રશિયા-યુક્રેન સંકટ (Russia-Ukraine crisis) ના કારણે આંતરરાષ્ટ્રીય બજારમાં ક્રૂડ ઓઇલનો ભાવ સતત વધી રહ્યો છે. ત્યારે Crude Oilમાં સતત વધતા જતા ભાવ વચ્ચે કેન્દ્ર સરકાર મહત્વનો નિર્ણય લઇ શકે તેવી શક્યતા છે. જેનાથી કદાચ આમ આદમીને મોટી રાહત મળે તેવી શક્યતા છે.
Crude Oil માં વધતા જતા ભાવ વચ્ચે કેન્દ્ર સરકાર લઇ શકે છે મહત્વનો નિર્ણય
સામાન્ય જનતાને થઇ શકે છે ફાયદો
શું પેટ્રોલ-ડીઝલના ભાવમાં થશે ઘટાડો?
વિશ્વનો ત્રીજો સૌથી મોટો તેલ વપરાશકાર દેશ ભારત પોતાની જરૂરિયાતોના 85 ટકા ખરીદી કરે છે. આવી સ્થિતિમાં મોંઘા ક્રૂડ આયાત બિલના મોરચે ભારતને આંચકો આપી શકે છે. તેનાથી વેપાર ખાધ પણ વધશે. આ આંચકાઓથી બચવા અને સામાન્ય માણસને રાહત આપવા માટે સરકાર તેના રણનીતિક ઓઇલ ભંડારનો ઉપયોગ કરી શકે છે. નવેમ્બરમાં સરકારે ઓઇલ ભંડારમાંથી 50 લાખ બેરલ તેલ કાઢવાનો નિર્ણય લીધો હતો. જેમાંથી અત્યાર સુધીમાં 35 લાખ બેરલ ઓઇલ નીકાળવામાં આવ્યું છે. યુક્રેન પર રશિયાના હુમલાના કારણે 24 ફેબ્રુઆરીએ આંતરરાષ્ટ્રીય બ્રેન્ટ ક્રૂડ પ્રતિ બેરલ $105.58ની સર્વકાલીન ઉચ્ચતમ સપાટીએ પહોંચી ગયું હતું.
વૈશ્વિક બજારો પર સરકારની નજર
પેટ્રોલિયમ મંત્રાલયનું કહેવું છે કે, ભારત સરકાર વૈશ્વિક ઉર્જા બજારો પર ખૂબ જ નજીકથી નજર રાખી રહી છે. તેનાથી બદલાતી જતી ભૌગોલિક રાજકીય પરિસ્થિતિના પરિણામ સ્વરૂપ ઉર્જાના પુરવઠામાં વિક્ષેપના વિશે ખ્યાલ આવી શકે. વર્તમાન સપ્લાય સ્થિર ભાવે ચાલુ રહે તેની ખાતરી કરવા ભારત યોગ્ય પગલાં લેવા તૈયાર છે.
ગ્રાહક ભાવ પર અસરનો કોઇ જ ઉલ્લેખ નથી
નિવેદનમાં આંતરરાષ્ટ્રીય ભાવમાં વૃદ્ધિની ગ્રાહકની કિંમત પર શું અસર થશે, તેના વિશે કોઇ જ રજૂઆત નથી કરવામાં આવી. જેમાં કહેવામાં આવ્યું છે કે, ભારત વ્યૂહાત્મક પેટ્રોલિયમ ભંડારથી ઓઇલ છોડવાની પહેલને સમર્થન આપવા માટે, બજારમાં ઉતાર-ચઢાવને ઓછો કરવા અને ક્રૂડ ઓઈલના ભાવમાં વધારાને રોકવા માટે પણ પ્રતિબદ્ધ છે.
50 લાખ બેરલ ઓઇલ રજૂ કરવા પર સહમતિ
આંતરરાષ્ટ્રીય સ્તર પર ઓઇલની કિંમતોમાં ઘટાડો લાવવા માટે ભારતે અમેરિકા, જાપાન અને અન્ય મોટી અર્થવ્યવસ્થાઓ સાથે મળીને ગયા વર્ષે નવેમ્બરમાં પોતાના આપાતકાલીન ભંડારમાંથી 50 લાખ બેરલ ક્રૂડ ઓઇલ છોડવા માટે સંમત થયા હતાં. ત્યારે ક્રૂડ ઓઇલની આંતરરાષ્ટ્રીય કિંમત 82-84 ડૉલર પ્રતિ બેરલ હતું. નિવેદનમાં એવું નથી કહેવામાં આવ્યું કે, ભારત ક્રૂડ ઓઇલ કેટલી માત્રામાં આપશે.
રશિયા પ્રતિ દિન 50 લાખ બેરલ ક્રૂડ ઓઇલ વેચે છે
રશિયા વિશ્વનું સૌથી મોટો ઓઇલ નિકાસકાર અને ત્રીજો સૌથી મોટો ઉત્પાદક દેશ છે. રશિયાથી દરરોજ 50 લાખ બેરલ ક્રૂડ ઓઇલની નિકાસ થાય છે. યુરોપની 48 અને એશિયાઇ દેશોની 42 ટકા નિર્ભરતા રશિયા પર જ છે. એટલાં માટે રશિયાથી આયાતને નજરઅંદાજ ના કરી શકાય. હાલમાં વિશ્વનો સૌથી મોટો ઓઇલ નિકાસકાર દેશ સાઉદી પણ રશિયા સાથે ઊભો જોવા મળી રહ્યો છે.