અમેરિકાની પરંપરા અનુસાર ચૂંટણી બાદ અઢી મહિનાનો સમય સત્તા હસ્તાંતરણ માટે નિયત કરવામાં આવેલ છે, પરંતુ ટ્રમ્પે અમેરિકાની પરંપરાને લાંછન લાગે એવી વર્તણૂક શરૂ કરી દીધી છે
પોતાની હારનો ધરાર સ્વીકાર નહીં કરનાર ડોનાલ્ડ ટ્રમ્પના અડિયલ વલણથી અમેરિકામાં સંકટ વધી રહ્યું છે. તમામ મીડિયા રિપોર્ટ અનુસાર દેશભરમાં ટ્રમ્પના સમર્થકો ચૂંટણી હાઈજેક કર્યાનો આરોપ લગાવીને રસ્તા ઉપર ઊતરીને ઉગ્ર વિરોધ કરી રહ્યા છે. આ જોઇને નવા વરાયેલા રાષ્ટ્રપ્રમુખ જો બિડેને પોતાની ખામોશી તોડતાં જણાવ્યું છે કે ટ્રમ્પનું વલણ અમેરિકન પરંપરાને શરમજનક સ્થિતિમાં મૂકી દેનારું છે, જોકે બિડેને ભારપૂર્વક જણાવ્યું છે કે ટ્રમ્પનો કાર્યકાળ સમાપ્ત થતાંની સાથે જ સત્તાના હસ્તાંતરણને કોઇ રોકી શકશે નહીં. ટ્રમ્પનો કાર્યકાળ આગામી ર૦ જાન્યુઆરીએ સમાપ્ત થશે, પરંતુ ટ્રમ્પ સત્તા હસ્તાંતરણની પ્રક્રિયા તરફ આગળ વધતા દેખાતા નથી.
અમેરિકાની પરંપરા અનુસાર ચૂંટણી બાદ અઢી મહિનાનો સમય સત્તા હસ્તાંતરણ માટે નિયત કરવામાં આવેલ છે, પરંતુ ટ્રમ્પે અમેરિકાની પરંપરાને લાંછન લાગે એવી વર્તણૂક શરૂ કરી દીધી છે. ટ્રમ્પે સૌ પહેલાં પોતાના ડિફેન્સ સેક્રેટરી માર્ક એસ્પરને હટાવી દીધા અને તેમના સ્થાને પોતાના વફાદારને ગોઠવી દીધા. ત્યારબાદ ટ્રમ્પે પેન્ટાગોનના સિનિયર ઓફિસરોને હટાવી દીધા અને તેમના સ્થાને પણ પોતાના વફાદાર સમર્થકોને મૂકી દીધા હતા.
આમ, અમેરિકામાં રાષ્ટ્રપ્રમુખ ડોનાલ્ડ ટ્રમ્પ હજુ પણ હાર માનવા તૈયાર નથી. તેઓ હજુ પણ એ વાતને વળગી રહ્યા છે કે રાષ્ટ્રપ્રમુખની ચૂંટણીમાં ગોટાળા થયા છે. ડોનાલ્ડ ટ્રમ્પ સોશિયલ મીડિયા પર સતત ચૂંટણી પ્રક્રિયા અને જો બિડેનની જીત સામે સવાલ ઉઠાવી રહ્યા છે. એવા ચોંકાવનારા અહેવાલ મળ્યા છે કે વિશ્વની મહાસત્તા અમેરિકામાં રાષ્ટ્રપ્રમુખ ડોનાલ્ડ ટ્રમ્પ સત્તાપલટો કરવાની જોરદાર તૈયારી કરી રહ્યા છે. વિદેશ મંત્રી માઈક પોમ્પિયોએ પણ જણાવ્યું છે કે શાંતિપૂર્ણ રીતે સત્તાનું હસ્તાંતરણ કરવામાં આવશે અને ટ્રમ્પ પ્રશાસન પોતાનો બીજો કાર્યકાળ શરૂ કરશે.
અમેરિકામાં રાષ્ટ્રપ્રમુખની ચૂંટણીમાં જો બિડેન અને ડોનાલ્ડ ટ્રમ્પ વચ્ચે જોરદાર ટક્કર જોવા મળી હતી. ચૂંટણીમાં જો બિડેને જીત નોંધાવી અને સત્તા પરિવર્તનની યોજના પર કામ પણ શરૂ કરી દીધું છે. બીજી તરફ ડોનાલ્ડ ટ્રમ્પ હજુ પણ હાર સ્વીકારવા તૈયાર નથી અને ચૂંટણી પરિણામમાં ફેરફારના પ્રયાસમાં લાગી ગયા છે.
અમેરિકામાં તખ્તાપલટાની શક્યતાનો અંદાજ એ વાતથી લગાવી શકાય છે કે રાષ્ટ્રપ્રમુખ ડોનાલ્ડ ટ્રમ્પની ભત્રીજી મેરી ટ્રમ્પે ટ્વિટ કરીને કહ્યું છે કે રાષ્ટ્રપ્રમુખ ચૂંટણીમાં જો બિડેન કાયદાકીય રીતે અને નિર્ણાયક રૂપથી જીત્યા છે. ડોનાલ્ડ ટ્રમ્પ પોતાની જીત દર્શાવવા માટે કેટલું પણ જૂઠ કેમ ન બોલે કે પછી સ્પિન કરે, પરંતુ હવે ચૂંટણી પરિણામને બદલી નહીં શકાય. સતર્ક રહો, આ એક તખ્તાપલટાનો પ્રયાસ છે.
ટ્રમ્પ પ્રશાસન તરફથી ડિફેન્સ સેક્રેટરી માર્ક એસ્પરને તેમના પદથી હટાવી દીધા બાદથી અત્યાર સુધીમાં પેન્ટાગોનમાં અનેક અધિકારીઓને બદલી લેવામાં આવ્યા છે. ટ્રમ્પ એડમિનિસ્ટ્રેશન તરફથી જે પ્રકારે આ નિર્ણય લેવામાં આવ્યો છે તેને જોયા બાદ સૈન્ય નેતૃત્વ અને અસૈન્ય અધિકારીઓમાં ચિંતા વધી ગઈ છે. એસ્પરને હટાવ્યા બાદ ચાર વરિષ્ઠ સૈન્ય અધિકારીને હટાવી દેવામાં આવ્યા છે.
દરમિયાન જ્યોર્જિયાના રિપબ્લિકન સ્ટેટ ઓફ સેક્રેટરી બ્રેડ રેફ્રેન્સપરે જ્યોર્જિયાની ૧પ૯ કાઉન્ટીમાં તમામ મતનું હેડ રિકાઉન્ટ અને ઓડિટ કરવાનો આદેશ કર્યો છે. આમ, જ્યોર્જિયામાં રિકાઉન્ટિંગ માટેની રાષ્ટ્રપ્રમુખ ટ્રમ્પની અપીલ માન્ય રાખવામાં આવી છે. જ્યોર્જિયાના રિકાઉન્ટમાં નવી ઇલેક્ટ્રોનિક વોટિંગ સિસ્ટમ હેઠળ બનાવવામાં આવેલ પેપર પ્રિન્ટ આઉટનો ઉપયોગ કરવામાં આવશે.
હજુુ જાન્યુુઆરી સુધીમાં તો ટ્રમ્પ અનેક ત્રાગાં કરશે અને સહેલાઇથી બિડેનને સત્તારૂઢ થવા દે તેમ લાગતું નથી. વ્હાઇટ હાઉસમાં એક ગ્રૂપ સત્તા હસ્તાંતરણની પ્રક્રિયાને આગળ વધારવા માગે છે, પરંતુ ટ્રમ્પ તેને બ્રેક લગાવી રહ્યા છે. ટ્રમ્પને ડર છે કે બિડેન બિરાજમાન થયા બાદ પોતાને જેેલમાં જવું પડે. કારણ કે બિડેને પણ ટ્રમ્પનાં કૌભાંડની યાદી તૈયાર કરી રાખી છે.