બારે મેઘ ખાંગા / ઉત્તર-દક્ષિણ ગુજરાતમાં અંશત: પૂરની સ્થિતિ, અનેક ગામ સંપર્ક વિહોણા

દક્ષિણ ગુજરાતમાં પડેલા ભારે વરસાદને પગલે વલસાડ જિલ્લાની નદીઓમાં પૂરની સ્થિતિ છે. જ્યારે ડાંગમાં 30 ગામ અને વલસાડના 20 હજાર લોકો સંપર્ક વિહોણા થઈ ગયા છે. જ્યારે ઉત્તર ગુજરાતમાં વાવના મોરીખા ગામે પણ 100થી વધુ ઘરોમાં પાણી ફરી વળ્યાં હતાં અને ખેતરોના બંધપાળા તૂટી જતાં ખેતરો અને પાકનું ધોવાણ થયું છે. તેમજ અનેક વિસ્તારોમાં વીજળી પણ ડૂલ થઈ ગઈ છે. આમ ગુજરાત હાલ પૂરની સ્થિતિ તરફ ધસી રહ્યું છે. હવમાન ખાતાની આગાહી મુજબ, જો હજુ 24 કલાક ભારેથી અતિ ભારે વરસાદ પડે તો રાજ્યમાં પૂરની ગંભીર સ્થિતિ ઉભી થઈ શકે તેમ છે.

ગામો સંપર્ક વિહોણા, નદીઓ બે કાંઠે:

અંબિકા ખાપરી, પૂર્ણા અને ગીરા નદીને સાંકળતા સમયાંતરે પાણીમાં ગરક થઈ જતા ઘોડવહળ, સૂપદહાડ, સૂર્યાબરડા, લહાનબરડા, કુમારબંધ, બોરદહાડ, ચીખલદા, સુસરદા, ધૂળચોંડ, ગાયખાસ, ચવડવેલ, ભેંડમાળ, લિંગા, કુંભારીયા, ચૌક્યા, અંજનકુંડ, પાંડવા, ઘોડી, લહાનદબાસ, મોટીદબાસ, કોસંબીયા, ઉગા ચીચપાડા, આમસરવળણ, બોરપાડ, દગડીઆંબા, મલિન, વાઘમાળ, લવાર્યા સહિત 30થી વધુ ગામો સંપર્કવિહોણા બન્યા છે.

ઘરોમાં પાણી ઘુસ્યા:

ભારે વરસાદને પગલે વાવના નીચાણવાળા વિસ્તારો તેમજ મોરીખા અને માડકા ગામના ઘરોમાં પાણી ફરી વળતાં લોકોમાં ભયનો માહોલ છે અને અનેક ગામો પાણીમાં ગરકાવ છે. જ્યારે ખેતરો ટાપુમાં ફેરવાઈ ગયા છે. સરકારે તાત્કાલિક રાહત અને બચાવ કામગીરી શરૂ કરી છે. વાવના માડકા ગામ જવાના માર્ગે આવેલી કેનાલ વરસાદી પાણીના નિકાલની વ્યવસ્થા ના કરાતાં કેનાલો પણ તૂટી ગઈ હતી.

ક્યાં કેટલો વરસાદ:

રાજ્યમાં ગઈ મોડી રાતે પણ સારો એવો વરસાદ વરસ્યો છે. ત્યારે રાજ્યમાં વરસેલા વરસાદના આંકડા પર નજર કરવામાં  આવે તો વલસાડના ધરમપુરમાં 11 ઈંચ, કપરાડા અને વઘઈમાં 7 ઈંચ, વલ્લભીપુર અને માંગરોળમાં 6 ઈંચ, પારડી અને ઉમરાળામાં 6 ઈંચ, ડાંગમાં 5 ઈંચ, મહુવામાં 4 ઈંચ, ઉમરપાડામાં 4 ઈંચ, ખેરગામ, અંકલેશ્વર, નેત્રંગમાં 4-4 ઈંચ, ધ્રોલ, બાવળા, નાંદોદ, ડેડિયાપાડા, નવસારીમાં 3 ઈંચ તથા વાપીમાં 2.5 ઈંચ વરસાદ નોંધાયો છે.

રાજકોટ:

આ તરફ રાજકોટમાં પણ ધોધમાર વરસાદ વરસ્યો છે. મન મૂકીને વરસેલા વરસાદે રાજકોટને ધમરોળ્યું છે. રાજકોટમાં વરસેલા વરસાદની વાત કરવામાં આવે તો રાજકોટ શહેરમાં 8.5 ઈંચ વરસાદ, પૂર્વ રાજકોટમાં 8 ઈંચ વરસાદ, મધ્ય રાજકોટમાં પોણા 6 ઈંચ વરસાદ, પશ્ચિમ રાજકોટમાં 5 ઈંચ વરસાદ નોંધાયો છે. જ્યારો કેટડા સાંગાણીમાં 3.5 ઈંચ, ગોંડલમાં 1 ઈંચ, જશદણમાં 1.5 ઈંચ, પડઘરીમાં 4.5 ઈંચ, લોધીકામાં 2 ઈંચ વરસાદ નોંધાયો છે. મહત્વનું છે કે આખી રાત રાજકોટમાં મેઘો મન મૂકીને વરસ્યો છે. જે બાદ અનેક નીચાણવાળા વિસ્તારો પણ પાણીમાં ગરકાવ થયા છે.

નવસારી:

રાજકોટ બાદ નવસારીમાં પણ વરસાદ મન મૂકને વરસ્યો છે. નવસારીમાં પણ નદીઓની જળસપાટીમા વધારો થયો છે. પૂર્ણા નદી અને અંબિકા નદીની જળસપાટીમાં વધારો થયો છે. પૂર્ણા નદીમાં નવા નીર આવતા પૂર્ણા નદીની જળસપાટી 10 ફૂટે અને અંબિકા નાદીની જળસપાટી 24 ફૂટે પહોંચતા હાલ બંને નદીઓ ભયજનક સ્તરે વહી રહી છે. બીજી તરફ કાવેરી નદીની જળસપાટી પણ 12 ફૂટે પહોંચી છે. જૂજ ડેમની વાત કરવામાં આવે તો જૂજ ડેમની સપાટી પણ 166 ફૂટે પહોંચી અને કેલિયા ડેમની સપાટી 110 ફૂટે પહોચી છે. બંને ડેમમાં પાણીની આવક યથાવત છે.

નવસારી જિલ્લામાં વરસાદ

• નવસારી- 79 મિમિ
• જલાલપોર- 62 મિમિ
• ગણદેવી- 49 મિમિ
• ચીખલી- 62 મિમિ
• વાંસદા- 76 મિમિ
• ખેરગામ- 109 મિમિ

વલસાડ:

વલસાડ જિલ્લામાં જૂનના છેલ્લા સપ્તાહ અને જૂલાઇના પ્રારંભના 10 દિવસ દરમિયાન ચોમાસું જામ્યા બાદ મેઘરાજાએ લાંબો વિરામ લીધો હતો.જોકે, જુલાઇના અંતિમ સપ્તાહમાં મેઘરાજાની ધમાકેદાર બેટિંગ ચાલુ થતાં ડાંગરના ખેડૂતોના જીવમાં જીવ આવ્યો હતો. ધોધમાર વરસાદ થતાં દમણગંગા, કોલક નદી બંન્ને કાંઠે વહી હતી.11.5 ઈંચ વરસાદ પડતાં વલસાડની ઔરંગા નદીમાં પૂરના પાણી ધસી આવતા શહેરના નીચાણવાળા વિસ્તારોના રહીશોને રિક્ષા ફેરવીને સાવધ કરાયા હતા. પ્રાંત અધિકારી કે.જે.ભગોરા ટીમ લઇને ઔરંગા પુલ પર ધસી ગયા હતા. વરસાદના પગલે લાગુ ગામડાઓમાં ઠેર ઠેર કોઝ વે પર પાણી ફરી વળ્યા હતા. લોકોને 10 કિમીનો ચકરાવો લઇને જવું પડ્યું હતું જ્યારે કેટલાય લોકો કામધંધે પહોંચી શક્યા ન હતા.

વલસાડ જિલ્લામાં વરસાદ

• ઉમરગામ- 37 મિમિ
• કપરાડા- 191 મિમિ
• ધરમપુર- 288 મિમિ
• પારડી- 152 મિમિ
• વલસાડ- 105 મિમિ
• વાપી- 78 મિમિ

 

બોટાદ:

તો આ તરફ બોટાદમાં પાણી મેઘરાજાનું આગમન થયુ છે. ગત રાતથી સવાર સુધી હળવાથી ભારે વરસાદ વરસ્યો છે. બોટાદમાં સવા 3 ઈંચ વરસાદ નોંધાયો છે. રાણપુરમાં 4 ઈંચ, બરવાળામાં અઢી ઈંચ, ગઢડામાં 2 ઈંચ વરસાદ થતા ખેડૂતોમાં ખુશીનો માહોલ જોવા મળ્યો છે.

સુરેન્દ્રનગર:

સુરેન્દ્રનગરના ચોટીલા સહિતના વિસ્તારોમાં વરસાદ શરૂ થયો છે. ચોટીલા અને તેની આસપાસના મોલડી, જીવાપર અને ખેરડી ગામમાં વરસાદ વરસી રહ્યો છે. આણંદપર, બામણબોર અને તેની આસપાસના ગ્રામ્ય વિસ્તારોમાં પણ વરસાદ વરસી રહ્યો છે. સતત બીજા દિવસે વરસાદ વરસતાં નદી નાળામાં નવા નીરની આવક થઈ રહી છે.

ડાંગ:

ડાંગ જિલ્લામાં સતત ચાર દિવસથી વરસાદ જારી રહેતા સર્વત્ર પાણી રેલાઈ ગયા છે. ડાંગ જિલ્લામાં ભારે વરસાદને પગલે સાપુતારા, શામગહાન, સાકરપાતળ, વઘઈ, ઝાવડા, ભેંસકાતરી, કાલીબેલ, બરડીપાડા, મહાલ, પીંપરી, આહવા, બોરખલ, ચીંચલી સહિત પંથકમાં પાણીના દ્રશ્યો જોવા મળી રહ્યા છે. ઉપરવાસના કેચમેન્ટ વિસ્તારમાં ભારે વરસાદ પડતા ડાંગ જિલ્લાની ચાર લોકમાતા બંને કાંઠે વહેતી થઈ હતી. સૌથી વધુ પાણી અંબિકા અને ખાપરી નદીમાં વહેતા આ નદીઓ નજીકના ખેતરોમાં પાણી ભરાયા હતા. આ નદીઓને સાંકળતા 17થી વધુ કોઝવે કમ પુલ ઘોડવહળ, સૂપદહાડ, આંબાપાડા, કુમારબંધ, ચીખલદા, સુસરદા, ધૂળચોંડ, ગાયખાસ, ચવડવેલ, ચૌક્યા, દબાસ, માછળી (ઘોડી), બોરપાડા, સતીવાંગણ, લિંગા, કોસંબીયા, પાંડવા કોઝવે દિવસ દરમિયાન પાણીમાં ગરક થઈ ગયા છે. અંબિકા ખાપરી, પૂર્ણા અને ગીરા નદીને સાંકળતા સમયાંતરે પાણીમાં ગરક થઈ જતા ઘોડવહળ, સૂપદહાડ, સૂર્યાબરડા, લહાનબરડા, કુમારબંધ, બોરદહાડ, ચીખલદા, સુસરદા, ધૂળચોંડ, ગાયખાસ, ચવડવેલ, ભેંડમાળ, લિંગા, કુંભારીયા, ચૌક્યા, અંજનકુંડ, પાંડવા, ઘોડી, લહાનદબાસ, મોટીદબાસ, કોસંબીયા, ઉગા ચીચપાડા, આમસરવળણ, બોરપાડ, દગડીઆંબા, મલિન, વાઘમાળ, લવાર્યા સહિત 30થી વધુ ગામો સંપર્કવિહોણા બન્યા છે.

ડાંગ જિલ્લામાં વરસાદ

• આહવા- 126 મિમિ
• વઘઈ- 208 મિમિ
• સાપુતારા- 157 મિમિ
• સુબીર- 79 મિમિ

જામનગર:

જામનગરમાં રાતે ધોધમાર વરસાદ વરસ્યો હતો. જિલ્લાના અલગ અલગ તાલુકાઓમાં અડધાથી પાંચ ઈંચ જેટલો વરસાદ નોંધાયો. છેલ્લા ચોવીસ કલાકમાં જિલ્લાભરમાં વરસાદ નોંધાયો છે. ધ્રોલમાં 5 ઈંચ, જોડિયા અને જામનગરમાં અઢી ઈંચ, લાલપુર કાલાવડમાં એક ઈંચ વરસાદ નોંધાયો છે. ભારે વરસાદના કારણે ડેમમાં પાણીની આવક થઈ છે. આજી ડેમ-2 ડેમના 5 દરવાજા ખોલવામાં આવ્યા છે. હાલમાં આજી-3 ડેમમાં અઢી મહિના ચાલે તેટલા નવા નીર આવ્યા છે.

કેટલાક જીલ્લાઓમાં ભારેથી અતિભારે વરસાદના આગાહી:

ગુજરાત પર બે સિસ્ટમ સક્રિય થતાં ગુજરાતમાં અતિભારે વરસાદ વરસી શકે છે. દક્ષિણ, ઉત્તર અને મધ્ય ગુજરાત સહિત સૌરાષ્ટ્રમાં સારો વરસાદ વરસી શકે છે. હવામાન વિભાગના મતે 31મી તારીખથી કચ્છમાં પણ ભારે વરસાદ વરસી શકે છે. રાજ્યના દરિયાકાંઠાના વિસ્તારોમાં પણ એલર્ટ આપવામાં આવ્યું છે. તેની સાથે સાથે માછીમારોને પાંચ દિવસ દરિયો ન ખેડવાની સૂચના આપી છે. 

ઉલ્લેખનીય છે કે, સૌરાષ્ટ્ર, કચ્છ, ઉત્તર ગુજરાત, દક્ષિણ ગુજરાતમાં સારો વરસાદની સંભાવના વ્યક્ત કરાઈ છે. રાજ્યમાં ભારે લો પ્રેશર અને સાયક્લોનિક સર્ક્યુલેશનના કારણે હવાનું સર્ક્યુલેશન સર્જાયું છે, જેના કારણે ગુજરાતમાં ભારે વરસાદની આગાહી કરવામાં આવી છે. ઉત્તર, મધ્ય, દક્ષિણ ગુજરાત અને સૌરાષ્ટ્રમાં પણ આગામી 4 દિવસ ભારે વરસાદ પડવાની આગાહી કરી છે.

વડોદરા:

વડોદરાના ડભોઈ પંથકમાં પણ વરસાદ વરસી રહ્યો છે. છેલ્લા 24 કલાકમાં ડભોઈ પંથકમાં પોણા બે ઈંચ વરસાદ વરસ્યો છે. સાથે જ સિઝનનો કુલ 17 ઈંચ વરસાદ વરસ્યો છે. હજુ પણ ડભોઈ અને તેની આસપાસના ગ્રામ્ય વિસ્તારોમાં ધીમીધારે વરસાદ વરસી રહ્યો છે. તો બીજી તરફ ખેતી લાયક વરસાદ થવના કારણે ખેડૂતોમાં પણ ખુશીની  લહેર છવાઈ ગઈ છે.