- કોંગ્રેસથી ખફા જયરાજસિંહ પરમારનાં છેવટે ‘કેસરિયાં’
- સીઆર પાટીલની હાજરીમાં ભાજપમાં જોડાયા
- કોંગ્રેસ પક્ષે હારેલા ઘોડાઓ પર દાવ લગાવવાની પરંપરા જાળવી રાખીઃ જયરાજસિંહ
કોંગ્રેસના પ્રદેશ પ્રવક્તા જયરાજસિંહ પરમારે ગયા ગુરુવારે તેમની પક્ષમાં થતી ઉપેક્ષાના કારણે ભારે ભગ્ન હૃદયે રાજીનામું ધરી દીધું હતું. કાર્યકર્તાઓને સંબોધીને લખાયેલા પત્રમાં તેમણે અનેક ગંભીર આક્ષેપો કરીને કોંગ્રેસની છાવણીમાં હલચલ મચાવી દીધી હતી. તે દિવસથી તેઓ ભાજપમાં જોડાશે તેવી અટકળો રાજકીય વર્તુળોમાં ઊઠતી હતી, જે સાચી પડી છે. આજે સવારે પ્રદેશ ભાજપ કાર્યાલય કમલમ્ ખાતે કોંગ્રેસથી ખફા જયરાજસિંહે છેવટે 'કેસરિયાં' કર્યા છે.
આ દરમિયાન પ્રદેશ મહામંત્રી ભાર્ગવ ભટ્ટ, ધારાસભ્ય રજની પટેલ, પ્રદીપસિંહ, વિનેદ ચાવડા, ગોરધન ઝડફિયા, જયંતી કવાડીયા, કેબિનેટ મંત્રી ઋષિકેશ પટેલ સહિત પદાધિકારીઓ, હોદ્દેદારો અને કાર્યકર્તાઓ ઉપસ્થિત રહ્યાં હતા.
પક્ષે હારેલા ઘોડાઓ પર દાવ લગાવવાની પરંપરા જાળવી રાખીઃ જયરાજસિંહ
જયરાજસિંહને વર્ષ ૨૦૦૭, ૨૦૧૨, ૨૦૧૭ અને ૨૦૧૯માં ખેરાલુની ટિકિટ અપાઈ નહોતી. જોકે પક્ષ તરફથી સમય સમય પર તેમને ટિકિટ અપાશે તેવું આશ્વાસન મળતું હતું. તેમણે કાર્યકરોને સંબોધીને લખેલા પત્રમાં પ્રાથમિક સભ્યપદેથી રાજીનામું આપ્યાનો ઉલ્લેખ કરવા ઉપરાંત પક્ષ પર આકરા પ્રહાર કર્યા હતા. પક્ષે હારેલા ઘોડાઓ પર દાવ લગાવવાની પરંપરા જાળવી રાખી છે, જે નેતાઓ પોતાની જમીન સાચવી નથી શકતા એમને જ જમીનદાર બનાવી દેવાનો ગંભીર આક્ષેપ કરનાર જયરાજસિંહ આજે ભાજપ પ્રદેશ કાર્યાલય કમલમ્ ખાતે પ્રદેશ પ્રમુખ સીઆર પાટીલની હાજરીમાં ભાજપનો કેસરી ખેસ ધારણ કર્યો છે. સાથે તેમના સમર્થકો પણ ભાજપમાં જોડાયા છે.
ભાજપમાં જોડાતા પહેલા તેમણે દેવસ્થાનોના કર્યા દર્શન
તેમણે આજે સવારે પોતાના વતનમાં ઈષ્ટદેવ માંડવરાય દાદા તથા વિજાપુરના લાડોલ ગામમાં કુળદેવી હરસિદ્ધ માતાજીનાં દર્શન કર્યાં હતાં. ત્યાર બાદ તેમણે પરિવારમાં વડીલોના આશીર્વાદ લીધા હતા. પછી તેઓ પોતાના અમદાવાદના નિવાસસ્થાને જવા નીકળ્યા હતા અને ત્યાંથી સોલા ઓવરબ્રિજ પાસેના બહુચર માતાજીનાં મંદિરમાં દર્શન કરીને કમલમ્ પહોંચ્યા હતા. તેમણે અગાઉ ભાજપમાં જોડાવા અંગે ટ્વિટર પર જાહેરાત પણ કરી હતી.
જયરાજસિંહ ઉત્તર ગુજરાતમાં ક્ષત્રિય સમાજનો ચહેરો
અત્રે ઉલ્લેખનીય છે કે તેઓ ઉત્તર ગુજરાતમાં ક્ષત્રિય સમાજનો ચહેરો ગણાય છે અને તેમની સાથેના સમર્થકોએ પણ કોંગ્રેસ સાથેનો છેડો ફાડ્યો છે. દરમિયાન, ભાજપની હાલત સરોગસી જેવી થઈ છે તેવી આકરી ટીકા કોંગ્રેસ દ્વારા કરાઈ છે. કોંગ્રેસના એક અગ્રણીએ એવું ટ્વિટ કર્યું છે કે ભાજપ જાતે નેતા પેદા નથી કરી શકતો એટલે તોડજોડની રાજનીતિ કરવી પડે છે.
