ટીમ ઇન્ડિયાએ પ્રથમ ટેસ્ટ ગુમાવ્યા બાદ મેલબોર્નમાં શાનદાર વાપસી કરી કાંગારું ટીમને આઠ વિકેટે પરાજય આપ્યો. આ શ્રેણી આઈસીસી ટેસ્ટ ચેમ્પિયનશિપનો હિસ્સો છે. ભારતની ધમાકેદાર જીત બાદ પોઇન્ટ ટેબલમાં મોટો ફેરફાર થયો છે. ભારતીય ટીમ હાલ પોઇન્ટ ટેબલમાં બીજા સ્થાને છે.
ભારત સામે પરાજય બાદ ઓસ્ટ્રેલિયાની ટીમને નુકસાન થયું
ભારત બીજા અને ન્યૂઝીલેન્ડ ત્રીજા સ્થાને
ન્યૂઝીલેન્ડ જીતશે તો ફરી પોઈન્ટ ટેબલમાં ફેરફાર થઈ શકે
ભારત સામે પરાજય બાદ ઓસ્ટ્રેલિયાની ટીમને નુકસાન થયું છે, પરંતુ તે હજુય પ્રથમ સ્થાને છે. ભારત બીજા અને ન્યૂઝીલેન્ડ ત્રીજા સ્થાને છે. હાલ પાકિસ્તાન અને ન્યૂઝીલેન્ડ વચ્ચે પણ ટેસ્ટ મેચ ચાલી રહી છે. જો તે મેચમાં ન્યૂઝીલેન્ડ જીતશે તો ફરી પોઈન્ટ ટેબલમાં ફેરફાર થઈ શકે છે. હાલ પ્રથમ સ્થાને રહેલી ઓસ્ટ્રેલિયન ટીમના ખાતામાં ૭૭ ટકા જીત નોંધાયેલી છે, જ્યારે ભારતીય ટીમની જીતની ટકાવારી હવે ૭૨ કરી લીધી છે. ન્યૂઝીલેન્ડની જીતની ટકાવારી ૬૨ છે અને તે ત્રીજા સ્થાન પર છે. ૬૦ ટકા જીત સાથે ઈંગ્લેન્ડ ચોથા અને ૩૯ ટકા જીત સાથે પાકિસ્તાન પાંચમા સ્થાને છે.
કોરોના મહામારીના કારણે ટેસ્ટ ચેમ્પિયનશિપના ઘણા મુકાબલા સ્થગિત થયા હતા. તેના કારણે ટીમના રેન્કિંગને જીત બાદ મેળવેલા પોઈન્ટના સ્થાને જીત અને હારની ટકાવારીના આધારે નક્કી કરવાનો નિર્ણય લેવાયો છે.
ક્રિકેટ ઓસ્ટ્રેલિયા (સીએ)એ ભારત સામેની ત્રીજી ટેસ્ટ મેચનું આયોજન સિડનીમાં જ કરવાનો નિર્ણય કર્યો છે. આ સાથે જ એ અટકળો પર પૂર્ણવિરામ મુકાઈ ગયું કે કોરોનાના કારણે સિડનીમાં ટેસ્ટ રમાશે કે કેમ? તા. ૭ જાન્યુઆરીથી ત્રીજી ટેસ્ટ મેચ શરૂ થવાની છે.
ક્રિસમસ પહેલાં સિડનીની ઉત્તર બાજુએ કોરોનાના કેસમાં આવેલા ઉછાળા બાદ મેલબોર્નને ત્રીજી ટેસ્ટ મેચ માટે સ્ટેન્ડબાય રાખવામાં આવ્યું હતું. સીએના કાર્યકારી અધ્યક્ષ નિક હોકલેએ કહ્યું, ''કોરોના મહામારી વચ્ચે ઘણા પડકારો છતાં મને એ વાત જણાવતાં આનંદ થાય છે કે ક્રિકેટ ઓસ્ટ્રેલિયા નિર્ધારિત કાર્યક્રમ અનુસાર જ આગળ વધશે. ચોથી અને અંતિમ ટેસ્ટ ક્વીન્સલેન્ડના બ્રિસબેનમાં રમાશે.''
હોકલેએ જણાવ્યું, ''સિડનીમાં સ્વાસ્થ્યની સ્થિતિ અંગે તાજેતરમાં અમે નિયમિત રીતે ઘણી બેઠકો કરી અને દેશભરમાં સરહદ પ્રતિબંધો અંગે પણ ચર્ચા કરી. અમે નિર્ણય કર્યો છે કે નવા વર્ષની ટેસ્ટ સિડની ક્રિકેટ મેદાન પર જ રમાશે. અમને િવશ્વાસ છે કે આ મેચ અને બ્રિસબેનમાં રમાનારી ચોથી ટેસ્ટ- બંને સુરક્ષિત અને સફળ રીતે રમાશે. અમે ખેલાડીઓ, અધિકારીઓ, સ્ટાફ અને પ્રેક્ષકોની સુરક્ષાને ટોચની પ્રાથમિકતા આપીશું.''
હોકલેએ અંતમાં કહ્યું, ''હું વિક્ટોરિયાની સરકાર અને મેલબોર્ન ક્રિકેટ ક્લબને શાનદાર બોક્સિંગ ડે ટેસ્ટનું આયોજન કરવા માટે શુભેચ્છા પાઠવું છું.'' જ્યારે ઓસ્ટ્રેલિયાના ભૂતપૂર્વ ફાસ્ટ બોલર ગ્લેન મેકગ્રાએ કહ્યું, ''ત્રીજી ટેસ્ટ સિડનીમાં જ રમાવાની હોવાથી હું ખુશ છું. સિડની પિન્ક ટેસ્ટનું હોમ ગ્રાઉન્ડ છે. છેલ્લાં ૧૨ વર્ષથી અહીંના પ્રેક્ષકોનો અમે ખૂબ જ સપોર્ટ મળ્યો છે.''