1 ઓક્ટોબર 2020થી રાજ્યમાં જંગલ સફારી અને પ્રાણી સંગ્રહાલયો શરૂ થશે. રાજ્ય સરકારે સફારી પાર્ક, પ્રાણી સંગ્રહાલયો, અભ્યારણ્યો અને રાષ્ટ્રીય ઉદ્યાનો ખોલવા માટે મંજૂરી આપી દીધી છે. મહત્વનું છે કે, પાર્ક કોરોનાના કારણે પ્રવાસીઓ માટે બંધ હતા.
સફારી પાર્ક ખોલવા રાજ્ય સરકારે આપી મંજૂરી
1 ઓક્ટોબર 2020થી જંગલ સફારીને મંજૂરી
આજથી પરમીટ બુકિંગ સિસ્ટમ કરાઇ ઓપન
અનલૉકની શરૂઆત બાદ મધ્યપ્રદેશ, રાજસ્થાન, કર્ણાટક, મહારાષ્ટ્ર અને પ.બંગાળ જેવા રાજ્યમાં દેશના મહત્વના પાર્ક અને અભ્યારણ ખોલી દેવાયા છે ત્યારે સાસણ ગીર સફારી અને દેવળિયા પાર્ક ખોલવાની પણ માંગ ઉઠી હતી. ત્યારે હવે સાસણના સફારી પાર્કને ખોલવાની મંજૂરી મળી ચૂકી છે. 1 ઓક્ટોબરથી ફરી જંગલના દ્વાર પ્રવાસીઓ માટે ખુલશે. ત્યારે આ માટે આજથી પરમીટ બુકિંગ સિસ્ટમ શરૂ કરી દેવામાં આવી છે.
સફારી પાર્ક અને પ્રાણી સંગ્રહાલયો ખોલવા માટે અપાઇ મંજૂરી
હાલ રાજ્યમાં કોરોના સંકટ વચ્ચે અનલૉક-4માં 1-10-2020થી રાજ્યના તમામ સફારી પાર્ક, પ્રાણી સંગ્રહાલય અને 15-10-2020થી રાજ્યના તમામ અભ્યારણ્ય અને રાષ્ટ્રીય ઉદ્યાનો પ્રવાસીઓ માટે ખોલવા રાજ્ય સરકાર દ્વારા મંજૂરી આપવામાં આવી છે. 1 ઓક્ટોબરથી સાસણ સફારી પાર્ક અને અમદાવાદ, વડોદરા, સુરત, રાજકોટના પ્રાણી સંગ્રહાલયો ખોલવા માટે મંજૂર આપી છે.
મહત્વનું છે કે, ગુજરાતનું પ્રખ્યાત એવું પ્રવાસન સ્થળ ગીરને ફરી એક વખત ધમધમતું કરવા માટે અગાઉ સાસણ ગીર હોટલ એસોસિએશન દ્વારા સરકારને રજૂઆત કરવામાં આવી હતી. આ અંગે VTVGujarati.com દ્વારા સૌપ્રથમ ન્યૂઝ રજૂ કરવામાં આવ્યા હતા. ત્યારે આ અંગે VTVGujarati.comના અહેવાલ બાદ આજે સરકાર દ્વારા મંજૂરી આપી દેવામાં આવી છે. કોરોનાના કારણે પ્રવાસીઓ માટે પાર્ક બંધ હતું.