છેલ્લાં ઘણાં સમયથી રાજ્યમાં ધનજી ઓડ ઉર્ફે ઢબૂડી માતાનું પ્રકરણ ચાલી રહ્યું છે. ઘણાં લાંબા સમય સુધી ભૂગર્ભમાં ચાલતી અને સોશિયલ મીડિયામાં દ્વારા પ્રચાર પામતી તેની ગતિવિધિનાં રહસ્ય પરથી હવે પડદા ખૂલી રહ્યાં છે. આમ, તો આ મુદ્દે ઢબૂડી માતા સામે કોઈ વિધિવત ફરિયાદ નોંધાઈ નથી પરંતુ અંધશ્રદ્ધાનાં આ ખેલ તરફ રાજ્યનો એક વિશાળ વર્ગ જે રીતે આકર્ષિત થઈ રહ્યો છે તેની સામે મીડિયા અને વિજ્ઞાન જાથાએ અનેક સવાલો ઉઠાવ્યાં છે. ત્યારે કેમ ઉઠી રહ્યાં છે ધનજી ઓડ ઉર્ફે ઢબૂડી માતા સામે સવાલો. તે જોઈએ આ અહેવાલમાં.
ચમચમાતી કારમાંથી ઉતરીને ચાલી રહેલો એક વ્યક્તિ કે જેને જોઈને તમે કલ્પના નહીં કરી શકો કે આ ઢબૂડી માતા છે. માતા છે તો શું થઈ ગયું આખરે તેઓ એક માણસ તો છે એટલે કારનો શોખ પણ રહેવાનો જ. પરંતુ કશો કામ ધંધો કર્યા વગર માત્ર લોકોને અંધશ્રદ્ધામાં ઓતપ્રોત કરીને જાહોજલાલી ભોગવતા ધનજી ઓડની કાર લોકોને ખૂંચે તો નવાઈ નહીં. હવે આ જ ઢબૂડી માતા તરીકે ચૂંદડી ઓઢેલા અને લોકોનાં દુઃખભંજક હોવાનો દાવો કરતા ધનજી ઓડને દંભની ચૂંદડીમાં કે જે લોકો સામે મો છૂપાવીને પણ પુષ્કળ કમાણી કરી લેવાની તરકીબ જોઇને તમને નવાઇ લાગશે. એ વ્યક્તિની આ બન્ને પ્રકારની જીવનશૈલીની તસવીર જોઈ લોકોએ હવે જાગૃત થવાની જરૂર છે કે તમારી મહેનતનાં નાણાં કોના ખિસ્સામાં જઈ રહ્યાં છે!
ઢબુડી માતા બનેલા ધનજી ઓડના કારનામાઓને હવે વિજ્ઞાનજાથાએ પણ પડકાર ફેંક્યો છે. આ સાથે જ વિજ્ઞાનજાથાએ મોટો ખુલાસો કર્યો છે. વિજ્ઞાન જાથાનાં જયંત પંડ્યાએ કહ્યું કે, આ અંધશ્રદ્ધાનો મોટો કારોબાર છે ધનજી ઓડ ગરીબ ભક્તોનાં પૈસાથી લક્ઝુરિયસ લાઇફ જીવી રહ્યાં છે. ધનજી ધતિંગ વખતે પોતાનું મોઢું ચૂંદડીથી ઢાંકેલુ રાખે છે. તેનાં અનુયાયીઓ ગરીબ અને ગ્રામીણ પંથકમાં એવાં પ્રકારની આભા ઉભી કરતા કે, લોકોનાં દુઃખ દર્દ દૂર કરી દે છે. આ અંગે વિજ્ઞાનજાથાને જ્યારે જાણ થઈ ત્યારે તેણે પ્રથમ જે સ્થળે ઢબુડી માતાનો દરબાર ભરવાની જાહેરાત થતી હતી તે સ્થળની મુલાકાત લીધી અને એક સર્વે કરવામાં આવ્યો. ઢબુડી માતાનાં એક દરબારમાં તે લોકો પાસેથી 80 લાખથી એક કરોડ જેટલી રકમ પડાવી લેતો હોવાનો પણ આરોપ લાગ્યો છે.
દુઃખભંજક માતાજી હોવાનો આંચળો ઓઢીને એક વિશાળ જનસમુદાયને અંધશ્રદ્ધાના ખપ્પરમાં હોમી રહેલા ધનજી ઓડની આવક કેટલી હશે તે તો તેનાં વૈભવી બંગલાને અને તેની ગાડી જોઈને ખબર પડી જશે. એટલે તેનાં પર લોકોને આર્થિક રીતે મોટા પ્રમાણમાં ધૂતવાનાં લાગેલા આરોપમાં વજૂદ તો ઘણું જ છે. બસ માત્ર તપાસની જરૂર છે.
ધનજી ઓડ ઉર્ફે ઢબૂડી માતાનાં શંકાસ્પદ વ્યવહારો અને પ્રવૃત્તિની સાક્ષી બની રહ્યાં છે. ઢોંગી ધનજી ઓડની ઓફિસનાં CCTV પણ સામે આવ્યાં છે. આ ઓફિસમાંથી શંકાસ્પદ વસ્તુઓ લાવવામાં આવતી હતી. શંકાસ્પદ વસ્તુઓનાં CCTV જે સામે આવ્યાં છે તેમાં આ CCTVમાં ધનજીનો એક સેવક ગાડીમાં શંકાસ્પદ વસ્તુઓ મુકતો દેખાય છે. આ પાર્સલમાં શું છે, તેને લઈને અનેક સવાલ ઉઠી રહ્યાં છે. શું ધનજી કોઈ ગેરકાયદેસર ધંધો કરતો હતો? શું આ પાર્સલમાં કોઈ શંકાસ્પદ વસ્તુઓ લઈ જવામાં આવતી હતી? ધનજી ઓડ પાર્સલમાં શું લાવતો અને લઈ જતો હતો? તેને લઈને અનેક સવાલ થયાં છે. આ સવાલનાં જે લોકો જવાબ માગે છે તેને ધનજી ઓડનાં સેવકો તરફથી ધમકીઓ મળે છે.
બહાદૂર વિજ્ઞાનજાથાએ ઢબૂડી માતાનું સત્ય બહાર લાવવાનું હિંમતભર્યું કામ કર્યું છે. ત્યારે હવે ગુજરાત પોલીસ પર મોટો સવાલ કે ઢબુડી માતા પર કેસ ક્યારે કરશે? કેમ કે, કેવી રીતે ઢબુડી માતાની તપાસ કરવી તે હવે ગુજરાત પોલીસનાં હાથમાં છે. કેમ કે, એક વિશાળ જનસમુદાય જ્યારે આ ગાંડરિયા પ્રવાહની જેમ અંધશ્રદ્ધાની ખાઈ તરફ જઈ રહ્યો હોય અને અંધશ્રદ્ધા નિર્મૂલનનું કામ કરનારી સંસ્થાઓ પણ કહેતી હોય કે આ એક દૂષણ છે ત્યારે એ દૂષણને અને સમાજને ગેરમાર્ગે દોરતી પ્રવૃત્તિ અટકાવવાનું કામ સરકાર અને પોલીસનું છે.