અમદાવાદના સેટેલાઇટમાં PCBએ રેડ પાડી વિદેશી દારૂની બોટલ અને દારૂ બનાવવાની સામગ્રી જપ્ત કરી છે. જેમાં એક આરોપીની અટકાયત કરી છે.
અમદાવાદમાં નકલી દારૂ બનાવવાના રેકેટનો પર્દાફાશ
PCBએ રેડ કરીને એક આરોપીની કરી અટકાયત
સેેટેલાઈટમાં અભિલાષા એપાર્ટમેન્ટમાં ચાલતુ હતું રેકેટ
અમદાવાદમાં નકલી દારૂ બનાવવાના રેકેટનો પર્દાફાશ કરવામાં આવ્યો છે. PCBએ રેડ પાડી એક આરોપીની અટકાયત કરી છે. PCBએ કુણાલ નામના આરોપીની અટકાયત કરી છે. શહેરના સેટેલાઈટ વિસ્તારમાં આવેલા અભિલાષા એપાર્ટમેન્ટમાં આ રેકેટ ચાલતુ હતું. PCBએ વિદેશી દારૂની બોટલ અને દારૂ બનાવવાની સામગ્રી જપ્ત કરી છે. નકલી દારૂ રેકેટના વધુ બે આરોપી અભિષેક અને ધર્મેશ ફરાર થઇ ગયા છે.
માણેકબાગ પાસેના એપાર્ટમેન્ટમાં દારૂ બનાવાતો
શહેરના માણેકબાગ વિસ્તારમાં અલગ-અલગ બ્રાન્ડના દારૂનું ઉત્પાદન કરવામાં આવતું હતું. ભેજાબાજ બુટલેગરો ભેગા મળીને સસ્તા દારૂમાં કેમિકલ, કલર અને અન્ય નશીલી ચીજો ભેળવીને સ્કોચની બોટલમાં ગણતરીની મિનિટોમાં જ સીલ પેક કરીને ગ્રાહકને ડિલિવરી આપતાં. આથી, ગ્રાહકે ભલે મોંઘો વિદેશી દારૂ આ વિસ્તારમાંથી મંગાવ્યો હોય પણ તેમાં હલકી ગુણવત્તાવાળો જ દારૂ રહેતો.
માણેકબાગ પાસે આવેલા અભિલાસ એપાર્ટમેન્ટના S2 ફ્લેટમાં અમદાવાદ PCBએ રેડ કરી હતી. PCBને મળેલી બાતમી પ્રમાણે ત્યાં દારૂનો જથ્થો હતો. રેડ દરમિયાન પોલીસ ફ્લેટમાં ગઈ ત્યારે ફ્લેટમાં અંદરનો નજારો કંઈક જુદો જ હતો. આ ફ્લેટમાં દારૂનું રીતસર બનાવટી ઉત્પાદન કરવામાં આવતું હતું. પોલીસે આ જગ્યાએથી કુણાલ મચ્છરની ધરપકડ કરી છે. જ્યારે તેની સાથે જોડાયેલા આરોપી અભિષેક મોદી અને ધર્મેશ હાલમાં ફરાર છે.
મેઘાણીનગરમાં કૈલાશ સ્કૂલની સામે દેશી દારૂની મહેફિલ જામતો વીડિયો થયો હતો વાયરલ
ઉલ્લેખનીય છે કે,એકબાજુ ગાંધીના ગુજરાતમાં એકબાજુ દારૂબંધીની મસમોટી વાતો થઇ રહી છે ને બીજી બાજુ રાજ્યમાં અવારનવાર દારૂબંધીના ધજાગરા ઉડતા હોવાનું જોવા મળી રહ્યું છે. કારણ કે તાજેતરમાં જ અમદાવાદના મેઘાણીનગરમાં આવેલી કૈલાશ સ્કૂલની સામે દેશી દારૂની મહેફિલ જામી હતી. જે અંગેનો કોઇએ વીડિયો બનાવી લીધા બાદ તેને સોશિયલ મીડિયામાં વહેતો કર્યો હતો. વધુમાં હસમુખલાલની ચાલીમાં ખુલ્લેઆમ દેશી દારૂનો વેપાર ધમધમી રહ્યો છે અને મોટી સંખ્યામાં લોકો દેશી દારૂની પોટલી લેવા આવતા હોવાનું વીડિયોમાં જોઇ શકાય છે. બીજી તરફ મંદિર પાસે દારૂ વેચાતો હોવાનો વીડિયો વાયરલ થતાં અનેક સવાલ ઊભા થયા છે.
એ સિવાય થોડા જ દિવસ પહેલાં અમદાવાદના એરપોર્ટ નજીક કોતરપુરમાં રેડ પાડતા PCBએ દારૂની ભઠ્ઠી ઝડપી પાડી હતી. જેમાં હજારો લિટર દેશી દારૂ અને દારૂ બનાવવાની સામગ્રી કબજે કરાઇ. ભઠ્ઠી પર PCBએ દરોડા પાડીને હજારો લિટર દેશી દારૂ અને દારૂ બનાવવાની સામગ્રી કબજે કરી છે. તદુપરાંત કેટલીક વસ્તુઓનો સ્થળ પર જ નાશ કર્યો હતો.
અમદાવાદ એરપોર્ટ નજીક PCBએ ઝડપી પાડી હતી દારૂની ભઠ્ઠી
મળતી વિગતો અનુસાર, અમદાવાદમાં એરપોર્ટ પોલીસ સ્ટેશનની હદમાં કોતરપુર ટર્નિંગની બાજુમાં આવેલ સાબરમતી નદીના પટની ડાબી બાજુ દેશી દારૂ બનાવવાની ભઠ્ઠી ચાલી રહી હતી. ત્યારે આ મામલે PCB ને બાતમી મળતા PCBએ ઘટનાસ્થળે રેડ પાડી. અહીં જમીનમાં દટાયેલા પીપડામાં દારૂ બનાવવામાં આવતો. જેમાંથી 9700 લિટર દેશી દારૂનો વૉશ મળી આવ્યો કે જેનો સ્થળ પર જ નાશ કરાયો હતો.