ગુજરાત હાઈકોર્ટે વડોદરામાં વિવાદીત જગ્યા પર ખોદકામ કરવા બદલ મ્યુનિસિપલ કોર્પોરેશન પ્રત્યે નારાજગી વ્યક્ત કરી છે. હાઈકોર્ટે મનપા કમિશનરને 28મી ફેબ્રુઆરીએ કોર્ટમાં હાજર રહેવાનો આદેશ આપ્યો છે.
ગુજરાત હાઈકોર્ટે વડોદરા મહાનગરપાલિકાની કાઢી ઝાટકણી
મનપા કમિશનરને કોર્ટમાં હાજર રહેવા HCનો આદેશ
જમીન સંપાદિત કર્યા બાદ વળતર ન અપાતા વિવાદ
સ્માર્ટ સિટી વડોદરામાં અણઘડ વહીવટનો એક નમૂનો બહાર આવ્યો છે. વડોદરા મ્યુનિસિપલ કોર્પોરેશન વિસ્તારમાં વિવાદીત જમીન પર ખોદકામ કરવાના પ્રકરણમાં હાઈકોર્ટે કોર્પોરેશન સત્તાવાળાઓના વલણ પ્રત્યે નારાજગી કરી છે. ગુજરાત હાઈકોર્ટે આ મુદ્દે ખુલાસો કરવા વડોદરા મ્યુનિસિપલ કમિશનરને હુકમ કર્યો છે અને તેમને 28મી ફેબ્રુઆરીએ કોર્ટમાં રૂબરૂ હાજર રહેવા જણાવ્યું છે.
જમીન વિવાદનો કેસ હાઈકોર્ટમાં ચાલું હોવા કરાયું ખોદકામઃ જમીન માલિક
આ અંગે જમીન માલિક નીકિતિન કોન્ટ્રાક્ટરે જણાવ્યું છે કે, કોર્પોરેશનના અણઘડ વહીવટના કારણે વિકાસ રૂંધાયો છે. જમીન વિવાદનો કેસ હાઈકોર્ટમાં ચાલુ હોવા છતાં ખોદકામ કરાયું છે. જમીન માલિકોને નુકસાન થયું છે. હવે જમીન પરત આપશે તો પણ નુકસાન થશે. આટલા વર્ષો સુધી જમીનનો કોર્પોરેશને ઉપયોગ કર્યો તેના વળતરનું નુકસાન, જમીન લીધી ત્યારે દિવાલ તોડી તેનું નુકસાન અને હવે દિવાલ બનાવવાનું નુકસાન.
શું છે સમગ્ર મામલો?
વડોદરાના રેલવે સ્ટેશનના પાછળના ભાગે આવેલા ફોરમજી કમ્પાઉન્ડ વિસ્તારમાં કોર્પોરેશને 30 મીટરનો રોડ બનાવવા માટે વર્ષ 2017માં જમીન માલિકો પાસેથી લીધી હતી અને યોગ્ય વળતર આપશું તેવું કહ્યું હતું. જેનું વળતર ન મળતા જમીન માલિકો કોર્ટમાં ગયા હતા.
જમીન માલિકે કરી હતી અરજી
ગુજરાત હાઈકોર્ટમાં વળતર અથવા વૈકલ્પિક જમીન મેળવવા એક અરજી કરવામાં આવી હતી. જેમાં જણાવવામાં આવ્યું હતું કે, 'વર્ષ 2017માં વડોદરા મ્યુનિસિપલ કોર્પોરેશને જાહેર હેતું માટે તેમની જમીન સંપાદન કરી હતી અને એ વખતે તેમને વળતરની ખાતરી આપી હતી, પરંતુ કોર્પોરેશન દ્વારા વળતર આપવામાં આવ્યું નથી.' જેથી કોર્ટે આ મામલે વીએમસીનો જવાબ માંગ્યો હતો.
મ્યુનિસપલ કમિશનરને કોર્ટમાં હાજર રહેવાની સૂચના
જમીન વિવાદનો કેસ હાઈકોર્ટમાં ચાલું હોવા છતાં વડોદરા મ્યુનિસિપલ કોર્પોરેશનના સત્તાધીશોએ આ જમીન પર બુલડોઝર ફેરવી દીધું હતું અને ખોદકામ શરૂ કરી દીધુ હતું. જેને પગલે હાઈકોર્ટે મ્યુનિસિપલ કોર્પોરેશનનો ઉધડો લીધો છે અને ઉપરોક્ત મુદ્દે જરૂરી ખુલાસો કરવા તા 28મી ફેબ્રુઆરીએ અદાલત સમક્ષ હાજર રહેવા મ્યુનિસિપલ કમિશનરને ફરમાન કર્યું છે.