આજથી એક મહિના પહેલા દિલ્હીમાં ભરાયેલી તબલીગી જમાત દેશની સુપર સ્પ્રેડર ઘટના બની જતા આખા દેશમાં કોરોનાનો કેર ફેલાયો છે. આ મુદ્દે RSSના વડા મોહન ભાગવતે નિવેદન આપીને કહ્યું છે કે આ એક ઘટના થઇ તે બદલ આખા મુસ્લિમ સમાજ સામે દ્વેષભાવ રાખવો એ ખોટું છે. જે પણ આ વાયરસથી પીડિત છે તેમના માટે કોઈ પણ પ્રકારનો ભેદભાવ ન રાખવો જોઈએ.
જે પણ ઘટના થઇ છે તેના માટે આખા સમાજ ઉપર ફિટકાર વરસાવવો એ ખોટું: ભાગવત
પાલઘર મોબ લિંચિંગ વિષે કહ્યું નિર્દોષની હત્યા કરી દેવી એ કેટલી હદે યોગ્ય છે?: ભાગવત
કોરોના વાયરસ માટે સરકારના સમયસર લેવાયેલા પગલાંની પ્રશંસા કરી
નાગપુરથી ઓનલાઈન લોકોને સંબોધન આપતી વખતે મોહન ભાગવતે કહ્યું હતું કે 130 કરોડ ભારતીયો આપણો પરિવાર છે. જે પણ ઘટના થઇ છે તેના માટે કેટલાક ચોક્કસ વ્યક્તિઓની ભૂલ છે. આ માટે આખા સમાજ ઉપર ફિટકાર વરસાવવો એ ખોટું છે. બંને પક્ષના નેતાઓએ ભેગા થઇને આ મુદ્દે ચર્ચા કરવી જોઈએ કે એકબીજા માટે ઝેર ન ફેલાવવામાં આવે.
આ ઉપરાંત પાલઘર મોબ લિંચિંગ વિષે પણ તેમણે પોતાનો અભિપ્રાય આપ્યો હતો. તેમણે પોલીસની નિષ્ક્રિયતા ઉપર નિશાન સાધીને કહ્યું હતું કે હુમલો કરનાર લોકોએ કાયદો અને વ્યવસ્થા પોતાના હાથમાં લીધી અને પોલીસ મૂકપ્રેક્ષક બનીને જોઈ રહી. બંને સંતો નિર્દોષ હતા. એકબીજાના પક્ષપાતી નિવેદનોને બાજુ પર મૂકીને સૌએ એ વિચાર કરવાની જરૂર છે કે નિર્દોષની હત્યા કરી દેવી એ કેટલી હદે યોગ્ય છે?
આ પ્રકારની નફરતથી ફેલાતી હિંસા અંગે તેમણે કહ્યું હતું કે સમાજમાં એવા લોકો વસે છે જેમણે વારંવાર નફરતની આગ ભડકાવવી છે. તેઓ આમ કરવામાં નિષ્ણાત છે. એક ભણેલગણેલ નાગરિક તરીકે આપણી ફરજ છે કે આપણે આવા સમાજનો કોમી એખલાસ નષ્ટ કરવા માંગતા તત્વોથી દૂર રહીએ.આ ઉપરાંત તેમણે કોરોના વાયરસ માટે સરકારના સમયસર લેવાયેલા પગલાંની પ્રશંસા કરીને કહ્યું હતું કે સરકારની આ કામગીરીને કારણે જ બીજા દેશો કરતા ભારતમાં સ્થિતિ નિયંત્રણમાં છે. તેમણે લોકોને પણ સરકારની ગાઇડ લાઇન્સનું પાલન કરવા જણાવ્યું હતું અને પોતાની જાતને સુરક્ષિત રાખવા જણાવ્યું હતું.
ભાગવતે જણાવ્યું હતું કે RSSના સ્વયંસેવકો અત્યારે દેશમાં લોકોની મદદ માટે કામ કરી રહ્યા છે. 3 લાખથી વધુ સેવકો દેશના 55000 જેટલી જગ્યાઓએ 33 લાખથી વધુ રેશન કીટ અને 2 કરોડથી વધુ ફૂડ પેકેટ્સનું વિતરણ કરી ચુક્યા છે. નોંધનીય છે કે ભાગવત કોરોના વાયરસ પછી દેશની ડામાડોળ થયેલી અર્થવ્યવસ્થાને પાટા ઉપર લાવવા માટે સ્વદેશી મોડલ અપનાવવાની તરફેણમાં છે.