ગૌરવ / વૉલીબોલમાં આંતરરાષ્ટ્રીય સ્તરે ચમક્યું છે સૌરાષ્ટનું આ ગામ

100  પુરુષ ખેલાડી અને 200 જેટલી મહિલા ખેલાડીઓ સ્પોર્ટ્સ ક્ષેત્રે વધારી છે નામના

ઉલ્લ્ખેનીય છે કે,ગીરસોમનાથના કોડીનાર તાલુકાના દરિયાકાંઠના નાનકડા એવા ગામ સરખડીના છે. સૌરાષ્ટ્રના આ સરખડી ગામની વસતિ માત્ર  સાડાચાર હજારની જ છે. પરંતુ આટલી નાની વસતિમાંથી 100  પુરુષ ખેલાડી અને 200 જેટલી મહિલા ખેલાડીઓ સ્પોર્ટ્સ ક્ષેત્રે દેશ અને વતનનું  નામ રોશન કરવા રાત દિવસ વોલિબોલની પ્રેક્ટિસ કરી રહી છે અને તેનું જ પરિણામ છે કે આ જ ગામની કિંજલ વાળા નામની પ્રતિભાશાળી મહિલા ખેલાડીએ દેશ અન રાજ્યને અનેક મેડલ અપાવ્યા છે. 

જો કે ગામમાં મહિલા ખેલાડીઓને તૈયાર કરવા માટે જેવાઈબેન હાઈસ્કૂલના પ્રિન્સિપાલ વરજાંગભાઈ વાળા સતત પ્રયત્નશીલ રહે છે. કેમકે તેઓ પણ એક સમયે કબડ્ડી અને  વોલિબોલના ખેલાડી રહી ચૂક્યા છે. અને હાલ તેઓ સ્કૂલમાં વ્યાયામના શિક્ષકની ભૂમિકા ભજવી રહ્યા છે. તેમના આ  સ્પોર્ટસ્   પ્રત્યેના આ પ્રયાસથી ગામની નાની નાની બાળાઓ  અને યુવતીઓ આખો દિવસ સ્કૂલના ગ્રાઉન્ડમાં રમતગમતની પ્રેક્ટિસ કરતી રહે છે. જો કે, કોઈપણ  રમત માટે તાલીમબદ્ધ કોચની જરૂર પડતી હોય છે. ત્યારે આ મહિલા ખેલાડીઓને પણ વેલ ટ્રેઈન્ડ વિમેન કોચ મળે તેવી તેવો માગણી કરી રહ્યા છે.  

સરખડી ગામમાં મહિલાઓ છેલ્લા 30 વર્ષથી વોલીબોલ રમે છે

આપને જણાવી દઇએ કે, સરખડી ગામની આ મહિલા ખેલાડીઓ અન્ય ગામની મહિલાઓ માટે પ્રેરણા રૂપ પણ બની છે. સરખડી ગામમાં મહિલાઓ છેલ્લા 30 વર્ષથી વોલીબોલ રમે છે. આનું પરિણામ વર્ષ 2007માં તેમને મળ્યું જ્યારે ગુજરાતને ગૉલ્ડ મેડલ મળ્યો.ત્યારથી મેડલોનો ક્રમ ચાલુ થઈ ગયો જે આજ પર્યંત ચાલુ છે. એક, બે, ત્રણ એમ ગુજરાતને મેડલો મળતા જ રહે છે. .ચંડીગઢમાં 41મી જુનિયર નેશનલ વૉલિબૉલ ચેમ્પિયનશિપ રમાઈ ત્યારે 12 ખેલાડીઓ પૈકી નવ ખેલાડીઓ તો સરખડી ગામની હતી!. 

અત્યાર સુધીમાં અનેક મેડલ કર્યા છે પ્રાપ્ત

સરખડી ગામની મહિલા ખેલાડી કિંજલ રાજ્ય કક્ષાએ ચેમ્પિયન થયા, પછી રાષ્ટ્રીય કક્ષાએ,આંતરરાષ્ટ્રીય સ્તરે યૂથ ઇન્ડિયાની કેપ્ટન બની થાઇલેન્ડ ખાતે રમી આવી છે. વીમેન્સ નેશનલમાં 2014માં સિલ્વર મેડલ અને 2015માં ગૉલ્ડ મેડલ મળ્યો છે.સરખડીની આ મહિલાઓ અત્યાર સુધીમાં  પાંચ ગૉલ્ડ મેડલ, ચાર સિલ્વર મેડલ અને બે બ્રૉન્ઝ મેડલ જીતી ચૂકી છે. 19 ઑક્ટોબર 2014 દરમિયાન નાના એવા ગામડાએ વૉલિબૉલમાં કુલ સાત સુવર્ણ, સાત રજત, 12 કાંસ્ય અને 24 નેશનલ એવોર્ડ જીત્યા છે.  

તેમના આ જુસ્સાને બરકરાર રાખવા માટે હાલ એક તાલીમબદ્ધ કોચની જરૂર છે. જે માટે સરકારને અનેકવાર રજૂઆત કરવામાં આવી છે. પરંતુ હજુ સુધી તેમની માગણી સંતોષાઈ નથી. પરંતુ ગામના આગેવાનોની માગણી ચાલુ છે.  

મહિલા ખેલાડીઓને હાલ પ્રેક્ટિસ માટે સારા ઇન્ડોર સ્ટેડિયમ મળે તો સારું

ગત જૂન માસમાં બ્રિક્સ રમતો યોજાઈ ગઈ. આ સ્પર્ધામાં વૉલિબૉલની અંડર 20 ટીમની કેપ્ટન પણ આજ ગામની દીકરી હતી. જેનું નામ છે ચેતના વાળા. ચેતનાનો તો આખો પરિવાર જ વૉલિબૉલને સમર્પિત છે. ચેતનાની બહેન શિલ્પા, પિતરાઈ બહેન કિંજલ વાળા, કિંજલની સગી મોટી બહેન પરિતા, દેવાંશી આ બધા વૉલિબૉલ ખેલાડીઓ છે.વંશ પરંપરાગત રીતે વોલીબોલ ક્ષેત્રે આગળ વધેલી આ મહિલા ખેલાડીઓને હાલ પ્રેક્ટિસ માટે સારા ઇન્ડોર સ્ટેડિયમ ખાસ જરૂર છે.  

વોલીબોલની રમતને કારણે સરખડી ગામની ઘણી મહિલાઓને સ્પોર્ટ્સ ક્વોટામાં સારા પદે નોકરી પણ મેળવી ચૂકી છે. સરકાર તરફથી વોલીબોલ રમતી દીકરીઓને સ્ટાઈપેન્ડ, શિષ્યવૃત્તિ અને રોકડ પુરસ્કાર પણ આપવામાં આવે છે. હવે જો આ ખેલાડીઓને ઇન્ડોર સ્ટેડિયમ અને સારા કોચ મળી જાય તો વિશ્વભરમાં દેશનું નામ રોશન કરવામાં આ ખેલાડીઓ વધારે સમય લાગવા દે તેમ  નથી.