પોલીસને પ્રાપ્ત હાઈટેક સવલતોને તે પચાવી શક્તી નથી. આજે દરેક પોલીસ સ્ટેશન કમ્પાઉન્ડમાં કેટલાંય પોલીસનાં વાહનો ધૂળ ખાઈ રહ્યાં છે.
પોલીસના હાઈસ્પીડ બાઈક ધૂળ ખાઈ રહ્યા
સમયસર રિપેરિંગ નહિ થતાં બાઈકની હાલત ખરાબ
સુરક્ષા માટે કરોડો રૂપિયાના ખર્ચે વાહનો ખરીદી થઈ રહ્યા છે
હાઈટેક જમાનામાં પોલીસ પણ ધીમે ધીમે હાઈટેક થઈ રહી છે. પોલીસની કામગીરી સફળ અને સરળ થાય તે માટે કરોડો રૂપિયાના ખર્ચે વાહનો ખરીદાઈ રહ્યા છે. પોલીસને પ્રાપ્ત હાઈટેક સવલતોને તે પચાવી શક્તી નથી. આજે દરેક પોલીસ સ્ટેશન કમ્પાઉન્ડમાં કેટલાંય પોલીસનાં વાહનો ધૂળ ખાઈ રહ્યાં છે. પોલીસ પાસે તેને રિપેર કરાવવાનો ટાઈમ નથી કે તેને પૈસા ખરચવા નથી. તે સવાલ છે.
ચેઇન સ્નેચર, પર્સ સ્નેચર જેવા આરોપીઓને પકડવા માટે કે પછી ઘટનાસ્થળ પર ફટાફટ પહોંચે તે માટે ગૃહવિભાગે હાઈસ્પીડનાં બાઈક આપ્યાં છે. આ સિવાય હાઈટેક જીપ જેમાં સીસીટીવી કેમેરા હોય તેમજ હાર્લી ડેવિડસન જેવાં વાહનો પણ અમદાવાદ પોલીસને આપ્યાં છે.
પોલીસ દ્વારા હોક સ્કોડ રચવામાં આવી હતી. જે બાઈક પર ઠેર-ઠેર પેટ્રોલિંગ કરતી હતી. ત્યારે સી.ટીમની પણ રચના કરવામાં આવી છે. જે છેડતી કરનાર લોકોને રંગે હાથ પકડી પાડે છે. આવા સ્કોડ માટે પોલીસને બાઈક પેટ્રોલિંગ માટે આપવામાં આવ્યાં છે. બાઈક જ્યાં સુધી બગડે નહીં ત્યાં સુધી તેનો ભરપૂર ઉપયોગ કરવામાં આવે છે. પરંતુ જ્યારે તે બગડે તો તેને રિપેર કરાવવાની જગ્યાએ મુદ્દામાલની જેમ મૂકી દેવામાં આવે છે. પોલીસ હેડક્વાર્ટરમાં એમ.ટી વિભાગ વાહનોની દેખરેખ રાખતી હોય છે. પરંતુ તે પણ લાપરવાહી બતાવી રહ્યા છે.
એરપોર્ટ પોલીસ સ્ટેશનમાં હાઇસ્પીડનાં બે બાઈક છેલ્લા ઘણા સમયથી ધૂળ ખાઈ રહ્યાં છે. પહેલી નજરમાં આ બાઈક પોલીસે કોઈ ગુનામાં ડિટેઈન કર્યાં હોય તેવું લાગી રહ્યું છે. પરંતુ તેને ધ્યાનથી જોવામાં આવે તો તે ખુદ પોલીસનાં વાહન હોવાનું માલુમ પડે છે. મુદ્દામાલ સાથે ખડકી દેવાયેલ આ બે બાઈક રિપેરિંગ માટે પણ પોલીસને પૂરતો ટાઈમ નથી અથવા પોતાના રૂપિયે રિપેર કરાવવાં નથી. આ બે વાહનો ઉપરાંત સંખ્યાબંધ પોલીસનાં વાહનો આ રીતે ધૂળ ખાય છે.
ઉલ્લેખનિય છે કે, ભારતમાં સૌપ્રથમ ગુજરાત પોલીસે ગુનેગારો અને ચેઇન સ્નેચરને પકડવા માટે વસાવેલાં 27 લાખ રૂપિયાનાં હાર્લી ડેવિડસનનાં બાઇક ધોળા હાથી સમાન પુરવાર થયાં છે. VIP મૂવમેન્ટ સિવાય આ બાઇકનો કોઇ ઉપયોગ નથી થતો. પોલીસ કર્મચારીઓને આ બાઇક ચલાવવા માટેની તાલીમ આપવામાં આવી હતી તે પોલીસ કર્મચારીઓ માત્ર બેટરી ચાર્જ રહે તે માટે સપ્તાહમાં એક વખત રાઇડની મજા લઇને પાછું પાર્કિંગમાં મૂકી દે છે.