કચ્છના દરિયા કિનારેથી ફરી એક વખત ડ્રગ્સ ઝડપાતા ચર્ચા જાગી છે.
કચ્છમાં દરિયાકાંઠાથી ફરી ડ્રગ્સ ઝડપાયુ
ડ્રગ્સના 1 પેકેટ સાથે 2 શખ્સો ઝડપાયા
માછીમારી દરમિયાન ડ્રગ્સ મળ્યું હોવાનો ખુલાસો
ગુજરાતનો દરિયા કિનારો ડ્રગ્સના દૂષણ મામલે પહેલેથી જ બદનામીનો માર ભોગવી રહ્યો છે. આ રમણીય દરિયા માથે સફેદ કલંક સમાન ડ્રગ્સનો અવારનવાર જથ્થો ઝડપાઇ રહ્યો છે. તેવાં સંજોગો વચ્ચે આજે ફરી એક વાર કચ્છ વિસ્તારમાંથી ડ્રગ્સના 1 પેકેટ સાથે 2 શખ્સો પોલીસ ઝપટે ચડયા હતા. પોલીસે બંને આરોપીઓની અટકાયત કરી ડ્રગ્સકાંડના મોટા માથાઓ સુધી પહોંચવા તપાસના ચક્રો ગતિમાન કર્યા છે.
અબડાસાના દરિયાકાંઠેથી ડ્રગ્સનુ 1 પેકેટ મળ્યુ
પોલીસ અને સુરક્ષા એજન્સીઓની સતર્કતાના દાવા વચ્ચે પણ દરિયા કાંઠાના વિસ્તારોમાંથી ડ્રગ્સ ઝડપાવાનો સિલસિલો અટકવાનું નામ લેતો નથી. આજે ફરી એક વખત કચ્છમાં દરિયા કિનારેથી ડ્રગ્સ ઝડપાયું છે. અબડાસાના દરિયાકાંઠેથી ડ્રગ્સનુ 1 પેકેટ મળી આવતા સુરક્ષા એજન્સીઓ અને સ્થાનિક પોલીસ તંત્ર સાબદું બન્યું છે. પશ્ચિમ ક્ચ્છ SOG સ્ટાફ પેટ્રોલિંગમાં હતો આ દરમિયાન બે શખ્સો શંકાસ્પદ હાલતમાં નજરે ચડયા હતા. જેને લઈને પોલીસે આ બંનેની અટકાયત કરી હતી. ત્યારબાદ પોલીસે તલાશી લેતા તેના કબ્જામાંથી ડ્રગ્સનુ 1 પેકેટ ઝડપાયુ હતું.
આરોપીઓ ડ્રગ્સ વેચવા નીકળ્યાને ચડયા પોલીસ ઝપટે
પશ્ચિમ ક્ચ્છ SOG દ્વારા આરોપીની કરાયેલી પૂછપરછમાં આ બંને શખ્સોને દરિયામા માછીમારી દરમિયાન ડ્રગ્સ મળ્યું હોવાનું પ્રાથમિક તપાસમાં સામે આવ્યું છે. આ પેકેટને વેચવા નીકળ્યા હતા જે વેળાએ બન્ને આરોપીઓ પોલીસ ઝપટે ચડયા હોવાની માહિતી મળી રહી છે. હાલ પોલીસે આ બંનેની અટકાયત કરી વધુ તપાસ અને આગળની કાર્યવાહી હાથ ધરી છે.
શેથવારા બેટ નજીકથી બિનવારસી ડ્રગ્સ મળી આવ્યુ
આ ઉપરાંત ક્ચ્છ સરહદ પર આવેલ શેથવારા બેટ નજીકથી પણ વધુ એક બિનવારસુ હાલતમાં ડ્રગ્સ મળી આવ્યુ હતું. BSFના જવાનો પેટ્રોલિંગ કરી રહ્યા હતા આ દરમિયાન ડ્રગ્સનું પેકેટ
મળી આવ્યું હતુ. જેને લઇને ડ્રગ્સના શંકાસ્પદ પેકેટને પગલે પોલીસે તપાસ હાથ ધરી છે.
તાજેતરમાં જ કચ્છના દરિયાકાંઠેથી ચરસના 2 બિનવારસી પેકેટ મળી આવ્યા હતા
થોડા દિવસ અગાઉ જ નેવી ઇન્ટેલિજન્સ અને પશ્ચિમ કચ્છ પોલીસ સ્ટાફે સંયુક્ત ઓપરેશન પાર મોટ પીર બેટ નજીક દરિયાકાંઠેથી ચરસના 2 બિનવારસી પેકેટ ઝડપી લીધા હતા. પોલીસ અને સુરક્ષા એજન્સીઓએ આશરે 35 લાખની કિંમતનો જથ્થો જપ્ત કરી વધુ તપાસ આરંભી હતી. ઉલ્લેખનીય છે કે અત્યાર સુધીમાં કચ્છના દરિયાકાંઠાથી 4500થી વધુ ચરસના પેકેટ પકડાયા હોવાનું સામે આવ્યું છે.