- રાજકોટમાં જન્માષ્ટમીના તહેવારમાં ફરસાણના ભાવમાં રાહત
- 11 દિવસ રાહતના ભાવે મળશે ફરસાણ
- કલેક્ટર અને ફરસાણના વેપારીઓએ કરી હતી બેઠક
શ્રાવણ મહિનાની શરૂઆત એટલે તહેવારોની શરૂઆત. ઉપવાસના દિવસોમાં ફરસાણના વેપારીઓને તો ભારે કમાણી,, કારણ કે ઉપવાસમાં ફરાળી ખાવાની અસંખ્ય ફૂડ આઇટમ બજારમાં મળી રહી છે. પરંતુ આ વખતે શ્રાવણ માસમાં ફરાળ કરવુ મોંઘુ પડશે કારણ કે મોંઘવારીને કારણે તમામ ખાદ્ય ચીજ વસ્તુઓના ભાવ વધતા વેપારીઓ પણ ફરસાણના ભાવમાં વધારો કરી રહ્યા છે. પરંતુ રાજકોટની જનતા માટે એક રાહતના સમાચાર છે.
રાજકોટમાં તહેવાર ટાણે ભાવ વધારો ફરસાણમાં નહીં
રાજકોટમાં શ્રાવણ માસમાં સાતમ-આઠમનું ખૂબ મહત્વ. લોકમેળાનુ આયોજન કરવામાં આવે અને હજારો-લાખોની સંખ્યામાં લોકો ક્યાંય ક્યાંયથી અહીં ઉમટી પડે. ત્યારે આ વખતે રાજકોટવાસીઓ ફરાળી ચીજ વસ્તુઓને કારણે થોડા ફાયદામાં રહ્યા. કારણ કે તહેવારોમાં જે મિઠાઇ અને ફરસાણના ભાવ આસમાને પહોંચે છે, જે ભાવ વધારો થાય છે તે ભાવ વધારો રાજકોટ વાસીઓને નહીં લાગુ પડે. આ વર્ષે રાજકોટની જનતાને સસ્તા ભાવે ફરસાણ મળી રહેશે.
ફરસાણના ભાવ તહેવારો પુરતા ઘટાડ્યા
રાજકોટના વેપારીઓ અને કલેક્ટર વચ્ચે બેઠક મળી હતી. જેમાં તહેવારોમાં ફરસાણના ભાવ 15% નીચા રાખવા સહમતી બની છે. એક કિલો ગાંઠિયામાં રૂપિયા 40 અને ફરસાણમાં રૂપિયા 60નો ઘટાડો કરાયો છે. 10 ઓગસ્ટથી 21 ઓગસ્ટ સુધી આ ઘટાડો અમલી રહેશે. જેમાં સિંગતેલના ફરસાણના કિલોના 300 રૂપિયા નક્કી કરાયા છે, જ્યારે કપાસિયા તેલમાં બનેલા ફરસાણના કિલોના રૂપિયા 270 નક્કી કરવામાં આવ્યા છે. આ ઉપરાંત પામતેલમાં બનેલા ફરસાણના કિલોના 220 રૂપિયા નક્કી કરાયા છે. ઉપરાંત સિંગતેલમાં ગરમ ગાંઠિયાના કિલોના રૂપિયા 380, કપાસિયા તેલમાં ગરમ ગાંઠીયા કિલોના રૂપિયા 340 અને પામતેલમાં ગરમ ગાંઠીયા કિલોના ભાવ રૂપિયા 300 નક્કી કરાયા છે.
.jpg)
શ્રાવણ માસની શરૂઆત થતા ફરાળના ભાવ ભડકે બળ્યા
ખાસ કરીને દૂધ, દહીં, લોટ જેવી ચીજ વસ્તુઓ પર 5 ટકા GST લગતા ભાવ વધ્યા છે. શ્રાવણ માસની શરૂઆત થતા ફરાળના ભાવ ભડકે બળ્યા છે. ફરાળના ભાવમાં 30થી 40 ટકાનો ભાવ વધારો થયો છે. મોરૈયો, કેળાની વેફર્સ, બફવડા અને અન્ય વસ્તુઓમાં ભાવ વધ્યા છે. તહેવારોમાં લોકો ફરાળી વસ્તુઓ ફ્રુટ લેવા માટે આવે છે. ઘરમાં રહેતા બાળકો અને વૃદ્ધો માટે ફળ લેવુ જરૂરી હોય છે અને ઉપવાસ કરનારા લોકો પણ ફળ અને ફરાળી વસ્તુઓ ખાય છે. ત્યારે આ વસ્તુઓ લેવા જતા લોકો મોંઘવારીના કારણે તોબા પોકારી ગયા છે. આ મોંઘવારીનો માર પડતા લોકોએ સરકાર સમક્ષ માગ કરી છે કે જરૂરી વસ્તુઓ પરથી GST હટાવીને ભાવ કાબૂમાં લાવવો જોઈએ.
