હકડેઠઠ / ગુજરાતમાં દિવાળી વેકેશનની મોજ: સાપુતારામાં હોટેલો બુક તો દ્વારકામાં માનવમહેરામણ, જુઓ કેવો છે માહોલ

• ડાંગથી માંડીને દીવ સુધી બધું જ 'હાઉસ ફૂલ'
• ગુજરાતના પ્રવાસન સ્થળો પર ભારે જનમેદની
• સાયન્સ સીટી, સ્ટેચ્યુ ઓફ યૂનિટી,સાસણમાં ભીડતંત્ર  

દીપાવલીની રજાઓ અને રસીકરણના કારણે કોરોનાનો ભય ગાયબ થઇ જતા ગત દિવાળીની જેમ જ રાજ્યના મહત્વના પ્રવાસન સ્થળો -દેવ દર્શન માટેના પવિત્ર ધામિર્ક સ્થળો હાઉસ ફૂલ થઇ ગયા છે. ડાંગના સાપુતારાનો પવર્તીય વિસ્તાર હોય, પોળો ફોરેસ્ટ કે પછી સાસણ ગીર કે જગત મંદિર દ્વારકા હોય. જ્યાં જુઓ ત્યાં ભીડ જ ભીડ છે. માઉન્ટ આબુ,શ્રી નાથજી,સોમનાથ થી માંડીને સ્ટેચ્યુ ઓફ યૂનિટી સહિતના પ્રવાસન સ્થળોએ માનવ મેદની ઉમટી પડી છે. 

સાપુતારા-પ્રકૃતિનો અહેસાસ 

ડાંગના સાપુતારામાં ફૂલ ગુલાબી ઠંડી સાથે મોસમ સહીત પર્વતીય પ્રકૃતિની મજા માણવા સહેલાણીઓ ઉમટી પડતા  તમામ હોટલ ફૂલ થઇ ગઇ છે.સાપુતારામાં માનવ મહેરામણ ઉમટી પડ્યો છે કારણકે,સહેલાણીઓ માને છે કે ફરવા માટે હીલ સ્ટેશન સાપુતારા બેસ્ટ ઓપ્શન છે.સાપુતારામાં વાહનોની લાંબી લાઈન લાગતા ભીડને લઇ ભારે પોલીસ બંદોબસ્ત ગોઠવાયો છે. તો નર્મદા જીલ્લાના સ્ટેચ્યુ ઓફ યૂનિટી એટલે કે વિશ્વની સૌથી ઉંચી સરદાર પટેલની પ્રતિમા નિહાળવા પણ મોટા પ્રમાણમાં સહેલાણીઓ પહોચ્યાં છે.સ્ટેચ્યૂ ઓફ યુનિટી પર જામી હજારોની ભીડ જામતા 
નવા વર્ષે  SoU પ્રવાસીઓનું ફેવરીટ સ્થળ બન્યું છે.એક જ દિવસમાં 30 હજાર કરતા વધુ લોકોએ  મુલાકાત લીધી છે તો પ્રવાસીઓ માટે બસની સંખ્યામાં પણ વધારો કરવો પડ્યો હતો.  જન્માષ્ટમીનાં બે દિવસોમાં પણ અંદાજે પોણા બે લાખની જનમેદની અહીં ઉમટી હતી.

દ્વારકા જગત મંદિર-પોળો ફોરેસ્ટ પણ આકર્ષણ  

આ તરફ,સૌરાષ્ટ્રના દ્વારકા -સોમનાથમાં પણ ભારે ભીડ જામી છે.જગત મંદિર દ્વારિકાધીશના મંદિરે માનવ મહેરામણ ઉમટ્યો છે,નવવર્ષના પ્રારંભે દ્વારકાધીશના દર્શન કરી પાવન થવાના મહિમામાં વધારો થયો છે અહીના સુદામા સેતુ પર પ્રવાસીઓની ભારે ભીડ જામી પડી છે. તો ગોમતીઘાટ પર સ્નાન કરવા ભક્તોની ભારે ભીડ ઉમટી પડી છે અને ભાઈબીજના દિવસે મહાદાન,દીપદાનની પરંપરાને આગળ ધપાવતા બહેનો માંગશે ભાઇ માટે દીર્ઘ આયુષ્યના આશીર્વાદ. તો બનાસ કાંઠાના પોળો ફોરેસ્ટની પણ આ જ સ્થિતિ છે. ગુજરાતના કાશ્મીર તરીકે નવાજાયેલા પોળો ફોરેસ્ટમાં સમગ્ર ગુજરાતમાંથી પ્રવાસીઓ ઉમટી પડ્યા છે.પ્રવાસીઓ માટે કુદરતના સાનિધ્યે રજાઓ માણવા માટે પોળો ફોરેસ્ટ  ફેવરિટ ડેસ્ટિનેશન બન્યું છે.

અમદાવાદમાં સાયન્સ સીટી આકર્ષણ 

અમદાવાદમાં પણ, કાંકરિયા ,રીવર ફ્રન્ટ ઉપરાંત સાયન્સ સિટી ખાતે મુલાકાતીઓની મોટી સંખ્યામાં ભીડ જોવા મળી હતી.સાયન્સ સિટીના રોબોટીક ગેલેરી,એકવાટિક ગેલેરી,નેચર પાર્ક જોવા લોકોમાં ભારે ઉત્સુકતા જોવા મળતી હતી.તહેવારને પગલે અત્યાર સુધીમાં હજારો લોકોએ સાયન્સ સિટીની લીધી મુલાકાત લીધી છે.શાળાઓમાં વેકેશન છે અને ગરમીનું પ્રમાણ ઘટતા જ નાં ભૂલકાઓ વિજ્ઞાનનાં અચરજ જોવા-સમજવા પોતાના વાલી સાથે આવી રહ્યા છે.દિવાળીમાં તહેવારને પગલે સાયન્સ સિટીની આવક થઈ બમણી થઇ ગઈ છે.

સાસણમાં પણ ભારે ભીડ   

બીજી બાજુ,સૌરાષ્ટ્રમાં ગીર-સોમનાથ જિલાના વૈશ્વિક ખ્યાતિ ધરાવતા સાસણમાં સિંહ દર્શનનો લાભ લેવા પણ હજારો પ્રવાસીઓ ઉમટયા છે.16 ઓક્ટોબરથી શરુ થયેલા સિંહ દર્શન માટે લગભ એક મહિનાનું હાઉસ ફૂલ બૂકિંગ ઓન લાઈન જ થઇ ગયું હતું.દિવાળી વેકેશનને લઈને પ્રવાસીઓની સંખ્યામાં નોંધપાત્ર વધારો થયો છે.આમ પણ કોરોના કાળ પછી સફારી પાર્ક ખુલતા પ્રવાસીઓ ઉમટી પડ્યા છે.વન્ય પ્રાણીઓને જોવા મોટી સંખ્યામાં પ્રવાસીઓ આવતા સાસણના હોટેલ -રિસોર્ટ માલિકોને પણ લાંબા સમય પછી ચાંદી જ ચાંદીનો અહેસાસ થઇ રહ્યો છે. 
સાસણ એશિયાટિક સિંહ સહિતના વન્ય પ્રાણીઓનું આશ્રય સ્થાન છે.અને અહીના સિંહ વિશ્વભરમાં અનેરી ખ્યાતિ ધરાવે છે.