બિપોરજોય વાવાઝોડું / 11 નંબરનું સિગ્નલ એટલે પરિસ્થિતિ અત્યંત ભયજનક, બે નંબરનું સિગ્નલ હોય એટલે થઈ જવું ઍલર્ટ: જાણો ગુજરાતનાં બંદર પર લાગતાં સિગ્નલના અર્થ

• બિપોરજોય વાવાઝોડાને લઈ મહત્વના સમાચાર
• ગુજરાતને બિપોરજોય વાવાઝોડાથી કોઈ ખતરો નથી
• ગુજરાતના બંદરો પર હાલ 2 નંબરનું સિગ્નલ લગાવી દેવાયું
• આજે જાણીશું ગુજરાતનાં બંદર પર લાગતાં સિગ્નલના અર્થ

બિપોરજોય વાવાઝોડાને લઈ મહત્વના સમાચાર સામે આવ્યા છે. વાત જાણે એમ છે કે, હાલ મહારાષ્ટ્ર અને ગુજરાતને બિપોરજોય વાવાઝોડાથી કોઈ ખતરો નથી. આ સાથે આ બિપોરજોય વાવાઝોડું ઉત્તર અને પશ્ચિમ દિશાથી ઓમાન તરફ આગળ વધશે. આ તરફ વાવાઝોડું આગળ જતા આવતીકાલથી 2 દિવસ ભારે હવા ફૂંકાશે. આ તરફ હવે ગુજરાતના બંદરો પર હાલ 2 નંબરનું સિગ્નલ લગાવી દેવાયું છે. 

ગુજરાતમાં જ્યારે જ્યારે કોઈ વાવાઝોડાનો ખતરો હોય ત્યારે બંદરો ઉપર અલગ-અલગ નંબરના સિગ્નલ લગાવવામાં આવતા હોય છે. જોકે હાલ બિપોરજોય વાવાઝોડાને લઈ ગુજરાતના તમામ બંદરો પર 2 નંબરનું સિગ્નલ લગાવી દેવાઈ છે. આજે આપણે જાણીશું બંદર ઉપર લગાવવામાં આવેલ અલગ-અલગ સિગ્નલો વિશે. 

બંદર ઉપર લગવામાં આવેલ સિગ્નલ શું સૂચવે છે

• 1 નંબરનું સિગ્નલ વાવાઝોડાની ચેતવણી આપતું હોય છે.
• 2 નંબરનું સિગ્નલ વાવાઝોડું સક્રિય થતાં માછીમારોને દરિયામાં વાવાઝોડાનો સામનો કરવો પડી શકે છે તે સૂચિત કરે છે
• 3 નંબરનું સિગ્નલ સપાટીવાળી હવાને પગલે બંદર પર ભય દેખાડે છે.
• 4 નંબરનું સિગ્નલ બંદર ભયમાં છે એવું પરંતુ સાવચેતીનાં પગલા લેવા પડે એટલો ભય જણાઇ રહ્યો નથી.
• 5 નંબરનું સિગ્નલ સામાન્ય વાવાઝોડું દક્ષિણના કિનારા ઓળંગી બંદરમાં ભારે હવા ફૂંકાવાનો સંકેત આપે છે.
• 6 નંબરનું સિગ્નલ સામાન્ય વાવાઝોડું ઉત્તરના કિનારા ઓળંગી બંદરમાં ભારે હવાના અનુભવનો સંકેત આપે છે.
• 7 નંબરનું સિગ્નલ સામાન્ય વાવાઝોડું બંદર ઉપરથી પસાર થાય અને ભારે તોફાની પવન ચાલી શકે છે.
• 8 નંબરનું સિગ્નલ ભારે વાવાઝોડું બંદરને ક્રોસ કરી શકે જેથી તોફાની હવાના સંકેતો આપે છે.
• 9 નંબરનું સિગ્નલ જોરદાર વાવાઝોડું ઉત્તર દિશાથી કિનારો ક્રોસ કરીને બંદર ઉપર તોફાની હવાનો અનુભવ કરાવે ત્યારે લગાડવામાં આવે છે
• 10-નંબરનું સિગ્નલ ભારે જોરવાળું વાવાઝોડું બંદરની ઉપર થઈને પસાર થવાની શક્યતા છે. આથી બંદરને ભારે તોફાની હવાનો અનુભવ થવાની શક્યતા છે
• 11-નંબરનું સિગ્નલ ખુબ ખરાબ હવામાનનો અનુભવ, અત્યંત ભયજનક ગણાય.