મહામારી / ગુજરાતમાં કોરોના શરૂ થયો ત્યારથી અત્યાર સુધીના સૌથી વધુ કેસ નોંધાતા ખળભળાટ

• ગુજરાતમાં કોરોના સંકટ બન્યું વધુ ઘેરું 
• આજે નોંધાયા અત્યાર સુધીના સૌથી વધુ 1640 નવા કેસ 
• 4 દર્દીઓના સારવાર દરમિયાન થયાં મોત

આ સાથે જ સાજા થનારની વાત કરવામાં આવે તો 1110 દર્દીઓ સાજા થયાં છે. આમ ગુજરાતમાં અત્યાર સુધીમાં 2,76,348 દર્દીઓએ કોરોનાને મ્હાત આપી છે. તો 4 દર્દીઓના સારવાર દરમિયાન મોત થયાં છે, આ સાથે જ રાજ્યમાં 4454 દર્દીઓના સારવાર દરમિયાન મોત થયાં છે.

સૌથી વધુ 27 નવેમ્બર 2020ના રોજ નોંધાયા હતા કેસ

ઉલ્લેખનીય છે કે, 19 માર્ચ 2020ના રોજ ગુજરાતમાં પ્રથમ કેસ નોંધાયો હતો. જ્યારે કોરોના પોતાની ઊંચાઈ પર હતો અને જ્યારે ગુજરાતમાં સૌથી વધુ કેસ 27 નવેમ્બર 2020ના રોજ 1607 નોંધાયા હતા. આવામાં આજના કેસનો આંકડો આ આંકડાને પાર પહોંચ્યો છે અને 1640 કેસ નોંધાતા ચિંતાનો માહોલ વધી ગયો છે. 

મહારાષ્ટ્રની જેમ ગુજરાતમાં પણ ચિંતા વધી 

મહારાષ્ટ્રની જેમ ગુજરાતમાં પણ કોરોનાનું સંક્રમણ દિવસેને દિવસે વધી રહ્યું છે. ખાસ કરીને આજે નોંધાયેલા કેસ એ ગુજરાતના ઇતિહાસમાં પ્રથમ વખત છે. જેમાં અત્યાર સુધીના સૌથી વધુ કેસ નોંધાયેલા છે. 

સુરત અને અમદાવાદમાં કોરોનાનો હાહાકાર

સ્થાનિક સ્વરાજ્યની ચૂંટણી બાદ ફરી કોરોનાએ માથું ઉચક્યું છે. કોરોનાના કેસમાં સતત વધારો થતા ચિંતા વધી છે. સુરત શહેરમાં 429 કેસ અને ગ્રામ્યમાં 54 નવા કેસ નોંધાયા છે. જ્યારે અમદાવાદ શહેરમાં 481 નવા કેસ, જ્યારે અમદાવાદ ગ્રામ્યમાં 2 કેસ નોંધાયા છે. વડોદરા શહેરમાં 139 કેસ, જ્યારે ગ્રામ્યમાં 20 કેસ નોંધાયા. રાજકોટ શહેરમાં 126 કેસ અને ગ્રામ્યમાં 26 કેસ નોંધાયા છે. ત્યારે જાણો 24 કલાક દરમિયાન રાજ્યના તમામ જિલ્લામાં નોંધાયેલ કેસની વિગત...