કર્મચારીઓના કલ્યાણ માટે ચાલતી કેન્દ્રની મોટી યોજના ESIC સ્કીમમાં મે મહિનામાં જ 14.93 લાખ નવા સભ્યો જોડાયા હોવાનો ખુલાસો સરકારી ડેટા પરથી થયો છે.
રોજગારીના મોરચે ગૂડ ન્યૂઝ
મે મહિનામાં ESIC સ્કીમમાં જોડાયા 14 લાખથી વધુ મેમ્બર
ઇપીએફઓ સાથે 16.81 લાખ નવા ગ્રાહકો સામેલ થયા
એનએસઓ ડેટામાં થયો ખુલાસો
ESIC કર્મચારીઓના કલ્યાણ માટે ચાલતી કેન્દ્રની મોટી યોજના
સંગઠિત સેક્ટરમાં રોજગારી વધી રહી હોવાનો સ્પસ્ટ સંકેત છે. કર્મચારીઓના કલ્યાણ માટેની બે મોટી યોજનાઓ ESIC અને EPFOમાં કેટલા કર્મચારીઓ જોડાયા તેના સરકારે આંકડા બહાર પાડ્યાં છે. આ બન્ને યોજનામાં ગ્રાહકો વધવા રોજગારી વધી રહી હોવાનો સ્પસ્ટ સંકેત છે. કારણ કે જે લોકોને રોજગારી મળી હોય ફક્ત તેવા લોકોને જ આ સ્કીમ હેઠળ સામેલ કરવામાં આવે છે. એનએસઓ ડેટા અનુસાર એકલા મે મહિનામાં ESICમાં 14.93 અને EPFOમાં 16.81 લાખ નવા ગ્રાહકો સામેલ થયા છે. મે 2022માં કર્મચારીઓની રાજ્ય વીમા નિગમ (ઇએસઆઇસી) સંચાલિત સામાજિક સુરક્ષા યોજનામાં આશરે 14.93 લાખ નવા સભ્યો ઉમેરવામાં આવ્યા હતા. આ આંકડાઓ દેશમાં સંગઠિત ક્ષેત્રમાં રોજગારની સ્થિતિનું વર્ણન કરે છે.
કયા વર્ષમાં કેટલા નવા સભ્યો ઉમેરાયા
સોમવારે જાહેર કરવામાં આવેલા સત્તાવાર આંકડા અનુસાર, નાણાકીય વર્ષ 2021-22માં ઇસીઆઇસીમાં જોડાનારા નવા સભ્યોની કુલ સંખ્યા વધીને 1.49 કરોડ થઇ ગઇ છે. નાણાકીય વર્ષ 2020-21માં તેમાં 1.15 કરોડ નવા સભ્યો ઉમેરાયા હતા. નાણાકીય વર્ષ 2019-20માં 1.51 કરોડ નવા સભ્યો ઇએસઆઈસી સાથે જોડાયા હતા.જ્યારે 2018-19 માં 1.49 કરોડ હતા. આ પહેલા સપ્ટેમ્બર 2017થી માર્ચ 2018ની વચ્ચે લગભગ 83.55 લાખ નવા ગ્રાહકો ઈએસઆઈસીની સામાજિક સુરક્ષા યોજનાનો હિસ્સો બન્યા હતા.
મે 2022માં ઇપીએફઓ સાથે 16.81 લાખ નવા ગ્રાહકો સામેલ થયા
એનએસઓ રિપોર્ટ અનુસાર પેન્શન ફંડ બોડી એમ્પ્લોઇઝ પ્રોવિડન્ટ ફંડ ઓર્ગેનાઇઝેશન અથવા ઇપીએફઓ સાથે મે 2022 માં 16.81 લાખ નવા ગ્રાહકો ઉમેરવામાં આવ્યા હતા. રિપોર્ટમાં કહેવામાં આવ્યું છે કે સપ્ટેમ્બર 2017 થી મે 2022 ની વચ્ચે લગભગ 5.48 કરોડ નવા ગ્રાહકો ઇપીએફઓ યોજનાનો ભાગ બન્યા હતા. એનએસઓએ એમ પણ કહ્યું હતું કે અહેવાલમાં ઔપચારિક ક્ષેત્રમાં રોજગારના વિવિધ સ્તરો સાથે સંબંધિત વિવિધ પાસાઓ પર પ્રકાશ પાડવામાં આવ્યો છે.