હવામાન વિભાગની આગાહી અનુસાર, આજે પણ ગુજરાતના અનેક જિલ્લાઓમાં વરસાદની આગાહી કરવામાં આવી છે. રાજ્યમાં આજે અમરેલી, ભાવનગર, દાહોદ, ભરૂચ, ડાંગ, સુરત, તાપી, નવસારી અને વલસાડ સહિતના જિલ્લાઓમાં વરસાદ મન મૂકીને વરસશે.
રાજ્યમાં આગામી 5 દિવસ સુધી દ. ગુજરાતમાં ભારે વરસાદની આગાહી
તમને જણાવી દઇએ કે, દક્ષિણ ગુજરાતમાં વરસાદના વધુ એક રાઉન્ડે જળબંબકારની સ્થિતિ સર્જી છે. દક્ષિણ ગુજરાતના લગભગ તમામ સાતેય જિલ્લાઓમાં મેઘરાજા સમયાંતરે ધડધબાટી બોલાવતા રહે છે. મહત્વનું છે કે, હવામાન વિભાગની આગાહી પ્રમાણે હજુ પણ રાજ્યમાં આગામી 5 દિવસ સુધી દક્ષિણ ગુજરાતમાં ભારે વરસાદની આગાહી કરવામાં આવી છે. જે મુજબ, ગઇકાલે ડાંગ, આહવા, વઘઇ અને સાપુતારામાં ધોધમાર વરસાદ વરસ્યો હતો. વરસાદના કારણે રસ્તાઓ પર પાણી ભરાઇ ગયા હતા.
દક્ષિણ ગુજરાતમાં સૌથી વધુ મેઘમહેર
ઉલ્લેખનીય છે કે, દક્ષિણ ગુજરાતમાં ભરૂચ , નવસારી, વલસાડ અને ડાંગમાં વધુ મેઘમહેર જોવા મળી રહી છે. ભરૂચમાં પણ ગઈકાલે સમીસાંજે અચાનક વાતાવરણમાં પલટો આવતા ધોધમાર વરસાદ વરસ્યો હતો. અસહ્ય ઉકળાટ બાદ વરસાદ વરસતા લોકોને ગરમીથી રાહત મળી હતી તેમજ વાતાવરણમાં પણ ઠંડક પ્રસરી હતી. જોકે વરસાદી ઝાપટા બાદ નીચાણવાળા વિસ્તારોમાં પાણી ભરાઇ ગયા હતા.
ગુજરાતની જીવાદોરી સમાન સરદાર સરોવર ડેમમાં ઉપરવાસમાંથી પાણીની આવક વધી છે. જેના પગલે તંત્રએ વધુ પાણી છોડવાનો નિર્ણય કર્યો છે. નર્મદા ડેમમાંથી ડાઉન સ્ટ્રીમમાં પાણી છોડવામાં આવી રહ્યું છે. તેમજ ભરૂચ નજીક નર્મદાનું જળસ્તર વધવાથી તંત્ર એલર્ટ થઇ ગયું છે. નદીકાંઠા વિસ્તારના લોકોને એલર્ટ રહેવા વહીવટી તંત્રએ અપીલ કરી છે. નર્મદા નદીમાં હાલ 3.15 લાખ ક્યુસેક પાણી છોડાયું છે. ડેમની જળસપાટી 138.44 મીટરે પહોંચી છે. આથી, નર્મદા નદી કાંઠાના 26 ગામોને એલર્ટ કરી દેવાયા છે. તદુપરાંત NDRF-SDRFની એક-એક ટીમ પણ તૈનાત કરી દેવાઇ છે.
ઉકાઇ ડેમની સપાટી ભયજનક 345 ફૂટથી માત્ર 2.70 ફૂટ જ દૂર
ઉપરવાસમાં વરસાદના કારણે હાલ ઉકાઇ ડેમની સપાટી પણ ભયજનક 345 ફૂટથી માત્ર 2.70 ફૂટ જ દૂર છે. ઓકટોબરના પહેલા સપ્તાહ સુધીમાં ડેમ સંપૂર્ણ ભરાઇ શકે છે. રવિવારે ડેમમાં 1 લાખથી 1.42 લાખ ક્યુસેકની આવક હતી. આથી સવારે 10થી 1.24 લાખ ક્યુસેક પાણી છોડવાનું શરૂ કરાયું હતું. રાત્રે 8 કલાકે સપાટી 342.31 ફૂટ નોંધાઇ હતી. હાલ ડેમ 92.91 ટકા ભરાયો છે.