પોલનું પરિણામઃ આટલા લોકો માને છે કે હાર્દિકે ચૂંટણી લડવી ન જોઈએ

લોકસભા ચૂંટણીને બસ ગણતરીના દિવસો બાકી છે ત્યારે ગુજરાત સહિત સમગ્ર દેશમાં ચૂંટણીનો માહોલ જામ્યો છે રાજકારણ ગરમાયું છે. જો કે આ ચૂંટણીમાં સૌથી વધુ લોકોની ચર્ચાનો વિષય અને ઉત્સુકતા હોય તો સ્ટાર ઉમેદવારો કઈ સીટ પરથી ચૂંટણી લડશે તે હોય છે. પીએમ મોદી અને રાહુલ ગાંધી કઈ સીટ ચૂંટણી માટે સિલેક્ટ કરશે તેની ચર્ચા લોકો કરી રહ્યાં છે ત્યારે હાર્દિક પટેલે ચૂંટણી લડવાનો આડકતરો ઇશારો બતાવીને આ માહોલને વધુ ચર્ચાસ્પદ બનાવી દીધો છે. 

પહેલાં પાટીદાર અનામત આંદોલન ત્યાર બાદ ખેડૂતોના હકો અને યુવાનોને રોજગારીને મુદ્દે રાજકારણમાં હાર્દિક પટેલ એન્ટ્રી મેળવવા માંગે છે ત્યારે અમારા VTVના ફેસબુક પેજ પર ઑપિનિયન પોલ મૂક્યો હતો. જેમાં અમે પૂછ્યું હતું કે શું તમારા મતે હાર્દિક પટેલે આગામી લોકસભા ચૂંટણી લડવી જોઈએ? અને ચૂંટણી લડીને તે ખેડૂતોની અને યુવાઓની સમસ્યાઓનો પ્રશ્ન હલ કરી શકશે?

40 ટકા લોકો નથી ઇચ્છતા કે હાર્દિક ચૂંટણી લડે

આ પોલના પૂછાયેલા સવાલમાં 20000થી મત લોકોએ આપ્યાં હતાં. જેમાં 60 ટકા લોકોએ ચૂંટણી લડવી જોઈએ તેમ કહીને હા કહ્યું હતું. જ્યારે 40 ટકા લોકોએ હાર્દિકે ચૂંટણી લડવી ન જોઈએ તેમ કહીને ના કહ્યું હતું. 
 

આવામાં હાર્દિકે ચૂંટણી લડવાની તૈયારી તો બતાવી જ દીધી છે ત્યારે જોવાનું એ રહેશે કે આગામી સમયમાં કયા પક્ષનો હાથ થામે છે. આ ઉપરાંત કઈ સીટ પરથી ચૂંટણી લડશે તે પણ જોવાનું રસપ્રદ બની રહેશે.