ભારત-ઈંગ્લેન્ડ વચ્ચે ચાર ટેસ્ટ મેચની શ્રેણીનો પહેલો મુકાબલો આગામી તારીખ 5 ફેબ્રુઆરીથી ચેન્નઈના ચેપક સ્ટેડિયમમાં શરૂ થઈ રહ્યો છે.
ભારત-ઈંગ્લેન્ડ વચ્ચે ચાર ટેસ્ટ મેચની શ્રેણીનો થશે પ્રારંભ
ઈંગ્લેન્ડના ૧૨ બેટ્સમેનની ૭૨ ઇનિંગ્સમાં માત્ર પાંચ સદી
એશિયામાં પૂજારા સૌથી સફળ બેટ્સમેન
ઓસ્ટ્રેલિયાના દિગ્ગજ ઈયાન ચેપલનું કહેવું છે કે આ શ્રેણીમાં જે ટીમના ટોપ ઓર્ડર બેટ્સમેન સારું પ્રદર્શન કરશે તે ટીમની જીતની શક્યતાઓ વધુ રહેશે. ક્રિકેટમાં નંબર એકથી લઈને નંબર ત્રણ સુધીના બેટ્સમેનને ટોપ ઓર્ડર બેટ્સમેન માનવામાં આવે છે. છેલ્લાં પાંચ વર્ષમાં એશિયન પરિસ્થિતિમાં ભારત અને ઈંગ્લેન્ડના ટોપ ઓર્ડર બેટ્સમેનોએ કેવું પ્રદર્શન કર્યું છે તેના પર એક નજર કરીએ.
ઈંગ્લેન્ડના ૧૨ બેટ્સમેનની ૭૨ ઇનિંગ્સમાં માત્ર પાંચ સદીઃ
ઈંગ્લેન્ડના ટોપ-થ્રી બેટ્સમેન છેલ્લાં પાંચ વર્ષમાં ભારત, બાંગ્લાદેશ, પાકિસ્તાન, યુએઈ અને શ્રીલંકાની ધરતી પર કંઈ ખાસ પ્રદર્શન કરી શક્યા નથી. જાન્યુઆરી-૨૦૧૬થી ઈંગ્લેન્ડે એશિયામાં ૧૨ ટેસ્ટ મેચ રમી છે. આ મેચમાં ઈંગ્લેન્ડના ટોપ-થ્રી પોઝિશન માટે અલગ અલગ ૧૨ ખેલાડીને અજમાવ્યા છે. આ બેટ્સમેને કુલ ૭૨ ઇનિંગ્સમાં માત્ર પાંચ સદીની મદદથી ૨૨૪૩ રન બનાવ્યા છે. આમ, તેમની સરેરાશ માત્ર ૩૨.૫૦ની રહી છે. આમાંની બે સદી કીટન જેનિંગ્સે ફટકારી છે, જોકે તે હાલ ભારતના પ્રવાસે આવેલી ઈંગ્લેન્ડની ટીમનો હિસ્સો નથી.
આ ઉપરાંત એલિસ્ટર કૂક અને જોની બેરિસ્ટોએ એક-એક સદી ફટકારી છે. કૂક તો નિવૃત્ત થઈ ચૂક્યો છે, જ્યારે બેરિસ્ટો શરૂઆતની બે ટેસ્ટમાં રમવાનો નથી. એક સદી જો રૂટે ફટકારી છે. રૂટ હવે મિડલ ઓર્ડર (નંબર ચાર) પર બેટિંગ કરે છે.
એશિયામાં ભારતનો ટોપ ઓર્ડર ખતરનાક છેઃ
ભારતીય ટીમ ઘરેલુ પરિસ્થિતિઓમાં દુનિયાની સૌથી શક્તિશાળી ટીમોમાંની એક છે. ભારતના ટોપ ઓર્ડર (એકથી ત્રણ નંબર)નો રેકોર્ડ પણ એશિયન પરિસ્થિતિઓમાં શાનદાર છે. છેલ્લાં પાંચ વર્ષમાં ભારતે કુલ ૨૭ ટેસ્ટ મેચ રમી છે. આમાં ભારતના ટોપ-થ્રી બેટ્સમેનોએ ૫૭.૫૮ની સરેરાશથી ૬૮૫૩ રન બનાવ્યા છે, જેમાં ૨૪ સદી સામેલ છે.
એશિયામાં પૂજારા સૌથી સફળ બેટ્સમેનઃ
છેલ્લાં પાંચ વર્ષમાં એશિયામાં સૌથી વધુ સદી ફટકારનારાે ટોપ ઓર્ડર ભારતીય બેટ્સમેન ચેતેશ્વર પૂજારા છે. તેણે તા. ૧ જાન્યુઆરી-૨૦૧૬થી અત્યાર સુધી એશિયામાં ૨૬ ટેસ્ટ મેચમાં સાત સદી ફટકારી છે. મુરલી વિજયે છ, શિખર ધવન, મયંક અગ્રવાલ અને રોહિત શર્માએ ત્રણ-ત્રણ સદી ફટકારી છે. પૃથ્વી શો અને લોકેશ રાહુલના નામે એક-એક સદી નોંધાયેલી છે.
ખાસ વાત એ છે કે ભારતે છેલ્લાં પાંચ વર્ષમાં એશિયામાં ઈંગ્લેન્ડની સરખામણીએ બે ગણી વધુ ટેસ્ટ રમી હોવા છતાં ટોપ-થ્રી પોઝિશન માટે ૧૧ બેટ્સમેનને જ અજમાવ્યા છે, જ્યારે ઈંગ્લેન્ડે ૧૨ બેટ્સમેન અજમાવ્યા છે.
સિબલી-ક્રાઉલી-બર્ન્સ V/s રોહિત-શુભમન-પૂજારાઃ
ઈંગ્લેન્ડના શ્રીલંકા પ્રવાસ દરમિયાનને નજરમાં રાખવામાં આવે તો ડોમ સિબલી, જેક ક્રાઉલી અને રોરી બર્ન્સ પ્રથમ ટેસ્ટ માટે ઈંગ્લેન્ડના ટોપ-થ્રી બેટ્સમેન હોઈ શકે છે, જ્યારે રોહિત શર્મા, શુભમન ગિલ અને ચેતેશ્વર પૂજારા ભારતના ટોપ-થ્રી બેટ્સમેન હોઈ શકે છે. સિબલી, ક્રાઉલી અને બર્ન્સ આ પહેલાં ક્યારેય ભારતની ધરતી પર ટેસ્ટ મેચ રમ્યા નથી. આથી જો ઈંગ્લેન્ડનું ટીમ મેનેજમેન્ટ મોઇન અલી, જોસ બટલર અથવા બેન સ્ટોક્સમાંથી કોઈને એકને ટોપ ઓર્ડરમાં પ્રમોટ કરી દે તો કોઈને આશ્ચર્ય નહીં થાય.