રાજકોટ: ગોંડલમાં ઘર્મના નામે સ્ટીકર ચોંટાડવા મામલે સ્થાનિકોએ બે યુવકોને મારેલા ઢોર માર અંતર્ગત હવે ભાજપ જિલ્લા મંત્રી સહિત કુલ 8 શખ્સો સામે ફરિયાદ નોંધાઈ છે. બંને યુવકોને પાઠ ભણાવવા મામલે સ્થાનિકોએ યુવકોને અર્ધનગ્ન કરી માર મારી સરઘસ કાઢયું હતું.
શહેરના માંધાતા સર્કલ વિસ્તાર પાસે કેટલાક અસામાજીક યુવકોએ અપશબ્દોનો ઉલ્લેખ કરતા સ્ટિકરો ચોટાડયા હતા. જેના ઘેરા પ્રત્યાઘાતો સ્થાનિકોમાં પડયા હતા સ્થાનિકોએ તમામ યુવકોને મેથીપાક ચખાડી જાહેર માર્ગ પર તેમનું સરઘસ કાઢી માફી પણ મંગાવી હતી.
રાજ્યમાં છેલ્લા કેટલાક સમય લૂંટફાટ મારામારી અને ખોટી કનડગતના બનાવો દિવસે-દિવસે વધી રહ્યા છે ત્યારે રાજકોટ જીલ્લાના ગોંડલ ગામની ઘટનાને લઇને રાજ્યમાં ઘેરા પડઘા પડ્યા હતા. ધર્મના નામે સ્ટિકર ચોંટાડવા મામલે સ્થાનિકો દ્વારા 2 યુવકોને ઢોર માર મારવાની ઘટના બનતા પોલીસે અંતે આ ઘટનાની તપાસ માટે આદેશ આપ્યો હતો.
સ્થાનિકો દ્વારા યુવાનોને જે રીતે માર માર્યો હતો એ જોતા ભલભલા માણસોના હચમચી જાય તેવી ઘટના બનવા પામી હતી. ગોંડલની આ ઘટનાએ ફરીવાર ગુજરાતમાં ગરીબ અને સામાન્ય માણસમાં ડર બેસાડી દીધો કે ટોળું તમારો ગમે ત્યારે જીવ લઇ શકે છે. ટોળાને ક્યારેય અક્કલ હોતી નથી. જો કે આ મામલે ભાજપના જિલ્લામંત્રી સહિત 8 લોકો સામે ફરિયાદ નોંધાઇ હતી.