નિયમ / RTO તમારા ઘર સુધી આવીને લગાવી જશે HSRP નંબર પ્લેટ, બસ કરવું પડશે આ કામ

• RTOમાં HSRP નંબર પ્લેટ લગાવવા માટે લાંબી કતાર
• સોસાયટીનાં સભ્યોની એક અરજીથી ઘરબેઠાં લગાવી જશે HSRP નંબર પ્લેટ
• RTOમાં નિર્ધારિત ફી જ ચૂકવવાની રહેશે

સુપ્રીમ કોર્ટના ઓર્ડર પછી દેશભરનાં વાહનોમાં હાઈ સિક્યોરિટી નંબર પ્લેટ (High Security Number Plate) લગાવવાની કામગીરી હાથ ધરવામાં આવી હતી. જો કે વાહનચાલકોમાં હાઈ સિક્યોરિટી નંબર પ્લેટ લગાવવા માટે ઉદાસીનતા જોવા મળી રહી છે. જો કે આવા વાહનચાલકો હાઈ સિક્યો‌િરટી નંબર પ્લેટ લગાવે તે ઉદ્દેશથી અમદાવાદ આરટીઓ કચેરી તેમજ અમદાવાદ ટ્રાફિક વિભાગ દ્વારા સંકલન કરીને ખાસ ડ્રાઈવનું આયોજન કરવામાં આવશે.

એચએસઆરપી લગાવવાની મુદત પૂર્ણ થવા બાબતે અમદાવાદ (Ahmedabad) આરટીઓના એઆરટીઓ એસ.એ. મોજણીદારે કહ્યું કે ૧ સપ્ટેમ્બરથી જે વાહનોમાં હાઈ સિક્યોરિટી નંબર પ્લેટ નહિ હોય તેવાં વાહનોને નિયમ પ્રમાણે દંડ ફટકારવામાં આવી રહ્યો છે. જેમણે પોતાનાં જૂનાં વાહનોમાં આવી એચએસઆરપી લગાવી નથી. તેમના માટે હજુ પણ નંબર પ્લેટ લગાવવા માટે આરટીઓ અમદાવાદ દ્વારા અલગ-અલગ વિસ્તારમાં કેમ્પ યોજવામાં આવશે.

સોસાયટીનાં એક પ્રયાસ માત્રથી ઘેર બેઠાં લગાવી જશે HSRP નંબર પ્લેટ

આ કાર્યક્રમ અંતર્ગત આરટીઓની ટીમ તમારી સોસાયટીમાં આવીને જૂનાં વાહનોમાં જૂની નંબર પ્લેટ બદલીને નવી એચએસઆરપી લગાવી આપશે. તેના માટે સોસાયટીના સભ્યો એકસાથે આરટીઓમાં અરજી કરશે અને જરૂરી પ્રક્રિયા પૂરી કરશે તો ઘરઆંગણે એચએસઆરપી લગાવી અપાશે. આરટીઓના અધિકારીઓનું કહેવું છે કે જેમને નવી નંબર પ્લેટ લગાવવાની બાકી હોય તેવી સોસાયટીઓનાં મેમ્બર્સ ભેગા થઈને આરટીઓમાં અરજીની સાથે ફી આપી દેશે પછી તેમને આપેલી તારીખે આરટીઓથી એક ટીમ જે તે સોસાયટીમાં પણ જશે. જૂની નંબર પ્લેટના બદલે નવી એચએસઆરપી લગાવી આપશે.

HSRP નંબર પ્લેટ માટે નહીં ચૂકવવો પડે કોઇ એક્સ્ટ્રા ચાર્જ

આ માટે બાઈકની રૂ.૧પ૦ તેમજ કારની રૂ.૪પ૦ જે આરટીઓમાં ચાલે છે તે જ ફી આપવી પડશે. તેના સિવાય કોઈ વધારાનો ચાર્જ આપવાનો રહેશે નહીં,  તેના માટે વાહનનો નંબર, એડ્રેસ પ્રૂફ, સેલ્ફ ડેક્લેરેશન ફોર્મ, તૈયાર રાખવાં પડશે. http:/www.hsrpgujarat.com પર ઓલ્ડ ‌વ્હિકલ વિકલ્પ પસંદ કરીને તમામ વિગતો ભરી અને ડોકયુમેન્ટ્સ અપલોડ કરીને આરટીઓમાં જઈને પણ એચએસઆરપી લગાવી શકાય છે.

આરટીઓમાં ટુ ‌વ્હિલરના રૂ.૧૪૦-ડીલરના રૂ.ર૪૯, થ્રી વહીલરના રૂ. ૧૮૦-ડીલરના રૂ.ર૭૦, ફોર વ્હિલરના રૂ.૪૦૦-ડીલરના રૂ.પપ૦, હેવી ‌વિહિકલના રૂ.૪ર૦-ડીલરના રૂ.પ૭૦ ચાર્જ છે, જ્યારે એચએસઆરપી વગર વાહનને દંડના કિસ્સામાં  ટુ વ્હિલરના રૂ.૧૦૦, થ્રી વ્હિલરના રૂ.૩૦૦, ફોર વ્હિલરના રૂ.૪૦૦ અને હેવી  ‌‌વ્હિકલના રૂ.પ૦૦ દંડ વસૂલવામાં આવી રહ્યો છે.