ક્રાઈમ / ગન કલ્ચર ક્યારે અટકશે: અમેરિકાના હવે આ વિસ્તારમાં થયો બેફામ ગોળીબાર, 9 લોકો ઈજાગ્રસ્ત

• અમેરિકામાં સામુહિક ફાયરીંગના કેસો વધ્યા 
• છેલ્લા 10 દિવસમાં 19 વાર ફાયરીંગની ઘટના
• ગુરુવારે સાંજે ન્યૂજર્સીના નેવાર્કમાં થયો ગોળીબાર

ગોળીબારનો સીલસીલો યથાવત 
અમેરિકામાં ગોળીબારને રોકવા માટે બાઈડેન સરકારે ભલે નવો કાયદો બનાવ્યો હોય, પરંતુ અહીં ગોળીબારની ઘટનાઓ અટકવાનું નામ નથી લઈ રહી. આવી જ એક અન્ય ઘટના ગુરુવારે સાંજે સામે આવી હતી, મીડિયા રિપોર્ટ્સ અનુસાર, ગુરુવારે સાંજે ન્યૂજર્સીના નેવાર્કમાં થયેલી ગોળીબારીમાં એક કિશોર સહિત લગભગ 9 લોકો ઘાયલ થયા છે. પોલીસ આ કેસની તપાસ કરી રહી છે.

ફાયરિંગનું કારણ હજુ સ્પષ્ટ થયું નથી
નેવાર્કના કાર્યવાહક પબ્લિક સેફ્ટી ડાયરેક્ટર રાઉલ માલવેએ સ્થાનિક મીડિયાને જણાવ્યું હતું કે ગુરુવારે સાંજે લગભગ 6:20 વાગ્યે પોલીસને એવી માહિતી મળી હતી કે ક્લિન્ટન પ્લેસમાં ગોળીબાર થયો છે. ક્લિન્ટન પ્લેસના 200 બ્લોકમાં પોલીસ તાત્કાલિક પહોંચી હતી. પોલીસને ઘટના સ્થળે આઠ પુખ્ત વયના લોકો અને એક કિશોર ઘાયલ થયો હોવાનું જાણવા મળ્યું છે. ઘાયલોને તાત્કાલિક નજીકની હોસ્પિટલમાં લઈ જવામાં આવ્યા હતા. રિપોર્ટ અનુસાર ચાર પુખ્ત વયના પીડિતો અને એક કિશોરને સારવાર માટે નેવાર્ક બેથ ઇઝરાયેલ મેડિકલ સેન્ટર ખાતે ખસેડવામાં આવ્યા છે, જ્યારે અન્ય ચાર ઇજાગ્રસ્તોને સારવાર માટે યુનિવર્સિટી હોસ્પિટલમાં લઇ જવામાં આવ્યા છે. અધિકારીઓએ હજી સુધી એ જણાવ્યું નથી કે ગોળીબારનું કારણ શું છે. પોલીસ આ કેસની સતત તપાસ કરી રહી છે અને ઘાયલોની પૂછપરછ કર્યા બાદ વધુ માહિતી ઉપલબ્ધ થશે. તેમજ જર્સી સિટીમાંથી ચોરાયેલી સફેદ હોન્ડાની પણ પોલીસ શોધખોળ કરી રહી છે.

પોલીસ સીસીટીવી ફૂટેજ ચેક કરી રહી છે
ન્યૂજર્સી પુલિસના જણાવ્યા અનુસાર અત્યાર સુધીની તપાસમાં પોલીસને સામૂહિક ગોળીબાર પાછળ એક સફેદ રંગની હોન્ડા પાયલોટનું કનેક્શન મળ્યું છે. જર્સી સિટીમાંથી ચોરી કરવામાં આવી હતી. ગોળીબાર કયા કારણોસર થયું હતું અથવા કેટલા શૂટરો સામેલ હતા તે હજુ સ્પષ્ટ થઇ શક્યું નથી. પોલીસ નજીકના સીસીટીવી કેમેરાના ફૂટેજ ચકાસી રહી છે.

20 જૂન પછી 19મી ગોળીબારની ઘટના
20 જૂનથી દેશભરમાં આ 19 મી સામૂહિક ફાયરીંગની ઘટના ઘટી હતી. ગન વાયોલન્સ આર્કાઈવના જણાવ્યા મુજબ આ 19 ઘટનાઓમાં અત્યાર સુધી 12 લોકોના મોત થયા છે અને 90 લોકો ઘાયલ થયા છે. ગત સોમવારે હાર્લેમમાં થયેલા ગોળીબારમાં આઠ લોકો ઘાયલ થયા હતા, જ્યારે એક કોલેજ બાસ્કેટબોલ સ્ટારનું મોત થયું હતું. શનિવારે રાત્રે વધુ એક સામૂહિક ગોળીબારમાં 8 વર્ષના બાળક સહિત ચાર લોકો ઘાયલ થયા હતા. આ પહેલા મંગળવારે રાત્રે ફાયરિંગ પણ થયું હતું. આ ઉપરાંત સામુહિક ગોળીબારના પણ ઘણા કિસ્સા સામે આવ્યા છે.