આશાવાદ / ભારત ઝડપથી આગળ વધતી મુખ્ય અર્થવ્યવસ્થા, આર્થિક વિકાસ દર 6.4 ટકા રહેવાનો અંદાજ- સંયુક્ત રાષ્ટ્રસંઘ

• સંયુક્ત રાષ્ટ્રસંઘના રિપોર્ટમાં દાવો
• ભારત ઝડપથી વધતી મુખ્ય અર્થવ્યવસ્થા
• 2020માં ભારતનો આર્થિક વિકાસ દર 6.4 ટકા રહેવાની આશા
• 2023માં ભારતની આર્થિક સ્થિતિ સારી બનશે 

સંયુક્ત રાષ્ટ્રના એક અહેવાલમાં જણાવાયું છે કે ભારત ઝડપથી વધતી મુખ્ય અર્થવ્યવસ્થા ધરાવતો દેશ બની રહ્યો છે. રશિયા અને યુક્રેન વચ્ચે ચાલી રહેલા સંઘર્ષને કારણે વૈશ્વિક અર્થતંત્રને અસર થઈ રહી છે, ત્યારે ભારતનો જીડીપી ગ્રોથ પણ 2022માં ધીમો પડીને 6.4 ટકા રહેવાનો અંદાજ છે, જે ગયા વર્ષે 8.8 ટકા હતો. આ હોવા છતાં, ભારત સૌથી ઝડપથી વિકસતી મોટી અર્થવ્યવસ્થા છે.

વૈશ્વિક અર્થતંત્ર 2022 માં 3.1 ટકાના દરે વૃદ્ધિ પામશે 
અહેવાલમાં કહેવામાં આવ્યું છે કે ઊંચા ફુગાવાના દબાણ અને કામદારોના બજારમાં અસમાન પુન:પ્રાપ્તિ ખાનગી વપરાશ અને રોકાણને અસર કરી રહી છે. સંયુક્ત રાષ્ટ્રના આર્થિક અને સામાજિક બાબતોના વિભાગે બુધવારે 'વર્લ્ડ ઇકોનોમિક સિચ્યુએશન એન્ડ પ્રોસ્પેક્ટ્સ (ડબલ્યુઇએસપી)' રિપોર્ટ જાહેર કર્યો હતો, જેમાં કહેવામાં આવ્યું હતું કે વૈશ્વિક અર્થતંત્ર 2022 માં 3.1 ટકાના દરે વૃદ્ધિ પામશે તેવું અનુમાન છે, જે જાન્યુઆરી 2022 માં જાહેર કરવામાં આવેલા 4.0 ટકાના વૃદ્ધિના અંદાજ કરતા ઓછું છે. વૈશ્વિક ફુગાવો પણ 2022માં 6.7 ટકાના દરે વધવાનું અનુમાન છે, જે 2010થી 2020 સુધીમાં સરેરાશ 2.9 ટકાની સરખામણીએ બમણું છે. ખાદ્ય ચીજો અને ઊર્જાના ભાવ પણ વધી રહ્યા છે.

નાણાકીય વર્ષ 2023 માટે ભારતના વિકાસ દરનું અનુમાન 6 ટકા 
રિપોર્ટમાં એવું પણ કહેવામાં આવ્યું છે કે, "ભારતની અર્થવ્યવસ્થા 2022 માં 6.4 ટકાના દરે વૃદ્ધિ પામશે તેવું અનુમાન છે, જે 2021 ના 8.8 ટકાના વિકાસ દર કરતા ઓછું છે." નાણાકીય વર્ષ 2023 માટે ભારતનો વિકાસ દર 6 ટકા છે.

2023માં ભારતની આર્થિક સ્થિતિ સારી બનશે 
યુએનના ડિપાર્ટમેન્ટ ઓફ ઇકોનોમિક એન્ડ સોશિયલ અફેર્સમાં ઇકોનોમિક એનાલિસિસ એન્ડ પોલિસી ડિવિઝનમાં ગ્લોબલ ઇકોનોમિક મોનિટરિંગ બ્રાન્ચના વડા હામિદ રશીદે જણાવ્યું હતું કે પૂર્વ એશિયા અને દક્ષિણ એશિયાને બાદ કરતાં વિશ્વના લગભગ તમામ વિસ્તારો ઊંચા ફુગાવાથી પ્રભાવિત છે. રાશિદે કહ્યું કે ભારત આ મામલે ઘણી સારી સ્થિતિમાં છે. "ભારતનું આર્થિક પુનરુત્થાન નજીકના ભવિષ્યમાં એટલે કે આવતા વર્ષે મજબૂત થવાની અપેક્ષા છે. જો કે, જોખમ હજી સમાપ્ત થયું નથી.  રિપોર્ટમાં કહેવામાં આવ્યું છે કે બાંગ્લાદેશ, ભારત, પાકિસ્તાન અને શ્રીલંકામાં એગ્રી સેક્ટરને ફર્ટિલાઇઝર સહિત એગ્રી પ્રોડક્ટ્સના ઊંચા ભાવ અને તેની અછતને કારણે અસર થશે.