ગ્લોબલ માર્કેટમાં મળેલા પોઝિટિવ સંકેતોથી સોમવારે મલ્ટી કમોડિટી એક્સચેન્જ પર જૂન વાયદામાં સોનાનો ભાવ 0.25 ટકા પ્રતિ 10 ગ્રામ વધ્યો છે.
ફરી આવી સોનામાં ચમક
મે મહિનામાં 2000 રૂપિયા સુધી વધ્યા સોનાના ભાવ
જાણો શું છે આજનો નવો ભાવ
અઠવાડિયાના પહેલા કારોબારી દિવસે સોમવારે ભારતીય બજારોમાં સોના અને ચાંદીની કિંમતોમાં વધારો આવ્યો છે. ગ્લોબલ માર્કેટમાં મળેલા પોઝિટિવ સંકેતોથી સોમવારે મલ્ટી કમોડિટી એક્સચેન્જ પર જૂન વાયદા સોનાનો ભાવ 0.25 ટકા પ્રતિ 10 ગ્રામ વધ્યો છે. જ્યારે જુલાઈ વાયદા ચાંદીની કિંમત 0.59 ટકા પ્રતિ કિલોગ્રામ વધી છે. દેશમાં આ મહિને સોનાના ભાવમાં 2000 રૂપિયા પ્રતિ 10 ગ્રામે ભાવ વધારો થયો છે.
જાણો શું છે સોનાનો નવો ભાવ
સોમવારે કારોબારમાં એમસીએક્સ પર જૂન વાયદા સોનાના ભાવ 120 રૂપિયા વધીને 48663 રૂપિયા પ્રતિ 10 ગ્રામ થયો છે. આંતરરાષ્ટ્રિય માર્કેટમાં સોનું 1900 ડોલર પ્રતિ ઓંસ પર કારોબાર કરી રહ્યું છે. આ મહિને સોનામાં લગભગ 8 ટકાનો ઉછાળો આવ્યો છે અને તેની કિંમત વધીને 1907 ડોલર પ્રતિ ઓંસ થઈ છે. આંતરરાષ્ટ્રિય બજારોમાં આ મહિને સોનું સારું પ્રદર્શન કરનારી ધાતુમાંની એક રહી છે. વધતી મોંઘવારીના સંકેતોના બચાવના રૂપમાં સોનાની અપીલને વેગ મળી રહ્યો છે.
જાણો શું છે ચાંદીની નવી કિંમત
એમસીએક્સ પર જુલાઈ વાયદા ચાંદીની કિંમત 425 રૂપિયા ઉછળીને 72036 રૂપિયા પ્રતિ કિલોગ્રામ થઈ છે. ઉલ્લેખનીય છે કે આજે જુલાઈ વાયદા ચાંદીની કિંમત 0.59 ટકા પ્રતિ કિલોગ્રામ વધી છે.
ગોલ્ડ બોન્ડનું વેચાણ આજથી થયું શરૂ
મોદી સરકારની સોવરેન ગોલ્ડ બોન્ડ સ્કીમનો ત્રીજો હપ્તો આજથી શરૂ થયો છે. આ બોન્ડ સ્કીમ 4 જૂન સુધી રહેશે. તેને માટેની કિંમત 4889 રૂપિયા પ્રતિ ગ્રામ નક્કી કરવામાં આવી છે. પહેલા હપ્તામાં 4777 રૂપિયા પ્રતિ ગ્રામ અને બીજા હપ્તા માટે 4842 રૂપિયા પ્રતિ ગ્રામ કિંમત રખાઈ હતી. જે લોકો ડિજિટલ પેમેન્ટ કરે છે તેમને પ્રતિ ગ્રામ 50 રૂપિયાની વધારાની છૂટ પણ આપવામાં આવે છે.