બનાસકાંઠા / હેવાન પિતાએ માસૂમ બાળકીને કૂવામાં પધરાવી દીધી, ગુજરાતમાં સામે આવ્યો ચોંકાવનારો કિસ્સો 

• ગુજરાતમાં સામે આવ્યો  ચોંકાવનાર કિસ્સો 
• પત્ની પિયર જતી રહેતા પિતાએ બાળકીને ફેંકી કૂવામાં   
• બહેન બનેવીએ બાળકીને બહાર કાઢી હોસ્પિટલ ખસેડી 
   

બનાસકાંઠાના પાલનપુરમાં હ્યદય હચમચાવી નાખે એવી ઘટના સામે આવી છે, પાલનપુરના ધાણધા ગામે પત્ની રિસાઈને પિયર જતી રહેતા પિતાએ 12 માસની નાની બાળકીને કૂવામાં ફેંકી દેતા ખળભળાટ મચી ગયો છે જો કે બાળકીને સદનસીબે બચાવી લેવામાં આવી હતી.

પિતાએ માસૂમ બાળકીને કૂવામાં ફેંકી

ધાણધા ગામે પતિ પત્ની ઘરકંકાસના લીધે 12 માસની બાળકીનો ભોગ લેવાનો પ્રયાસ કરાયો હતો. પતિ પત્ની વચ્ચે ઝગડો થતા પતિએ આવેશમાં આવીને પોતાની જ બાળકીને કૂવામાં ફેંકી દીધી હતી જોકે બહેન બનેવીએ બાળકીને કૂવામાંથી બહાર કાઢી તાત્કાલિક સારવાર અર્થે લઈ ગયા હતા જેથી બાળકીનો આબાદ બચાવ થયો હતો જે બાદ પત્નીને સમગ્ર મામલાની જાણ થતા પત્નીએ પતિ રમેશ ચૌહાણ સામે ફરિયાદ નોંધાવી છે જે બાદ પોલીસે પણ આગળની તપાસ હાથ ધરી છે. 

ગુજરાતમાં વધી રહ્યા છે હત્યાના કિસ્સા 

મહત્વનું છે કે આ પહેલા અરવલ્લીમાં એવો જ એક કિસ્સો સામે આવ્યો હતો જેમાં ઘરકંકાસમાં પિતાએ જ ત્રણ બાળકોને વૈડી ડેમમાં પધરાવી દીધા હતા બાદમાં પોતે પણ ઝાડ પર લટકીને આપઘાતનો પ્રયાસ કર્યો હતો જોકે પતિને બચાવી લેવાયો હતો, ત્યારે ફરી એવો જ કિસ્સો સામે આવ્યો છે જેમાં પતિએ માસૂમ બાળકીને કૂવામાં પધરાવી દીતા સમગ્ર વિસ્તારમાં અરેરાટી વ્યાપી ગઈ છે. જોકે બાળકીનો આબાદ બચાવ કરાયો છે અને સમગ્ર મામલે પોલીસે આગળની કાર્યવાહી હાથ ધરી છે.