પોરબંદરના SP તરીકે IPS અધિકારી રવિમોહન સૈનીને મુકવામાં આવ્યા છે. આ યુવાન IPS અધિકારીની વિશેષતા એ છે કે તેઓ 2001માં કૌન બનેગા કરોડપતિ શોમાં ભાગ લઇને રમત જીતીને જંગી એક કરોડ રૂપિયા જીતી ગયા હતા.
2001 માં 14 વર્ષીય રવિ મોહન સૈનીએ કૌન બનેગા કરોડપતિ (KBC) જુનિયર દરમિયાન તમામ 15 પ્રશ્નોના સાચા જવાબ આપીને 1 કરોડ રૂપિયા મેળવ્યા હતા. 33 વર્ષના IPS અધિકારી રવિ મોહન સૈની મંગળવારે પોરબંદરના પોલીસ અધિક્ષક (SP) ની જવાબદારી સંભાળશે. સૈનીએ 2014 માં યુનિયન પબ્લિક સર્વિસ કમિશન (UPSC) ની પરીક્ષા પાસ કરી હતી અને તેઓ ગુજરાત કેડરના IPS અધિકારી બન્યા હતા. રવિના પિતા, જે રાજસ્થાનના અલવરના છે, તેઓ પણ ઇન્ડિયન નેવીમાંથી નિવૃત્ત થયા હતા.
સેના પરિવારથી આવે છે રવિમોહન સૈની
રવિએ સ્કૂલથી MBBS સુધી અભ્યાસ કર્યો અને પછી ઇન્ટર્નશિપ કરી. આ સમય દરમિયાન, તેમણે UPSCની પરીક્ષા પણ પાસ કરી. રવિના પિતા નેવીમાં અધિકારી હોવાથી, તેમણે આંધ્રપ્રદેશના વિશાખાપટ્ટનમની નેવલ પબ્લિક સ્કૂલમાં અભ્યાસ કર્યો છે. જ્યારે રવિ દસમા વર્ગમાં હતો, ત્યારે તેણે પહેલીવાર કૌન બનેગા કરોડપતિ જુનિયરમાં ભાગ લીધો હતો.
2001માં જીત્યા KBC
અમિતાભ બચ્ચન દ્વારા હોસ્ટ કરવામાં આવતા કૌન બનેગા કરોડપતિમાં રવિએ તમામ 15 પ્રશ્નોના સાચા જવાબો આપ્યા અને રૂ .1 કરોડની મોટી રકમ જીતી લીધી. ત્યારબાદ રવિએ અભ્યાસ પર ધ્યાન કેન્દ્રિત કર્યું અને તેમના પિતાના પગલે યુનિફોર્મની પસંદગી કરી. મીડિયા સાથે વાત કરતા રવિએ કહ્યું, 'સ્કૂલ ભણ્યા પછી મેં મહાત્મા ગાંધી મેડિકલ કોલેજ, જયપુરથી MBBS કર્યું. જ્યારે હું MBBS કર્યા પછી ઇન્ટર્નશિપ કરતો હતો, ત્યારે મેં UPSCની પરીક્ષા પાસ કરી. મારા પિતા નૌકાદળમાં હતા અને તેમની પાસેથી પ્રેરણા લઇને મેં પણ પોલીસ દળની પસંદગી કરી.
કોરોના મહામારીથી પોરબંદરને સુરક્ષિત રાખવા માટે આ છે ડો રવિમોહન સૈનીની રણનીતિ
આ પહેલા રવિ મોહન સૈની રાજકોટ શહેરના DCP હતા. મંગળવારે તેમની બદલી થતા તેમને SP પોરબંદર તરીકેનું પદ સાંભળવા માટે આપ્યું. પોતાના પોસ્ટિંગ માટે સૈનીએ કહ્યું મારી પ્રાથમિકતા કોવિડ 19 મહામારીને જોતા પોરબંદરમાં લોકડાઉન લાગુ રહે તે જોવાની અને કાયદો અને વ્યવસ્થાની સ્થિતિ જળવાયેલી રહે તે જોવાની રહેશે.