લોલમલોલ / દ્વારકામાં વધુ એક કૌભાંડ: સરકારી જમીનમાંથી સાડા ચાર કરોડની બોક્સાઈટ ખનીજ ચોરી

• દ્વારકામાં સાડા ચાર કરોડની બોક્સાઇડ ખનીજ ચોરી
• આ મામલે નોંધાઈ પોલીસ ફરિયાદ
• 35,313 મેટ્રિક ટન જેટલી બોક્સાઇડ ખનન થયું

દ્વારકા જિલ્લાના કલ્યાણપુર તાલુકામાં બોક્સાઇડ જેવો કિંમતી ખનીજ જમીનોમાં આવેલો છે ત્યારે કિંમતી ગણાતા આ ખનિજની ચોરી ઘણા વર્ષોથી ખનીજ માફિયાઓ દ્વારા કરવામાં આવી રહી છે ત્યારે કલ્યાણપુર પંથકમાંથી કરોડો રૂપિયાની  બોક્સાઇડ ખનીજ ચોરી સરકારી જમીનમાંથી થતા આ મામલે પોલીસ ફરિયાદ નોંધાઈ છે.

35,313 મેટ્રિક ટન જેટલી બોક્સાઇડ ખનન થયું

કલ્યાણપુર તાલુકાના કેનેડી ગામના ખોજાવાળા વિસ્તારમાં આવેલ સર્વે નંબર  590 વાળી સરકારી પડતર જમીન માંથી 35,313 મેટ્રિક ટન જેટલી બોક્સાઇડ ખનન કરવા બદલ હડમતીયા ગામના જેઠા વજસી વરૂ પર ગુન્હો દાખલ કરવામાં આવ્યો છે આ શખ્સ હડમતીયા ગામનો પૂર્વ સરપંચ રહી ચુક્યો છે આ પૂર્વ સરપંચ વિરુદ્ધ ખાણ ખનીજ વિભાગે કલ્યાણપુર પોલીસ મથકે ફરિયાદ નોંધાવી છે કેનેડી ગામે સર્વે નંબર 590 માં ગેરકાયદેસર બોક્સાઇડ ખનીજનું ખોદકામ કરી રૂપિયા 4 કરોડ 50 લાખ 24 હજાર 75 રૂપિયા ની કિંમત ની ખનીજ ચોરી થઈ હોવાનું માલુમ પડતા આ મામલે ખાણ ખનિજ વિભાગ દ્વારા કલ્યાણપુર પોલીસ મથકે ફરિયાદ નોંધાવામાં આવી છે.

ખનીજ માફિયાઓએ અબજોનું ખનન કર્યુ હોવાની સંભાવના

ખાણ ખનિજ વિભાગે જુના કેસમાં આજે કલ્યાણપુર પોલીસ મથકે આજે વિધિવત ફરિયાદ દાખલ કરી છે  બોક્સાઇડની કરોડોની ખનિજ ચોરી પકડી પડાતા ખનીજ માફિયાઓ ભૂગર્ભ માં ઉતરી ગયા છે કિંમતી બોક્સઇડ ખનીજની સરકારી જમીનમાંથી બેફામ ચોરી કરતા ખનીજ માફિયાઓ જાણે બેફામ બન્યા હોઈ તેમ ચારે તરફ સરકારી જમીનોમાં કરોડો રૂપિયાનું ખનિજ ખોદી નાખ્યું છે ત્યારે આ મામલે તાલુકાના તમામ સરકારી જમીનોમાં સર્વે કરી તમામ જમીનોમાં ગેરકાયદેસર ખોદકામનો જો તાગ મેળવવામાં આવે તો કલ્યાણપુર તાલુકામાં અબજો રૂપિયાનું ખનિજ માફિયાઓ દ્વારા ખોદી અને વેચી નાખ્યાનું ખૂબ મોટું કૌભાંડ સામે આવી શકે છે.

તંત્ર દ્વારા આ દિશામાં કડક હાથે કામગીરી કરવામાં નહીં આવે તો આવનાર દિવસોમાં રાષ્ટ્રીય સંપત્તિ ગણાતા સરકારી ખનિજનું આમજ માફિયાઓ ખોદકામ કરી પોતાની તિજોરીઓ ભરતા રહેશે હાલ તો સાડા ચાર કરોડની ખનિજ ચોરી મામલે હડમતીયા ગામના પૂર્વ સરપંચ જેઠા વજસી વરુ વિરુદ્ધ ફરિયાદ નોંધાતા ખનિજ ચોરોમાં ફફડાટ ફેલાયો છે