ઉદારતા / એક દિવસમાં જ હજાર ગરીબોને ખવડાવી તેલંગાણાનાં આ વ્યક્તિએ સર્જ્યો વર્લ્ડ રેકોર્ડ

હૈદરાબાદઃ તેલંગણાના ગૌતમકુમારે એક જ દિવસમાં એક હજારથી વધુ ગરીબોને ખાવાનું ખવડાવીને વર્લ્ડ રેકોર્ડ બનાવ્યો છે. તેની આ પ્રશંસનીય કામગીરીને યુનિવર્સલ બુક ઓફ રેકોર્ડમાં સામેલ કરાઇ છે. આ માટે સંસ્થાએ તેનું સન્માન પણ કર્યું છે. ગૌતમ હૈદરાબાદમાં રહે છે અને તે એક એનજીઓ ચલાવે છે. આ હેઠળ તેણે એક સારું કામ કર્યું છે. 

ગૌતમે જણાવ્યું કે મેં ૨૦૧૪માં 'સર્વ નીડી એનજીઓ'ની શરૂઆત કરી હતી. સંગઠનની શરૂઆત આ સંકલ્પ સાથે કરાઇ હતી કે કોઇ પણ વ્યક્તિ ભૂખ્યા પેટે ન સૂવે. અમે વધુમાં વધુ લોકોને ભોજન કરાવી શકીએ. અમે સતત તે તરફ આગળ વધી રહ્યા છીએ. આ કામ કરવામાં મને આનંદ મળે છે.

હવે અમારી પાસે ૧૪૦ સ્વયંસેવક છે, જે સતત આ કામ કરી રહ્યા છે. ગૌતમકુમારે હૈદરાબાદમાં ત્રણ અલગ અલગ જગ્યાએ લોકોને ભોજન ખવડાવ્યું. સૌથી પહેલા તેણે હૈદરાબાદની ગાંધી હોસ્પિટલમાં દર્દીઓને ભોજન કરાવ્યું. પછી રાજેન્દ્રનગરમાં અને છેલ્લે અમ્મા નન્ના અનાથાલયમાં ભોજન કરાવ્યું. ગૌતમના વિશ્વ રેકોર્ડ બન્યા બાદ તેને યુનિવર્સલ બુક ઓફ રેકોર્ડના ભારતીય પ્રતિનિધિ કે.વી. રમન્નારાવ અને તેલંગાણાના પ્રમુખ ટી.એમ. શ્રીલતા દ્વારા સર્ટિફિકેટ અપાયું છે.