શહેરના વટવા વિસ્તારમાં રહેતી એક પરિણીતાએ પતિ અને સાસરીના ત્રાસથી બ્લીચિંગ પીને આત્મહત્યા કરવાની કોશિશ કરતાં મામલો પોલીસ સ્ટેશન સુધી પહોંચ્યો છે. પરિણીતાએ આત્મહત્યાની કોશિશ કરવા પાછળનું કારણ એટલું જ હતું કે તેનો પતિ રૂપિયા કમાવવા માટે તેની પાસે આઇવીએફ સેન્ટરમાં સ્ત્રી બીજ ડોનેટ કરાવતો હતો અને મારપીટ પણ કરતો હતો.
જુહાપુરા વિસ્તારમાં આવેલ દાનીશનગરમાં રહેતી સનોફરબાનું હુસૈનખાન પઠાણે વેજલપુર પોલીસ સ્ટેશનમાં પતિ, સાસુ, જેઠ અને કાકા સસરા વિરુદ્ધમાં ડોમેસ્ટિક વાયોલન્સ એક્ટ હેઠળ ફરિયાદ કરી છે. ફરિયાદમાં કરેલા આક્ષેપ પ્રમાણે સનોફરબાનુંનાં લગ્ન ૬ વર્ષ પહેલાં ઇમરાનખાન પઠાણ સાથે થયાં હતાં જેમાં તેણે બે પુત્રીનો જન્મ આપ્યો હતો.
ત્રણ મહિના પહેલાં સનોફરબાનુંએ ઇમરાનખાન પાસે છુટાછેડા લઇ લીધા હતા અને વટવા વિસ્તારમાં આવેલ ઉમા પાર્ક સોસાયટીમાં રહેતા હુસેનખાન પઠાણ સાથે કોર્ટ મેરેજ કરી લીધાં હતાં. સનોફરબાનુએ તેની બે પુત્રી માતાને આપી દીધી હતી અને તે પતિ હુસૈન પઠાણ સાથે શાહઆલમ રહેવા માટે આવી ગઇ હતી.
હુસેન કોઇ કામધંધો કરતો નહીં હોવાથી સનોફરબાનુંને અજમેર લઇ જઇને સ્ત્રી બીજ ડોનેટ કરાવતો હતો. સનોફરબાનુંનાં સ્ત્રી બીજથી જેટલા રૂપિયા મળતા હતા તે હુસેન રાખતો હતો. હુસેનને કોઇ અન્ય યુવતી સાથે પ્રેમસંબંધ હોવાથી તે અવારનવાર સનોફરબાનું સાથે મારપીટ કરતો હતો.
ફરિયાદમાં કરેલા આક્ષેપ પ્રમાણે સનોફરબાનુંં પર નિયત બગાડીને તેનો જેઠ ફઝલખાન પણ તેને કહેતો હતો કે તું મને ખુશ રાખીશ તો તારો પતિ તને સારી રીતે રાખશે. આ સિવાય નાની નાની બાબતે સનોફરબાનુંની સાસુ નાઝિમાબાનું પણ મારઝૂડ કરતી હતી અને કાકા સસરા બાબાખાન પઠાણ પણ ગંદી ગાળો બોલતા હતા.
સાસરીના ત્રાસથી કંટાળીને સનોફરબાનુંએ સાસરીમાં બ્લીચિંગ પીને આત્મહત્યા કરવાની કોશિશ કરી હતી. બ્લીચિંગ પીતાં સનોફરબાનુંની તબિયત ખરાબ થતાં તેને સારવાર માટે હોસ્પિટલમાં ખસેડવામાં આવી હતી. વેજલપુર પોલીસે પતિ હુસૈન, સાસુ નાઝિમાબાનું, જેઠ ફઝલ અને કાકા સસરા બાબખાન વિરુદ્ધમાં ગુનો દાખલ કરીને તપાસ શરૂ કરી છે.