બર્થડે / લાઈમલાઈટથી દૂર રહે છે ધર્મેન્દ્રની પહેલી પત્ની, આવા છે બંનેના સંબંધો

• બંને પત્નીઓ સાથેના સંબંધમાં બેલેન્સ જાળવી રાખ્યું છે ધર્મેન્દ્રએ
• પ્રથમ લગ્ન કર્યા ત્યારે તેમની ઉંમર માત્ર 19 વર્ષની હતી
• ધર્મેન્દ્રને પહેલાં લગ્નથી 4 બાળકો હતા 

ધર્મેન્દ્રએ 2 લગ્ન કર્યા છે અને છેલ્લા ઘણાં દાયકાઓથી તેણે બંને સંબંધમાં બેલેન્સ જાળવી રાખ્યું છે. ધર્મેન્દ્રનો જન્મ 8 ડિસેમ્બર 1935ના રોજ લુધિયાણામાં થયો હતો. ધર્મેન્દ્રએ જ્યારે પ્રથમ લગ્ન કર્યા ત્યારે તેમની ઉંમર માત્ર 19 વર્ષની હતી. વર્ષ 1954માં તેમણે પ્રકાશ કૌર સાથે લગ્ન કર્યા હતા. આ લગ્નથી તેમને 4 બાળકો હતા. અજય સિંઘ જેને આપણે સની દેઓલ તરીકે ઓળખીએ છીએ અને તેણે ઇન્ડસ્ટ્રીમાં પિતાની જેમ નામના મેળવી છે અને વિજય સિંહ છે જેને દુનિયા બોબી દેઓલ તરીકે ઓળખે છે. આ ઉપરાંત ધર્મેન્દ્રને પહેલા લગ્નથી બે પુત્રી વિજેતા અને અજેતા છે.

હેમા સાથે લગ્નથી ધર્મેન્દ્રને બે પુત્રીઓ છે

જ્યારે ધર્મેન્દ્રએ 2 મે, 1980ના રોજ બીજા લગ્ન કર્યા. આ લગ્નથી તેમને બે પુત્રી ઈશા અને આહના છે. ઇશા ફિલ્મોમાં કામ કરી ચૂકી છે અને હાલમાં તે પરિવાર સાથે સમય વિતાવી રહી છે. ઇશા દેઓલનો જન્મ 2 નવેમ્બર 1982માં થયો હતો. ઇશાએ 2002માં 'કોઈ મેરે દિલ સે પૂછે'થી બોલિવૂડમાં ડેબ્યૂ કર્યું હતું. લગ્નની વાત કરીએ તો ઇશાએ 29 જુલાઈ, 2012 ના રોજ મુંબઈના ઉદ્યોગપતિ ભરત તખ્તાની સાથે લગ્ન કર્યા. જ્યારે આહનાએ ફેબ્રુઆરી 2014માં બિઝનેસમેન વૈભવ કુમાર સાથે લગ્ન કર્યા હતા. આહના 'ના તુમ જાનો ના હમ' ફિલ્મમાં જોવા મળી ચૂકી છે.

 તેમની પહેલી પત્ની લાઈમલાઈટથી રહે છે દૂર

હેમા માલિની સાથે લગ્ન કર્યા પછી, ધર્મેન્દ્રના  જીવનમાં ઘણી સમસ્યાઓ આવી. તેમની પહેલી પત્ની પ્રકાશ કૌર સાથેના સંબંધ પણ પહેલાં જેવા રહ્યા નહીં. પ્રકાશ કૌરે બહુ મુશ્કેલથી એક ઈન્ટરવ્યૂ દરમિયાન આ અંગે વાત કરી હતી. 
પ્રકાશે કહ્યું હતું કે- 'તે નથી જાણતી કે લોકો તેમના અને ધર્મેન્દ્રના સંબંધ વિશે શું કહે છે. તે એટલું જાણે છે કે ધર્મેન્દ્ર પરિવારની ખૂબ કાળજી લે છે. રોજ સાંજે ઘરે આવીને બાળકો સાથે સમય વિતાવે છે.

પ્રકાશ કૌર મુંબઇ પુત્ર સન્ની અને બોબી દેઓલ સાથે રહે છે

હેમા માલિની વિશે વાત કરતા પ્રકાશે કહ્યું કે 'હું જાણું છું કે હેમા ઘણી સમસ્યાઓનો સામનો કરી રહી છે. એક સ્ત્રી તરીકે, હું તેની લાગણી સમજી શકું છું, પરંતુ જો હું હેમાની જગ્યાએ હોત, તો એમણે જે કર્યું છે એવું ક્યારેય ન કરતી. પ્રકાશ કૌરે ઇન્ટરવ્યૂ દરમિયાન કહ્યું હતું કે- 'ધર્મેન્દ્ર સારા પતિ નહીં પણ જવાબદાર પિતા જરૂર છે. તેમના બાળકો તેમને ખૂબ જ ચાહે છે. તેઓ પણ બાળકોને ક્યારેય નજરઅંદાજ કરતા નથી.' તમને જણાવી દઈએ કે, પ્રકાશ કૌર લાઈમ લાઈટથી દૂર રહે છે અને મુંબઇના જુહુ સ્થિત બંગલામાં પુત્ર સન્ની અને બોબી દેઓલ સાથે રહે છે.