નિર્ણય / હવે લાયસન્સ-વાહન સંબંધિત સેવા માટે નહી ખાવા પડે RTOમાં ધક્કા, રાજ્ય સરકારે લીધો મહત્વનો નિર્ણય

• ગુજરાતમાં વાહનવ્યવહારે ક્ષેત્રે ફેસલેસ સુવિધા
• 80 ટકા સેવાઓ ઘરેબેઠાં ઓનલાઈન ઉપલબ્ધ કરાશે
• હવે આરટીઓ કચેરીના ધક્કા ખાવા નહીં પડે 

ડિજિટલ ઇન્ડિયાના સ્વપ્નને સાકાર કરવા માટે ગુજરાત તમામ ક્ષેત્રે અગ્રેસર રહ્યું છે. ગુજરાત સરકાર દ્વારા વિવિધ ડિજિટલ સેવાઓ થકી પારદર્શી અને પેપરલેસ ગવર્નન્સનું ઉદાહરણ પુરુ પાડે છે. ત્યારે વાહનવ્યવહાર ક્ષેત્રે આવતી તમામ સેવાઓ પૈકી 80 ટકા સેવાઓ હવે ઓનલાઇન ફેસલેસ પુરી પાડવામાં આવશે. જી હા, આરટીઓ કચેરી ખાતે હવે લોકોએ ધક્કા ખાવા નહી પડે. ઘરે બેઠા જ નાગરિકોના 50 ટકા પ્રશ્નો સોલ્વ થઇ જશે. જેથી સમય અને સંશાધનની બચત થશે.

લાયસન્સ સંબંધિત સેવાઓ થશે ફેસલેસ

ગુજરાતમાં હવેથી લાયસન્સ સંબંધિત વધુ 12 સેવાઓ અને વાહન સંબંધિત 8 સેવાઓ આધાર E-KYC થકી ફેસલેસ  પુરી પાડવાની કાર્યવાહી શરૂકરવામાં આવશે. જેમાં અરજદાર દ્વારા રજૂ કરેલ આધાર નંબરને આધીન ઓનલાઈન ફી અને દસ્તાવેજો અપલોડ કરી અરજી સબમિટ કરી આરટીઓના ફેસલેસ કાઉન્ટર પરથી અરજદારને સીધી સેવા પુરી પાડવામાં આવશે. જેથી અરજદારને કચેરી ખાતે આવવાનું રહેશે નહી.

‘One Nation One Challan’ ઇ-ચલણ સૉફ્ટવેર

કેન્દ્ર સરકારના માર્ગ અને પરિવહન મંત્રાલય દ્વારા એન્ફોર્સમેન્ટ માટે ‘One Nation One Challan’ અંતર્ગત ઇ-ચલણ સોફટવેર તૈયાર કરવામાં આવ્યું છે. આ સોફ્ટવેર કેન્દ્ર સરકારના વાહન તથા સારથી સોફટવેર સાથે ઇન્ટીગ્રેશન થયેલ હોવાથી રાજ્યની કોઇપણ આરટીઓ કચેરીમાં નોંધાયેલ વાહન અને લાયસન્સ સંબંધિ માહિતી જાણી શકાય છે. અગાઉ મેમો મેન્યુઅલ ધોરણે આપવામાં આવતો હતો તે હવે Point of Sale (POS) મશીન દ્વારા ઓનલાઇન ઇસ્યુ કરવામાં આવે છે અને સ્થળ પર જ માંડવાળની રકમ પણ ઓનલાઇન જ સ્વીકારવામાં આવે છે. 

વાહનોનો ઓનલાઇન ટેક્સ  ભરી શકાશે

આ ઉપરાંત, IT બેઝ્ડ સોલ્યુશન થકી દેશમાં સૌપ્રથમ આંતરરાજ્ય બોર્ડર પરથી ગુજરાતમાં પ્રવેશતા વાહનોમાં વાહનોનો ઓનલાઇન ટેક્સ અને ઓવરડાયમેન્શન ફી સ્વીકારવાની કામગીરી શરૂ કરવામાં આવી છે જેનાથી Ease of Doing Businessમાં વૃદ્ધિ-ટ્રાન્સપોર્ટ સેક્ટરને વધુ ગતિ મળી છે અને આંતરરાજ્ય વાહનો કોઇપણ અડચણ વિના રાજ્યમાં મુસાફરી કરી શકે છે. 

હાલમાં વાહનવ્યહાર ક્ષેત્રે 7 સેવાઓ છે ઘરે બેઠા ઉપલબ્ધ 

ગુજરાતમાં હાલમાં વાહન વ્યવહાર ક્ષેત્રે મહત્વની કુલ 7 સેવાઓ નાગરિકો માટે ઘરે બેઠા ઉપલબ્ધ કરાવવામાં આવે છે.  રાજ્યની વાહન વ્યવહાર કચેરી દ્વારા વર્ષ 2017થી વેબ આધારિત સૉફ્ટવેર વાહન 4.0 અને સારથી 4.0 જેવા ઓનલાઈન પોર્ટલનું અમલીકરણ કરીને નાગરિકોને ઘરેબેઠાં જ દસ્તાવેજો અપલોડ કરવાની અને ઓનલાઈન ફી ભરવા સહિતની સુવિધાઓ પૂરી પાડવામાં આવે છે. જેમાં, વાહન 4.0 પોર્ટલ મારફતે ઇ-એન.ઓ.સી., ઇ-પેમેન્ટ, ઇ-ઓકશન અને ઇ-ડેટા થકી વાહનનો નોંધણી નંબર, ફી, એપ્રુવલ, ઓનલાઇન અરજીનું સ્ટેટસ તેમજ તેની SMS દ્વારા જાણ જેવી સુવિધાઓ નાગરિકોને મળી રહી છે. જ્યારે સારથી ૪.૦ની મદદથી ડ્રાઇવીંગ લાયસન્સ મેળવવાની પ્રક્રિયા ઝડપી અને પારદર્શક બની છે. ડિજિટલ ઇન્ડિયા પહેલ અંતર્ગત આ પોર્ટલ મારફતે આરટીઓ દ્વારા પૂરી પાડવામાં આવતી સેવાઓની જુદી જુદી ફી-ટેક્સ ઓનલાઇન ભરી શકાય છે. 

લર્નિંગ લાયસન્સની સુવિધા ઘર આંગણે

રાજ્યમાં અગાઉ લર્નિંગ લાયસન્સ આર.ટી.ઓ. કચેરી ખાતેથી ઇસ્યુ કરવામાં આવતા હતા. પરંતુ નાગરિકોને ઘરઆંગણે સુવિધા ઉપલબ્ધ થાય તે હેતુથી શિખાઉ લાયસન્સની કામગીરી વર્ષ 2019 થી રાજ્યભરની 221 આઇ.ટી.આઇ. તથા 10 પોલીટેકનીક કક્ષાએથી શરૂ કરવામાં આવી છે. જેના પરિણામે વર્ષે અંદાજે 8 લાખ લોકોને તાલુકા કક્ષાએ જ સરળતાથી લર્નિંગ લાયસન્સની સેવાનો લાભ મળી રહ્યો છે.