આવ રે વરસાદ...! / ગુજરાતના વરસાદને લઈને અંબાલાલ પટેલની મોટી આગાહી, આ તારીખથી ફરી મેઘાની થશે એન્ટ્રી

• હવામાન નિષ્ણાંતની આગાહી
• રાજ્યમાં ભારે વરસાદની આગાહી
• 13 થી 20 જુલાઈ ભારે વરસાદની આગાહી

11થી 12 જુલાઇ ઉત્તર-મધ્ય ગુજરાત અને સૌરાષ્ટ્રમાં વરસાદ થશે. 13થી 20 જુલાઈ દરમિયાન રાજ્યભરમાં અતિવૃષ્ટિ થશે. 13થી 20 જુલાઈમાં 3થી 15 ઇંચ વરસાદ થવાની સંભાવના છે. તો દક્ષિણ ગુજરાતના દરિયાકાંઠા વિસ્તારમાં ભારે વરસાદની શક્યતા છે. 

ઉત્તર-મધ્ય ગુજરાતમાં 4 ઇંચથી વધુ વરસાદની આગાહી 

ઉત્તર-મધ્ય ગુજરાતમાં 4 ઇંચથી વધુ વરસાદની સંભાવના છે. વડોદરા, આણંદ, અમદાવાદ, ગાંધીનગરમાં ભારે વરસાદની શક્યતા છે. તો મહેસાણા, બનાસકાંઠા, પાટણ, સાબરકાંઠામાં ભારે વરસાદની શક્યતા છે. આ તરફ કચ્છ અને ઉત્તર ગુજરાતમાં સારો વરસાદ થવાની સંભાવના છે. રોકડીયા પાક, ધાન્ય પાકોને વરસાદથી ફાયદો થશે. 

હવામાન વિભાગે પણ કરી છે આગાહી 

રવિવારથી સમગ્ર ગુજરાતમાં વરસાદ પડવાની સંભાવના સેવાઈ રહી છે અષાઢી બીજના દિવસે પણ રાજ્યના અલગ અલગ ભાગોમાં વરસાદ પડી શકે છે. આ તરફ સૌરાષ્ટ્ર. દક્ષિણ ગુજરાત, મધ્યગુજરાતમાં હળવાથી ભારે વરસાદ પડી શકે છે જ્યારે કચ્છ સહિત ઉત્તર ગુજરાતમાં ભારે થી સામાન્ય વરસાદ ખાબકી શકે છે. 

રાજ્યમાં 11 થી 20 જૂલાઈ સુધી વરસાદી વાતાવરણ

હવામાન વિભાગે આગાહી કરતા જણાવ્યું છે કે આગામી 11 જૂલાઈથી 20 જૂલાઈ સુધી રાજ્યમાં વરસાદી વાતાવરણ રહેશે આ દરમિયાન ભારે વરસાદને કારણે નદી નાળાઓમાં પૂર આવે તેવી સ્થિતિ સર્જાઈ શકે છે. હવામાન વિભાગે સૌરાષ્ટ્ર અને દક્ષિણ ગુજરાતમાં પણ સારા વરસાદની સંભાવનાઓ વ્યક્ત કરી છે. 

અરબી સમુદ્રમાં હળવું દબાણ સર્જાશે

આ તરફ 14 જૂલાઈથી 16 જૂલાઈ સુધી અરબી સમુદ્રમાં હળવું દબાણ સર્જાશે તેવું હવામાન વિભાગે જણાવ્યું છે. જેથી દ્રારકાથી જખૌ સુધીના દરિયામાં હળવા દબાણની સંભાવના વ્યક્ત કરાઈ રહી છે ત્યારે ખલાસીઓને એલર્ટ કરાયા છે.

કાગ ડોળે વરસાદની રાહ જોવાઈ રહી છે

મહત્વનું છે વરસાદ પાછો ખેંચાતા ખેડૂતો ચિંતાતૂર બન્યા હતા કેમ કે હજારો હેક્ટરમાં તૈયાર કરેલો પાક પાણી વગર બળી જવાની ભિતિ સેવાઈ રહી હતી પરતું હવે વરસાદની સંભાવના સેવાઈ રહી છે ત્યારે ખેડૂતો કાગ ડોળે વરસાદની રાહ જોઈને બેઠા છે.