પેટાચૂંટણી / લીંબડી બેઠક પર ભાજપ-કોંગ્રેસે કોળી સમાજને ટિકિટ ન આપતા કોંગ્રેસના ધારાસભ્યના ભત્રીજા અપક્ષમાંથી મેદાને

• ગોપાલ મકવાણાએ અપક્ષ તરીકે ઉમેદવારી ફોર્મ ‌ભર્યું 
• સમાજના આગેવાનએ પેટા ચૂંટણીમાં ઝંપલાવતા રાજકારણ ગરમાયું
• ગોપાલ મકવાણાએ અપક્ષ ઉમેદવારી કરતા કોંગ્રેસની ચિંતા વધી

ભાજપે કિરીટસિંહ રાણાને ટિકિટ આપી છે જ્યારે કોંગ્રેસે ચેતન ખાચરને ટિકિટ આપી છે. ભાજપ અને કોંગ્રેસે ક્ષત્રિય ઉમેદવારને ટિકિટ આપી છે. જેને લઇને કોળી સમાજ નારાજ થયો હોવાનું ચર્ચાઇ રહ્યું છે. કોળી સમાજના આગેવાન અને પૂર્વ તાલુકા પંચાયતના પ્રમુખ ગોપાલ મકવાણાએ લીંબડી બેઠક પર અપક્ષ તરીકે ઉમેદવારી ફોર્મ ભર્યું છે. કોળી સમાજના આગેવાને પેટાચૂંટણીમાં ઝંપલાવતા રાજકારણ ગરમાયું છે. ગોપાલ મકવાણા કોંગ્રેસના ધારાસભ્ય ઋત્વિક મકવાણાના ભત્રીજા છે. કોંગ્રેસે કોળી સમાજને ટિકિટ ન આપતા અપક્ષમાંથી ઉમેદવારી કરતા કોંગ્રેસની ચિંતા વધી છે. અપક્ષ ઉમેદવાર તરીકે ફોર્મ ભરતા અનેક ચર્ચાઓ વહેતી થઇ છે.

કોંગ્રેસ માટે અસમંજસની સ્થિતિ હતી

લીંબડી વિધાનસભા બેઠકે કોંગ્રેસ માટે અસમંજસની સ્થિતિ ઉભી કરી હતી. ભાજપે ક્ષત્રિય ઉમેદવારને ટિકિટ આપી હતી. જ્યારબાદ કોંગ્રેસ દ્વારા પ્લાન B તૈયાર કરવામાં આવ્યો હતો કે, ક્ષત્રિય ઉમેદવાર સામે કોળી ઉમેદવારને ટિકિટ આપવામાં આવે. પરંતુ છેલ્લી ઘડીએ સમીકરણો બદલાયા છે. કોંગ્રેસે કાઠી સમાજના ઉમેદવારને ટિકિટ આપતા લીંબડી બેઠક પર ક્ષત્રિય વર્સિસ ક્ષત્રિય થશે. લીંબડીમાં ચેતન ખાચરને કોંગ્રેસે મેન્ડેટ આપ્યું છે. હાલતો કોંગ્રેસમાં લીંબડીનું કોકડું ઉકેલાયું છે. ચેતન ખાચર કાઠી સમાજમાંથી આવે છે. કિરીટસિંહ સામે કોંગ્રેસમાંથી ચેતન ખાચર લડશે. ત્યારે હવે કોળી સમાજ અને અન્ય સમાજો પણ નારાજ થયા હોવાની ચર્ચા ચાલી રહી છે.

રાજ્યમાં 8 બેઠક અબડાસા, લીંબડી, મોરબી, ધારી, ગઢડા, કરજણ, ડાંગ અને કપરાડા બેઠક પર મતદાન યોજાશે. ત્યારે ભાજપ અને કોંગ્રેસ દ્વારા જાહેર કરવામાં આવેલ ઉમેદવારોની યાદી નીચે મુજબ છે.

અબડાસા
ભાજપ - પ્રદ્યુમનસિંહ જાડેજા
કોંગ્રેસ - શાંતિલાલ સેંઘાણી 

મોરબી
ભાજપ - બ્રિજેશ મેરજા
કોંગ્રેસ - જયંતિલાલ પટેલ

ધારી
ભાજપ - જે.વી.કાકડિયા
કોંગ્રેસ - સુરેશ કોટડિયા

ગઢડા
ભાજપ - આત્મારામ પરમાર
કોંગ્રેસ - મોહનલાલ સોલંકી

કરજણ
ભાજપ - અક્ષય પટેલ
કોંગ્રેસ - કિરિટસિંહ જાડેજા

લીંબડી
ભાજપ - કિરિટસિંહ રાણા
કોંગ્રેસ - ચેતન ખાચર

કપરાડા
ભાજપ - જિતુ ચૌધરી
કોંગ્રેસ - બાબુભાઈ વરથા

ડાંગ
ભાજપ - વિજય પટેલ
કોંગ્રેસ - સુર્યકાંત ગાવિત

ગુજરાત વિધાનસભાની પેટાચૂંટણીની તારીખ જાહેર

8 બેઠકો પર ગુજરાત વિધાનસભાની પેટાચૂંટણી 3 નવેમ્બરે યોજાશે. 9 ઓક્ટોબરથી ઉમેદવારી માટે ફોર્મ ભરી શકાશે. 16 ઓક્ટોબર ફોર્મ ભરવાની છેલ્લી તારીખ છે. તો 19 ઓક્ટોબર ફોર્મ ખેંચવાની છેલ્લી તારીખ છે. જ્યારે 3 નવેમ્બરે મતદાન થશે અને 10 નવેમ્બરે પરિણામ જાહેર થશે.

8 MLAએ રાજીનામાં આપતા યોજાશે પેટાચૂંટણી

8 બેઠકો પર ધારાસભ્યોએ રાજીનામાં આપતા પેટાચૂંટણી યોજાશે. અબડાસાથી પ્રદ્યુમનસિંહ જાડેજા, મોરબીમાંથી બ્રિજેશ મેરજા, કપરાડામાંથી અક્ષય પટેલ, ગઢડામાંથી પ્રવીણ મારૂ, ધારીમાંથી જે.વી કાકડીયા, કપરાડામાંથી જિતુ ચૌધરી, ડાંગમાંથી મંગળ ગાવિત અને લીંબડીમાંથી સોમા પટેલનું રાજીનામું પડ્યું હતું.