ક્રિકેટ / IPL પર્પલ કેપની રેસ; આ ભારતીય ખેલાડી રબાડાને પછાડીને પહોંચી શકે છે ટોચના સ્થાને

IPLનું ત્રીજું સપ્તાહ ચાલી રહ્યું છે. દરેક મેચમાં નવા સ્ટાર ઊભરી રહ્યા છે, પરંતુ બોલિંગના મોરચા પર જૂના ધુરંધરોનો હજુ પણ દબદબો જોવા મળી રહ્યો છે. સૌથી વધુ વિકેટ એટલે કે પર્પલ કેપની લડાઈ બહુ જ રોમાંચક-દિલચસ્પ બની ગઈ છે. ખાસ વાત એ છે કે સૌથી વધુ વિકેટ ઝડપવાની દોડમાં સૌથી ઉપર ચાર ફાસ્ટ બોલર છે. પાંચમા નંબર પર સ્પિનર છે. ટોચ પર પહોંચવા માટે બોલર્સ વચ્ચે માત્ર એક વિકેટનું અંતર છે. 

કેગિસો રબાડાઃ

દિલ્હી કેપિટલ્સનો કેગિસો રબાડા ટોચના સ્થાને છે. રબાડાએ અત્યાર સુધીમાં સૌથી વધુ ૧૨ વિકેટ ઝડપી છે. ખાસ વાત એ છે કે તે ૧૨.૭ની સરેરાશથી વિકેટ ઝડપી રહ્યો છે એટલે કે એક વિકેટ માટે રબાડા ૧૨ રન ખર્ચ કરી રહ્યો છે, જ્યારે તેનો સ્ટ્રાઇક રેટ ૧૦નો છે.

જસપ્રીત બૂમરાહઃ

સૌથી વિકેટ ઝડપવાની રેસમાં બીજા નંબર પર હવે મુંબઈ ઇન્ડિયન્સનો જસપ્રીત બૂમરાહ પહોંચી ગયો છે. ગઈ કાલે સિઝનમાં પહેલી વાર નવા બોલ સાથે મોરચો સંભાળનારા બૂમરાહે રાજસ્થાન રોયલ્સ સામે ચાર વિકેટ ઝડપી. આ સાથે જ તે હવે સૌથી વધુ વિકેટ લેવાની રેસમાં બીજા નંબર પહોંચી ગયો છે. બૂમરાહના ખાતામાં ૧૧ વિકેટ જમા થયેલી છે. બૂમરાહનો સ્ટ્રાઇક રેટ ૧૩નો છે.

ટ્રેન્ટ બોલ્ટઃ

પર્પલ કેપની રેસમાં ત્રીજા નંબર પર મુંબઈ ઇન્ડિયન્સનો ટ્રેન્ટ બોલ્ટ છે. બોલ્ટ અત્યાર સુધીમાં ૧૦ વિકેટ ઝડપી ચૂક્યો છે. સરેરાશ અને સ્ટ્રાઇક રેટના મામલામાં તે રબાડા અને બૂમરાહથી ઘણો પાછળ છે. બોલ્ટનો સ્ટ્રાઇક રેટ ૧૪ અને સરેરાશ ૧૮.૩૦ છે.

જેમ્સ પેટિન્સનઃ

ચોથા નંબર પર પણ મુંબઈ ઇન્ડિયન્સનો જ બોલર છે. જેમ્સ  પેટિન્સને અત્યાર સુધીમાં નવ વિકેટ ઝડપી છે. મુંબઈના બૂમરાહ, બોલ્ટ અને પેટિન્સન વિરોધી ટીમા બેટ્સમેનોને ખાસ્સા પરેશાન કરી રહ્યા છે.

યુઝવેન્દ્ર ચહલઃ

પર્પલ કેપની યાદીમાં પાંચમા નંબર પર છે આરસીબીનો લેગ સ્પિનર યુઝવેન્દ્ર ચહલ. તેણે અત્યાર સુધી પાંચ મેચમાં આઠ વિકેટ ઝડપી છે. 

પોઇન્ટ ટેબલમાં ટોચના સ્થાને પહોંચી મુંબઈ ઇન્ડિયન્સ 

ગઈ કાલે રાજસ્થાન રોયલ્સને હરાવ્યા બાદ મુંબઈ ઇન્ડિયન્સ પોઇન્ટ ટેબલમાં ટોચના સ્થાને પહોંચી ગઈ છે. મુંબઈ ઇન્ડિયન્સે અત્યાર સુધીમાં રમેલી છ મેચમાંથી ચાર મેચ જીતી છે અને બે મેચમાં હારનો સામનો કરવો પડ્યો છે. +૧.૪૮૮ના નેટ રનરેટ સાથે મુંબઈ ઇન્ડિયન્સના આઠ પોઇન્ટ છે. બીજા સ્થાને રહેલી દિલ્હી કેપિટલ્સે પાંચમાંથી ચાર મેચ જીતીને આઠ પોઇન્ટ હાંસલ કર્યા છે. તેનો નેટ રનરેટ +૧.૦૬૦ છે. ત્રીજા સ્થાન પર રહેલી આરસીબીએ પાંચમાંથી ત્રણ મેચ જીતીને છ પોઇન્ટ હાંસલ કર્યા છે. તેનો નેટ રનરેટ -૧.૩૫૫ છે. ચોથા સ્થાન પર ચાર પોઇન્ટ સાથે કોલકાતાની  ટીમ છે. તેણે ચારમાંથી બે મેચ જીતી છે અને તેનો નેટ રનરેટ -૦.૧૨૧ છે. ધોનીની સીએસકે પાંચ મેચમાં બે જીત અને ત્રણ હાર સાથે પાંચમા સ્થાને છે. ચાર પોઇન્ટ સાથે તેનો નેટ રનરેટ -૦.૩૪૨ છે. છઠ્ઠા સ્થાન પર સનરાઇઝર્સ હૈદરાબાદ છે. પાંચ મેચમાંથી બેમાં જીત અને ત્રણમાં પરાજય સાથે આ  ટીમ પાસે ચાર પોઇન્ટ છે. તેનો નેટ રનરેટ -૦.૪૧૭ છે. સાતમા સ્થાન પર રાજસ્થાન રોયલ્સ છે. પાંચમાંથી બે જીત અને ત્રણ પરાજય સાથે આ ટીમ પાસે ચાર પોઇન્ટ છે. તેનો નેટ રનરેટ -૦.૮૨૬ છે. માત્ર બે પોઇન્ટ સાથે સૌથી છેલ્લા સ્થાને કિંગ્સ ઈલેવન પંજાબ છે. આ ટીમ પાંચમાંથી માત્ર એક જ મેચ જીતી શકી છે અને ચાર મેચમાં તેનો પરાજય થયો છે. જોકે આ ટીમનો નેટ રનરેટ +૦.૧૭૮ છે.