યું હતું કે તે છેલ્લા 5 વર્ષથી બુકી સોનુ જાલાનને ઓળખતો હતો. સાથે જ અરબાઝ ખાને સટ્ટાબાજી કરતો હોવાની વાતનો સ્વીકાર કર્યો હતો.

ત્યારે પોલીસ દ્વારા સમગ્ર મામલે વધુ તપાસ હાથ ધરવામાં આવી હતી. હવે આ તપાસનો રેલો રાજકોટ સુધી પહોંચ્યો છે.