ઘર્ષણ / સિક્કિમ બોર્ડર પર ભારત-ચીનના સૈનિકો વચ્ચે ટકરાવ, બંને દેશના જવાનો થયા ઘાયલ

• સિક્કિમ સરહદ પર ભારત-ચીનના સૈનિકો વચ્ચે ટકરાવ
• બંને દેશના જવાનો ઘાયલ થયા હોવાના અહેવાલ
• ટકરાવને સ્થાનિક લેવલે ઉકેલવામાં આવી

ચીન ભારતની સરહદ પર થોડા થોડા સમયના અંતરે પોતાની અવળચંડાઇ બતાવતું હોય છે. ત્યારે ભારતીય સેનાના સુત્રોના જણાવ્યાં અનુસાર સિક્કિમ બોર્ડર પર ભારત અને ચીનના સૈનિકો વચ્ચે ટકરાવ જોવા મળ્યો હતો.

જેમાં બંને દેશના સૈનિકો ઘાયલ થયા હોવાના અહેવાલ પ્રાપ્ત થયા છે. ભારત-ચીનના સૈનિકોને નાની-મોટી ઇજા પહોંચી છે. આ ઘટના નાકૂલા સેકટર પાસેની છે. આ વિસ્તાર 5 હજાર મીટરથી પણ વધારે ઉંચાઇ પર છે. 

સૂત્રોના જણાવ્યાં અનુસાર આ ટકરાવાને સ્થાનિક સ્તર પર જ ઉકેલી લેવામાં આવ્યો છે. બંને દેશોના સૈનિકો વચ્ચેની ટકરાવ બાદ સૈનિકો પોત-પોતાની પોસ્ટ પર પરત ફરી ગયા હતા. ઉલ્લેખનીય છે કે સરહદ વિવાદને લઇને સૈનિકો વચ્ચે નાનો-મોટો ટકરાવ જોવા મળતો હોય છે. જો કે આ ઘટના ઘણા લાંબા સમય બાદ જોવા મળી છે.