કોરોના વાયરસે ગુજરાતમાં કાળો કહેર વરસાવ્યો છે. મહારાષ્ટ્ર, દિલ્હી, તમિલનાડું બાદ કોરોનાના સૌથી વધુ કેસ ગુજરાતમાં નોંધાયા છે, ખાસ કરીને અમદાવાદની સ્થિતિ વધારે નાજૂક છે કારણ કે રાજ્યના સૌથી વધુ કેસ અમદાવાદમાં જ નોંધાયા છે. ત્યારે રાજ્યમાં કોરોના વાયરસના ટેસ્ટના ભાવ ઘટાડવાની માગ કરવામાં આવી છે.
કોરોનાનો કહેર યથાવત
ટેસ્ટિંગની કિંમત ઘટાડવા માગ
ગુજરાતમાં ટેસ્ટના ભાવ વધુ
ઉલ્લેખનીય છે કે, અન્ય રાજ્યોની સરખામણીએ ગુજરાતમાં ટેસ્ટના ભાવ વધુ છે. જેને લઈને ગરીબ-મધ્યમ વર્ગના લોકોને હાલાકી પડી રહી છે. મહારાષ્ટ્ર, દિલ્હીમાં રાજ્ય સરકારે કોરોના ટેસ્ટિંગના ભાવ ઘટાડતા ગુજરાતમાં પણ લોકોએ કોરોનાના ટેસ્ટિંગના ભાવ ઘટાડવાની માગણી કરી છે.
ગુજરાતમાં કોરોના ટેસ્ટના 4500 રૂપિયા
ગુજરાતમાં કોરોના વાયરસના કેસમાં દિવસેને દિવસે વધારો થઇ રહ્યો છે. તેમ છતાં રિપોર્ટ માટે ખાનગી લેબમાં 4500 રૂપિયા વસૂલવામાં આવી રહ્યા છે. નોંધનીય છે કે, મે મહિનાની 27મી તારીખે ICMRએ 4500 રૂપિયાની ટોચ મર્યાદા હટાવી હતી અને ગૃહમંત્રાલયે દિલ્હીમાં કોરોના ટેસ્ટની કિંમત 2400 રૂપિયા નક્કી કરી છે. RT-PCR ટેસ્ટ કિટની કિંમત દેશમાં ઘટતા ICMRએ રાજ્યોને ભાવ ઘટાડવા કહ્યું હતું પરંતુ હજી સુધી રાજ્યમાં ટેસ્ટના ભાવને લઇને કોઇ જ નિર્ણય લેવાયો નથી.
મોડેલ ગુજરાતની વાતો પોકળ સાબિત થઇ
આપને જણાવી દઇએ કે, ગુજરાતમાં પણ કોરોના વાયરસે કાળો કહેર વરસાવ્યો છે. તો ટેસ્ટિંગને લઇને પણ સવાલો ઉભા થઇ રહ્યા છે. વિપક્ષે આક્ષેપ કર્યો છે કે, કોરોનાને નાથવામાં ગુજરાત સરકાર સફળ થઇ શકી નથી અને પ્રધાનમંત્રી મોદીના ગુજરાત મોડેલની વાતો પોકળ સાબિત થઇ રહી છે. તો વિપક્ષોએ સરકાર પર એવા પણ આક્ષેપ કર્યા છે કે, રાજ્યમાં કોરોનાના ઓછા ટેસ્ટ કરવામાં આવે છે.
મહારાષ્ટ્રમાં કોરોના ટેસ્ટના માત્ર 2200 રૂપિયા
મહારાષ્ટ્રના આરોગ્ય મંત્રી રાજેશ ટોપેએ કહ્યું કે સરકારે ખાનગી લેબ દ્વારા કરવામાં આવનાર કોરોના વાયરસના ટેસ્ટની કિંમત 4,500 રૂપિયાથી ઘટાડીને 2,200 રૂપિયા કરી નાંખી છે. આરોગ્ય મંત્રીએ કહ્યું કે ટેસ્ટિંગની કિંમત ઓછી કરવાથી લોકોને રાહત મળશે. રાજ્યના આરોગ્ય મંત્રીએ કહ્યું કે હોસ્પિટલથી વાયરલ ટ્રાન્સપોર્ટ મીડિયા (VTM) ના માધ્યમથી સ્વૈબ (Swab) (કોરોના સેમ્પલ) એકઠ્ઠા કરવાના માટે હવે 2,200 રૂપિયા કિંમત લેવામાં આવશે, જ્યારે ઘરેથી કોરોનાનું સેમ્પલ (સ્વેબ) લેવા માટે 2,800 રૂપિયા લેવામાં આવશે. આ પહેલા આ સ્વેબની કિંમત ક્રમશઃ 4,500 અને 5,200 રૂપિયા હતી.
જ્યાં કોરોનાના કેસ વધુ છે ત્યાં ટેસ્ટના ભાવ ઓછાં
અત્રે જણાવી દઇએ કે, મહારાષ્ટ્ર, દિલ્હી, તમિલનાડું અને ગુજરાતમાં કોરોનાના દેશના સૌથી વધુ કેસ છે તેમ છતાં ગુજરાતમાં જ કોરોના ટેસ્ટના સૌથી વધુ ભાવ લેવાઇ રહ્યા છે. એક બાબત તેવી પણ છે કે જ્યાં કોંગ્રેસ અથવા અન્ય પક્ષની સત્તા છે તેમ છતાં રાજ્યમાં કોરોના ટેસ્ટના ભાવ ઓછાં છે સામે ગુજરાત અને મધ્યપ્રદેશમાં 4500 રૂપિયા વસૂલવામાં આવી રહ્યા છે.