મહામારી / અમદાવાદમાં વકરતા કોરોના વચ્ચે DyCM આજે લેશે સિવિલ હોસ્પિટલની મુલાકાત, ઉચ્ચ અધિકારીઓ સાથે કરશે ચર્ચા

• અમદાવાદમાં આરોગ્ય વ્યવસ્થાની આજે સમીક્ષા થશે
• DyCM નીતિન પટેલ સીવિલ હોસ્પિટલની કરશે મુલાકાત
• મંજૂશ્રી કેમ્પસની પણ મુલાકાત કરશે DyCM નીતિન પટેલ

અમદાવાદમાં આરોગ્ય વ્યવસ્થાની આજે સમીક્ષા થશે. નાયબ મુખ્યમંત્રી નીતિન પટેલ સવારે 11 વાગ્યે સિવિલ હોસ્પિટલની મુલાકાત કરશે અને આરોગ્ય સ્ટાફના ઉચ્ચ કર્મચારીઓ સાથે બેઠક કરીને દર્દીઓ માટેની વ્યવસ્થા અંગે અધિકારીઓ પાસેથી માહિતી મેળવશે. આ બેઠકમાં અમદાવાદના ઉચ્ચ અધિકારીઓ પણ ઉપસ્થિત રહેશે. આ ઉપરાંત નાયબ મુખ્યમંત્રી નીતિન પટેલ મંજૂશ્રી કેમ્પસની પણ મુલાકાત કરશે. કોવિડ દર્દીઓ માટેની વ્યવસ્થાની માહિતી મેળવશે.

મહત્વનું છે કે, અમદાવાદના ગ્રામ્ય વિસ્તારમાં પણ કોરોનાના 19 કેસ નોંધાયા છે. તો અમદાવાદ શહેરમાં સતત માઈક્રો કન્ટેઇન્મેન્ટ ઝોન વધી રહ્યા છે. શહેરમાં વધુ 42 સ્થળ માઈક્રો કન્ટેઈન્મેન્ટ ઝોનમાં મૂકાયા છે. ત્યારે હાલ અમદાવાદમાં કુલ 318 સ્થળ માઈક્રો કન્ટેઇન્મેન્ટ ઝોન હેઠળ છે.

કોવિડ હોસ્પિટલોમાં બેડની સંખ્યામાં ફરી કરાયો વધારો

અમદાવાદમાં કોરોનાનું સંક્રમણ વધતા AMC એકશનમાં આવી છે. AMC દ્વારા કોવિડ હોસ્પિટલોમાં બેડની સંખ્યામાં ફરી વધારો કરાયો છે. AMC એ SVPમાં 500 બેડ, GCSમાં 160 બેડ, SMS હોસ્પિટલમાં 240 બેડ અને સિવિલ મેડિસિટીમા 850 બેડ વધાર્યા છે. જ્યારે ખાનગી હોસ્પિટલમાં પણ કુલ 281 બેડનો વધારો કર્યો છે. આ ઉપરાંત સમરસ કોવિડ કેર અને અન્ય જગ્યાઓએ 650 બેડનો વધારો કરવામાં આવ્યો છે. આમ, અત્યાર સુધી કુલ 2 હજાર 31 કોવિડ બેડ મનપાએ વધાર્યા છે.