ગાંધીનગર / ઘરનું ઘર થશે સસ્તું, ગુજરાત સરકારની મહત્વની જાહેરાત

• ગાયહેડ-ક્રેડાઇના 15મા પ્રોપર્ટી શો નું વર્ચ્યુએલ ઉદ્ઘાટન
• CM રૂપાણીએ ગાંધીનગરથી કર્યું વર્ચ્યુઅલ ઉદ્ઘાટન
• ખેતીની જમીનના ઉપયોગની કરી જાહેરાત

ઉલ્લેખનીય છે કે, મુખ્યમંત્રીએ ગાયહેડ-ક્રેડાઇ આયોજીત 15માં પ્રોપર્ટી શોનું વર્ચ્યુઅલ ઉદ્ઘાટન ગાંધીનગરથી વિડીયો કોન્ફરન્સ દ્વારા કર્યુ હતું. કોરોના સંક્રમણના આ કપરાકાળમાં દેશભરમાં આવો પ્રથમ વર્ચ્યુએલ પ્રોપર્ટી શો ક્રેડાઇ દ્વારા તા.૧૭ થી રપ ઓકટોબર દરમ્યાન યોજાઇ રહ્યો છે.  

‘ઘરે બેઠા ઘર મેળવો’ના ઉદેશ્યથી કરાયું છે આયોજન 

CM Shri @vijayrupanibjp makes important announcements to boost affordable housing sector in the state. pic.twitter.com/mKxNTnIXem

— CMO Gujarat (@CMOGuj) October 17, 2020

‘ઘરે બેઠા ઘર મેળવો’ના ઉદેશ્ય સાથેના આ પ્રોપર્ટી શો માં લોકો પોતાના અનુકૂળ સમયે ઓનલાઇનથી સહભાગી થઇ શકે તેવા આ અભિનવ પ્રયોગને મુખ્યમંત્રીએ બિરદાવ્યો હતો. આ સાથે જ મુખ્યમંત્રીએ કોરોનાની આપત્તિને અવસરમાં પલટવાની ખૂમારી ગુજરાતે દાખવીને ન ઝૂકના હૈ, ન રૂકના હૈ ના મંત્ર સાથે વિકાસની આગેકૂચ જારી રાખી છે તેની ભૂમિકા આપી હતી. 

રાજ્યમાં લોકોના ઘરના ઘરનું સપનું સાકાર થાય

નોંધનીય છે કે, CM વિજયભાઇ રૂપાણીએ કહ્યું કે, રાજ્યમાં લોકોના ઘરના ઘરનું સપનું સાકાર થાય, સુવિધાસભર અને ગુણવત્તાયુકત આવાસ મળે તે માટે ઇઝ ઓફ ડૂઇંગ બિઝનેસની પરિપાટીએ ઇઝ ઓફ લિવીંગને પણ સરકારે મહત્વ આપ્યું છે. વિજયભાઇ રૂપાણીએ જણાવ્યું કે, ગુજરાત રહેવાલાયક, માણવાલાયક બને તેમજ પ્રદૂષણમુકત રહે અને પ્રાથમિક આવશ્યકતાઓ પણ મળતી રહે તે માટે રાજ્ય સરકાર પ્રતિબદ્ધ છે. 

તો આ સાથે જ મુખ્યમંત્રીએ ઉમેર્યુ હતું કે, પારદર્શીતા અને ઇમાનદારીથી ઝડપી નિર્ણયો કરવા સાથે GDCRના નિયમો સહિતની આંટીઘૂંટીઓ દૂર કરી સરળીકરણ અને મોકળાશ આ સરકારે કરી આપી છે. 

નિયમો-કાયદાઓ પ્રજાને ટેન્શન આપનારા નહિં પરંતુ શાંતિ, મોકળાશ આપનારા બને તેવો અભિગમ અપનાવ્યો છે એમ પણ તેમણે ઉમેર્યુ હતું. મુખ્યમંત્રીશ્રીએ પ્રધાનમંત્રી શ્રી નરેન્દ્રભાઇ મોદીએ ર૦રર સુધીમાં હરેક વ્યકિતને ઘરનું ઘર આપવાની જે ખેવના રાખી છે તેમાં એફોર્ડેબલ હાઉસીંગ સેકટર દ્વારા ગુજરાત લીડ લેશે તેવી નેમ વ્યકત કરી હતી.
વિજયભાઇ રૂપાણીએ આવા એફોર્ડેબલ હાઉસીંગ સેકટરને વધુ પ્રોત્સાહન અને મદદ મળે તે માટે આ અવસરે કેટલીક જાહેરાત પણ કરી હતી. 

ખેતીની જમીનને અપાશે પરવાનગી 

મુખ્યમંત્રીએ એવી પણ જાહેરાત કરી કે, એફોર્ડેબલ હાઉસીંગ નિર્માણ માટે સરળતાએ વધુ જમીન ઉપલબ્ધ થાય અને મોટાપાયે આવા આવસો બનાવી ઘરના ઘરનું સામાન્ય માનવીનું સપનું પાર પડે તે માટે ખેતીની જમીન કાયદા ૬૩ AAA હેઠળ એફોર્ડેબલ હાઉસીંગ માટે જમીનોની પરવાનગી સરકાર આપશે. 

FSI સમગ્ર રાજ્યમાં એક સમાન પદ્ધતિએ લેવાશે 

વિજયભાઇ રૂપાણીએ બાંધકામ ક્ષેત્રને વેગ આપવા અન્ય એક જાહેરાત કરતાં કહ્યું કે, હાલ ચાર્જેબલ FSI બાંધકામ મંજૂરી વખતે લેવામાં આવે છે. પરંતુ આવી ચાર્જેબલ FSI વાળો બાંધકામ ભાગ પાછળથી કરવાનો થતો હોઇ મુખ્યમંત્રીએ બાંધકામ ઉદ્યોગની રજૂઆતો પ્રત્યે સંવેદના દાખવી આ FSI સમગ્ર રાજ્યમાં એક સમાન પદ્ધતિએ લેવામાં આવશે તેમ જણાવ્યું હતું.